ଏଇ ଭାରତରେ
12:14 pmDecember 10, 2022December 10, 2022 / 21

ବାଲ୍ୟ ବିବାହ କରିବା ପରେ ବାଲ୍ୟ ବିଧବା ପାଲଟିଯାଇଥିବା ଜଣେ ଝିଅ ନିଜର ଇଚ୍ଛାଶକ୍ତି ଓ ନିଷ୍ଠା ବଳରେ କିପରି ସଶକ୍ତ ହୋଇ ସମାଜସେବା କରିପାରେ ତାହାର ଏକ ଉଦାହରଣ ଦେଖିବାକୁ ମିଳିଛି ଉତ୍ତରାଖଣ୍ଡରେ। ପିଥୋରଗଡ଼ ଗାଁରେ ଜନ୍ମିତ ବାସନ୍ତୀ ଦେବୀ ୧୨ବର୍ଷ ବୟସରେ ବାଲ୍ୟ ବିବାହ କରିଥିଲେ। ଦୁଇବର୍ଷ ପରେ ସେ ସ୍ବାମୀଙ୍କୁ ହରାଇ ଅସହାୟ ହୋଇଯାଇଥିଲେ। ପରେ ତାଙ୍କୁ କୌସାନି ସ୍ଥିତ ଲକ୍ଷ୍ମୀ ଆଶ୍ରମକୁ ପଠାଇ ଦିଆଗଲା। ସେଠାରେ ସେ ପୁନର୍ବାର ତାଙ୍କ ସ୍କୁଲ ଶିକ୍ଷା ସମାପ୍ତ କରିଥିଲେ। ପଢ଼ିବା ସମୟରେ ସେ କୋଷି ନଦୀ ବିପଦରେ ଥିବା ବିଷୟ ଜାଣିବାକୁ ପାଇଥିଲେ। ଏହାର ଅବବାହିକାରେ ବ୍ୟାପକ ଜଙ୍ଗଲ ଧ୍ୱଂସ ହେବା ଯୋଗୁ ଏଭଳି ବିପଦ ଉପୁଜିବାରେ ଲାଗିଥିଲା। ଏହାକୁ ଲକ୍ଷ୍ୟକରି ବାସନ୍ତୀ ଆଖପାଖ ଗାଁକୁ ଯାଇ ମହିଳାମାନଙ୍କୁ କୋଷି ନଦୀ ସୁରକ୍ଷା ସମ୍ପର୍କରେ ଅବଗତ କରିବା ସହ ସେମାନଙ୍କୁ ତାଙ୍କ ଅଭିଯାନରେ ସାମିଲ କରିଥିଲେ। ତାଙ୍କ ଅଭିଯାନର ନାମ ‘ସେଭ୍‌ କୋଷି ମୁଭ୍‌ମେଣ୍ଟ’। ଏହି ଅଭିଯାନକୁ ଏବେ ୨୦ ବର୍ଷ ପୂରିଗଲାଣି। ଇତିମଧ୍ୟରେ ସେ ୨୦୦ ଗାଁରୁ ଅନେକ ଶହ ମହିଳାଙ୍କୁ ଏକାଠି କରି କୋଷି ନଦୀ ଅବବାହିକାରେ ଗଛର ସୁରକ୍ଷା କରିବା ସହ ବୃକ୍ଷରୋପଣ କରୁଛନ୍ତି। ଏଥିପାଇଁ ତାଙ୍କୁ ନାରୀ ଶକ୍ତି ପୁରସ୍କାର ପ୍ରଦାନ କରାଯାଇଛି।