ଚଣ୍ଡିଗଡ଼/ଶ୍ରୀନଗର,୨୪।୪: ଭାରତ ସରକାରଙ୍କ ଗୃହ ମନ୍ତ୍ରଣାଳୟର ନିର୍ଦ୍ଦେଶକ୍ରମେ ଶୁକ୍ରବାର ରାତିରେ ପଞ୍ଜାବ ଏବଂ ଜମ୍ମୁ-କଶ୍ମୀରର ସମସ୍ତ ଜିଲାରେ ‘ସିଭିଲ ଡିଫେନ୍ସ ଏୟାର୍ ରେଡ୍/ବ୍ଲାକଆଉଟ୍’ ମକ୍ ଡ୍ରିଲ୍ ଅନୁଷ୍ଠିତ ହୋଇଛି। ଏହି ସମୟରେ ଲୋକମାନଙ୍କୁ ସମସ୍ତ ଆଲୋକ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଥିଲା।
ଅମୃତସରର ରଣଜିତ ଆଭେନ୍ୟୁ ଏବଂ ଲୁଧିଆନାର ପଞ୍ଜାବ କୃଷି ବିଶ୍ୱବିଦ୍ୟାଳୟ (PAU) ସମେତ ବିଭିନ୍ନ ଅଞ୍ଚଳରେ ରାତି ୮:୦୦ରୁ ୮:୧୫ ପର୍ଯ୍ୟନ୍ତ ବ୍ଲାକଆଉଟ କରାଯାଇଥିଲା। ରାତି ପ୍ରାୟ ୭:୫୫ରେ ପ୍ରଥମେ ସାଇରେନ ବାଜିଥିଲା ଏବଂ ଧର୍ମାନୁଷ୍ଠାନଗୁଡ଼ିକରୁ ଲୋକଙ୍କୁ ସଚେତନ କରାଯାଇଥିଲା। ସାଇରେନ ବାଜିବା ମାତ୍ରେ ବିଦ୍ୟୁତ ବିଭାଗ ପକ୍ଷରୁ ସପ୍ଲାଏ କାଟି ଦିଆଯାଇଥିଲା।
ସେହିଭଳି ଜମ୍ମୁ-କଶ୍ମୀରର ଗାନ୍ଦରବଲ ଜିଲାରେ ମଧ୍ୟ ଗୁରୁବାର ସାରେ ଏଭଳି ଅଭ୍ୟାସ କରାଯାଇଥିଲା, ଯେଉଁଥିରେ ହଠାତ ସମସ୍ତ ବଜାର ଏବଂ ସାର୍ବଜନୀନ ସ୍ଥାନ ଅନ୍ଧାର ହୋଇଯାଇଥିଲା। ଉତ୍ତରାଖଣ୍ଡର ଦେହରାଦୁନରେ ମଧ୍ୟ ରାତି ୧୦ଟାରେ ବ୍ଲାକଆଉଟ ପାଇଁ ଆଲର୍ଟ ଜାରି କରାଯାଇଥିଲା।
ଏହି ମକ ଡ୍ରିଲ୍ରେ ନ୍ୟାସନାଲ ଡିଜାଷ୍ଟର ରେସପନ୍ସ ଫୋର୍ସ (NDRF), ଦମକଳ ବାହିନୀ, ଜିଲା ପ୍ରଶାସନ, ପୋଲିସ, ସ୍ବାସ୍ଥ୍ୟ ବିଭାଗ, ସିଭିଲ ଡିଫେନ୍ସ ଏବଂ NCC କ୍ୟାଡେଟମାନେ ସାମିଲ ହୋଇଥିଲେ। ବାସ୍ତବ ଜରୁରୀକାଳୀନ ପରିସ୍ଥିତିରେ ବିଭିନ୍ନ ସଂସ୍ଥା କିଭଳି ପରସ୍ପର ସହ ସମନ୍ବୟ ରକ୍ଷା କରି କାମ କରିବେ, ତାହା ପରଖିବା ଏହି ଅଭ୍ୟାସର ମୁଖ୍ୟ ଉଦ୍ଦେଶ୍ୟ ଥିଲା।
ପ୍ରଶାସନ ପକ୍ଷରୁ ଲୋକଙ୍କୁ ଏଥିରେ ସହଯୋଗ କରିବାକୁ ନିବେଦନ କରାଯାଇଥିଲା। ଅଭ୍ୟାସ ସମୟରେ ଘରର ଲାଇଟ ବନ୍ଦ କରିବା ସହ ଜେନେରେଟର, ଟର୍ଚ୍ଚ, ମହମବତୀ କିମ୍ବା ନିଆଁକାଠି ବ୍ୟବହାର ନକରିବାକୁ କୁହାଯାଇଥିଲା। ତେବେ ଏହି ସମୟରେ ଡାକ୍ତରଖାନା ଭଳି ଅତ୍ୟାବଶ୍ୟକ ସେବାଗୁଡ଼ିକ ଜାରି ରହିଥିଲା।
୧୫ ମିନିଟର ଏହି ଅଭ୍ୟାସ ଶେଷ ହେବା ପରେ ପୁଣି ୨ ମିନିଟ ପର୍ଯ୍ୟନ୍ତ ସାଇରେନ ବଜାଯାଇ ସ୍”ଅଲ କ୍ଲିଅର୍” (All Clear) ମେସେଜ ଦିଆଯାଇଥିଲା ଏବଂ ବିଦ୍ୟୁତ ସପ୍ଲାଏ ସ୍ବାଭାବିକ ହୋଇଥିଲା।
