ଭୁବନେଶ୍ୱର,୨୧ା୧୧(ବ୍ୟୁରୋ): ବହୁଚର୍ଚ୍ଚିତ ମହିଳା ବ୍ଲାକ୍ମେଲର ଅର୍ଚ୍ଚନା ନାଗଙ୍କ ବିଜ୍ନେସ୍ ପାର୍ଟନର ଖଗେଶ୍ୱର ପାତ୍ରଙ୍କ ୧୦ ଦିନିଆ ରିମାଣ୍ଡ ଅବଧି ରବିବାର ଶେଷ ହୋଇଛି। ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ଗତ ୧୧ ତାରିଖରୁ ଖଗେଶ୍ୱରଙ୍କୁ ମାରାଥନ ଜେରା କରି ବହୁ ଗୁରୁତ୍ୱପୂର୍ଣ୍ଣ ତଥ୍ୟ ହାସଲ କରିଛି। ସୋମବାର ଇଡି ତାଙ୍କୁ କୋର୍ଟରେ ହାଜର କରିବ। ତେବେ ପୁଣି ଥରେ ତାଙ୍କୁ ରିମାଣ୍ଡରେ ଆଣିବାକୁ କୋର୍ଟଙ୍କ ନିକଟରେ ଇଡି ଆବେଦନ କରିବ ବୋଲି ସୂଚନା ମିଳିଛି। ଅପରପକ୍ଷରେ ମଞ୍ଚେଶ୍ୱର ଶିଳ୍ପାଞ୍ଚଳରୁ ଠାବ ହୋଇଥିବା ଅର୍ଚ୍ଚନାଙ୍କ ଦାମୀ ଏଣ୍ଡେଭର କାର୍କୁ ଇଡି ନୟାପଲ୍ଲୀସ୍ଥିତ କାର୍ଯ୍ୟାଳୟକୁ ନେଇ ଯାଞ୍ଚ କରିଛି। କାର୍ ଭିତରୁ ଗାଡ଼ିର ନମ୍ବର (ଓଡି୦୨ବିପି୨୩୨୪) ପ୍ଲେଟ ମିଳିଛି। ଅର୍ଚ୍ଚନାଙ୍କ ନାଁରେ ଏହି କାର୍ ପଞ୍ଜୀକୃତ ହୋଇଛି। ତେବେ ଉକ୍ତ ଏଣ୍ଡେଭର କାର୍କୁ ମଞ୍ଚେଶ୍ୱର ଶିଳ୍ପାଞ୍ଚଳର ଏକ ଘରୋଇ କଲେଜ ସମ୍ମୁଖରେ କିଏ ରଖିଲା ତାକୁ ନେଇ ରହସ୍ୟ ସୃଷ୍ଟି ହୋଇଛି। ଅର୍ଚ୍ଚନାଙ୍କ କେହି ଘନିଷ୍ଠ ସହଯୋଗୀ ଉକ୍ତ କାର୍ ରଖିଥାଇପାରନ୍ତି ବୋଲି ଅନୁମାନ କରାଯାଉଛି। କିଛି ସହଯୋଗୀ ବାହାରେ ରହି ଅର୍ଚ୍ଚନାଙ୍କୁ ସହଯୋଗ କରୁଥିବା ଏଥିରୁ ସ୍ପଷ୍ଟ ହୋଇଛି।
ଅପରପକ୍ଷରେ ଅର୍ଚ୍ଚନା ଓ ଜଗବନ୍ଧୁଙ୍କ ଆକାଉଣ୍ଟରେ ୨୦୧୭ରୁ ୨୦୨୨ ମଧ୍ୟରେ ଅଢ଼େଇ କୋଟି ଟଙ୍କା ଜମା ହୋଇଥିବା ଇଡି ଜାଣିବାକୁ ପାଇଛି। ଜମା ହୋଇଥିବା ଟଙ୍କାରେ ଦାମୀ କାର୍ କିଣାଯାଇଥିବା କୁହାଯାଉଛି। ନାଗ-ଚାନ୍ଦ ଦମ୍ପତିଙ୍କ ଆକାଉଣ୍ଟକୁ ଟଙ୍କା ପଠାଇଥିବା ୧୨ରୁ ଊର୍ଦ୍ଧ୍ୱ ବ୍ୟକ୍ତିଙ୍କ ବିଷୟରେ ଇଡି ପ୍ରମାଣ ପାଇଛି। ତେଣୁ ସେହି ବ୍ୟକ୍ତିମାନଙ୍କୁ ନୋଟିସ୍ କରି ଆର୍ଥିକ ନେଣଦେଣ କାରବାର ସଂକ୍ରାନ୍ତରେ ଇଡି ଖୋଳତାଡ଼ କରୁଛି। ନୋଟିସ୍ ତାଲିକାରେ ଚଳଚ୍ଚିତ୍ର ପ୍ରଯୋଜକ ଅକ୍ଷୟ ପରିଜା, ଫୋର୍ଡ ଶୋ’ରୁମ୍ ମାଲିକ, ରାଜନେତା ଏବଂ ପରିବାର ସଦସ୍ୟ ଆଦି ଅଛନ୍ତି। ଏହା ଭିତରେ ଫୋର୍ଡ ଶୋ’ରୁମ୍ ମାଲିକଙ୍କ ପୁଅ ଓ ଅର୍ଚ୍ଚନାଙ୍କ ବାପା ସୁରେନ୍ଦ୍ର ନାଗଙ୍କୁ ଇଡି ଜେରା କରିଛି। ଅକ୍ଷୟ ପରିଜା ଇଡି ଅଫିସ ଆସି ନ ଥିଲେ ସୁଦ୍ଧା ତାଙ୍କ ଓକିଲ ପଠାଇଥିଲେ। ସବୁଠୁ ବଡ଼କଥା ହେଲା ୨ ଆଇଏଏସ୍ ଅଧିକାରୀ ମଧ୍ୟ ନୋଟିସ୍ ପାଇଛନ୍ତି। ଉଭୟ ଖୁବ୍ଶୀଘ୍ର ଇଡି କାର୍ଯ୍ୟାଳୟରେ ଜେରାର ସମ୍ମୁଖୀନ ହେବେ। ସେମାନେ ଅର୍ଚ୍ଚନାଙ୍କୁ କେତେ ଟଙ୍କା ଏବଂ କ’ଣ ପାଇଁ ଦେଇଛନ୍ତି ତାହାର ତଥ୍ୟ ରଖିବେ। ସେପଟେ ଜେଲ ମାନୁଆଲ ଅନୁଯାୟୀ, ଜଗବନ୍ଧୁ ଓ ଅର୍ଚ୍ଚନା ପ୍ରତି ସପ୍ତାହରେ ରବିବାର ଭେଟିବା ନିଷ୍ପତ୍ତି ଅନୁଯାୟୀ ପୁଣିଥରେ ଝାରପଡ଼ା ଜେଲରେ ଉଭୟ ଭେଟ ହୋଇ କଥାବାର୍ତ୍ତା ହେବା ସହ ପରସ୍ପରକୁ ସାନ୍ତ୍ୱନା ଦେଇଛନ୍ତି।
