ଥୁଆମୂଳରାମପୁର, ୨୪ା୪ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲ୍ଲା ଥୁଆମୂଳ ରାମପୁର ବ୍ଲକ ପ୍ରାଙ୍ଗଣରେ ଶୁକ୍ରବାର ସନ୍ଧ୍ୟାରେ ଜାତୀୟ ପଞ୍ଚାୟତିରାଜ ଦିବସ – ୨୦୨୬ ବ୍ଲକ ସ୍ତରୀୟ ସମାରୋହ ବହୁ ଆଡ଼ମ୍ବରରେ ଅନୁଷ୍ଠିତ ହୋଇଯାଇଛି। ଏହି ଅବସରରେ ବଲାଙ୍ଗୀରଠାରେ ଆୟୋଜିତ ରାଜ୍ୟ ସ୍ତରୀୟ କାର୍ଯ୍ୟକ୍ରମରୁ ସିଧାପ୍ରସାରଣ ମାଧ୍ୟମରେ ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ, ଉପ-ମୁଖ୍ୟମନ୍ତ୍ରୀ ଶ୍ରୀ କନକ ବର୍ଦ୍ଧନ ସିଂ ଦେଓ, ସ୍ୱାସ୍ଥ୍ୟ ମନ୍ତ୍ରୀ ଡଃ ମୁକେଶ ମହାଲିଂ ଏବଂ ପଞ୍ଚାୟତିରାଜ ସଚିବ ଶ୍ରୀ ଗିରିଶ ଏସ୍.ଏନ୍. ପ୍ରମୁଖ ଜନସାଧାରଣଙ୍କୁ ଉଦ୍ବୋଧନ ଦେଇଥିଲେ। ବିଶେଷ କରି ମୁଖ୍ୟମନ୍ତ୍ରୀଙ୍କ ଦ୍ୱାରା ପଞ୍ଚାୟତିରାଜ – ସମୀକ୍ଷା ପୋର୍ଟାଲର ଶୁଭ ଉଦ୍ଘାଟନ (ଯାହାକି ଏଲଇଡି ସ୍କ୍ରିନରେ ପ୍ରଦର୍ଶିତ ହୋଇଥିଲା) ପରି ଏକ ମହତ୍ତ୍ୱପୂର୍ଣ୍ଣ କାର୍ଯ୍ୟକ୍ରମ ସମୟରେ ଉପସ୍ଥିତି ଏତେ କମ୍ ରହିବା ଘଟଣା, ସ୍ଥାନୀୟ ପ୍ରଶାସନର କାର୍ଯ୍ୟକ୍ରମ ସଂଯୋଜନାରେ ଥିବା କିଛି ତ୍ରୁଟିକୁ ଶାଣିତ ଭାବେ ଦର୍ଶାଉଛି। କେବଳ କିଛି ପ୍ରଶାସନିକ ଅଧିକାରୀ ଓ ସୀମିତ ହିତାଧିକାରୀ ଶେଷ ପର୍ଯ୍ୟନ୍ତ ଉପସ୍ଥିତ ଥିଲେ। ଏତେ ସହାୟତା ବଣ୍ଟନ ପରେ ମଧ୍ୟ ଜନସାଧାରଣ କାହିଁକି ଅଭିଭାଷଣ ଶୁଣିବା ପାଇଁ ରାଜି ହେଲେ ନାହିଁ, ତାହା ଚିନ୍ତାର ବିଷୟ।
ବ୍ଲକ ସ୍ତରୀୟ ଏହି କାର୍ଯ୍ୟକ୍ରମରେ ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ପ୍ରଦର୍ଶନ ପାଇଁ ୨ଟି ଗ୍ରାମ ପଞ୍ଚାୟତକୁ ଶ୍ରେଷ୍ଠ ପଞ୍ଚାୟତ ଭାବେ ପୁରସ୍କୃତ କରାଯାଇଥିଲା। ଗ୍ରାମୀଣ ଆବାସ (ଅନ୍ତ୍ୟୋଦୟ ଗୃହ ଯୋଜନା) କ୍ଷେତ୍ରରେ ସଫଳ ରୂପାୟନ ପାଇଁ **’କିଆପଦର’** ଗ୍ରାମ ପଞ୍ଚାୟତ ଏବଂ ମନରେଗା ଯୋଜନାର ସୁପରିଚାଳନା ପାଇଁ ଗୁଣୁପୁର’ଗ୍ରାମ ପଞ୍ଚାୟତକୁ ସ୍ମୃତି ଚିହ୍ନ ଏବଂ ପ୍ରମାଣ ପତ୍ର ଦେଇ ସମ୍ମାନିତ କରାଯାଇଥିଲା।
ବିଶାଳ ଜନସମାଗମ ମଝିରେ ‘ଅନ୍ତ୍ୟୋଦୟ ଗୃହ ଯୋଜନା’ରେ ୨୫୦ ଜଣ ନୂତନ ହିତାଧିକାରୀଙ୍କୁ କାର୍ଯ୍ୟାଦେଶ ପ୍ରଦାନ କରାଯିବା ସହ ସେମାନଙ୍କ ବ୍ୟାଙ୍କ ଖାତାକୁ ପ୍ରଥମ କିସ୍ତି ବାବଦରେ ୪୦,୦0୦ ଟଙ୍କା ପଠାଯାଇଛି। ଏଥିସହ, ୩ ମାସ ମଧ୍ୟରେ ଗୃହ ନିର୍ମାଣ ସମ୍ପୂର୍ଣ୍ଣ କରିଥିବା ୬ ଜଣ ହିତାଧିକାରୀଙ୍କୁ ପ୍ରୋତ୍ସାହନ ରାଶି, ୫ ଜଣଙ୍କୁ ନୂତନ ରାସନ କାର୍ଡ ଓ ୫ ଜଣଙ୍କୁ ସାମାଜିକ ସୁରକ୍ଷା ଭତ୍ତା ପ୍ରଦାନ କରାଯାଇଥିଲା।
ରାଜ୍ୟର ମୁଖ୍ୟମନ୍ତ୍ରୀ, ମନ୍ତ୍ରୀ ଓ ପଞ୍ଚାୟତିରାଜ ସଚିବ ପରି ହେଭିୱେଟ୍ମାନଙ୍କ ଉପସ୍ଥିତି ଏବଂ ବହୁବିଧ ସରକାରୀ ଯୋଜନାର ଶୁଭାରମ୍ଭ ସତ୍ତ୍ୱେ, ସଭାସ୍ଥଳର ବାସ୍ତବ ଚିତ୍ର କିନ୍ତୁ ଭିନ୍ନ ଥିଲା। କାର୍ଯ୍ୟକ୍ରମ ଆରମ୍ଭରେ ବହୁ ସଂଖ୍ୟାରେ ମହିଳା ସ୍ୱୟଂ ସହାୟିକା ଗୋଷ୍ଠୀ, ମିଶନ ଶକ୍ତି ମହିଳା, ଆଙ୍ଗନୱାଡି କର୍ମୀ, CRP, MBK ଏବଂ ରାସନ କାର୍ଡ ଓ ଭତ୍ତା ହିତାଧିକାରୀ ଯୋଗ ଦେଇଥିଲେ ହେଁ, କାର୍ଯ୍ୟକ୍ରମର ମଧ୍ୟଭାଗରୁ ଲୋକେ ଧୀରେ ଧୀରେ ଉଠି ପଳାଇଥିଲେ। ସବୁଠାରୁ ଆଶ୍ଚର୍ଯ୍ୟଜନକ ବିଷୟ ହେଲା, ଯେତେବେଳେ ମାନ୍ୟବର ମୁଖ୍ୟମନ୍ତ୍ରୀ ନିଜ ଅଭିଭାଷଣ ରଖୁଥିଲେ, ସେତେବେଳେ ସଭାସ୍ଥଳର ଅଧିକାଂଶ ଚେୟାର ଖାଲି ପଡ଼ିଥିଲା। ପ୍ରାୟ ୯୦ ପ୍ରତିଶତ ଲୋକ ଅଧାରୁ ସଭା ଛାଡି ଚାଲିଯିବା ଘଟଣା, ସ୍ଥାନୀୟ ବ୍ଲକ ପ୍ରଶାସନର କାର୍ଯ୍ୟକ୍ରମ ଆୟୋଜନ ଶୈଳୀ ଓ ସଂଯୋଜନା ଉପରେ ଏକ ବଡ଼ ପ୍ରଶ୍ନଚିହ୍ନ ଲଗାଇଛି। କାର୍ଯ୍ୟକ୍ରମରେ ଏମପି ପ୍ରତିନିଧି ପବିତ୍ର ନାଏକ, ବିଡ଼ିଓ ଧ୍ରୁବ ଚରଣ ମୁଦୁଲି, ସିଡ଼ିପିଓ ମଧୁମାଳା ବାଗ, AEE ସାଲ୍ଖୁ ହେମ୍ବ୍ରମଙ୍କ ସମେତ ସ୍ଥାନୀୟ ଜନପ୍ରତିନିଧିମାନେ ଉପସ୍ଥିତ ଥିଲେ। BPC ଆରଏଚ୍ ରାଜେନ୍ଦ୍ର ନାରାୟଣ ଦେବ ଓ GPDO ବାଲେଶ୍ୱର ନାଏକ ମଞ୍ଚ ପରିଚାଳନା କରିଥିଲେ। ଡବ୍ଲୁଇଓ ସୁଭାଜିତ ରଞ୍ଜନ ସ୍ୱାଇଁ, BSSO ସୁନାରାମ ସୋରେନ, MI ବିଭୁ ରଞ୍ଜନ ସାହୁ, JE ଜିତୁ ଦାସ ଏବଂ BLC ବିଳାସ ନାଏକ ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ। କାର୍ଯ୍ୟକ୍ରମ ଶେଷ ବେଳକୁ କେବଳ କିଛି ପ୍ରଶାସନିକ ଅଧିକାରୀ ଓ ସୀମିତ ହିତାଧିକାରୀ ଉପସ୍ଥିତ ଥିଲେ।
