ସୋନପୁର,୧୪।୧୧(ନି.ପ୍ର.): ସୁବର୍ଣ୍ଣପୁର ଜିଲା ଖାଉଟି ବିବାଦ ସମାଧାନ ମଞ୍ଚ ଏକ ମାମଲାର ବିଚାର କରି ଡିଟିଡିସି କୋରିଅର କମ୍ପାନୀ ବିରୋଧରେ ଓ ଖାଉଟିଙ୍କ ସପକ୍ଷରେ ଗୁରୁତ୍ୱପୂର୍ଣ୍ଣ ରାୟ ପ୍ରଦାନ କରିଛନ୍ତି। ସୋନପୁର ସହର ମାଲିପଡାର ଖାଉଟି ମାଧବ ମହଲାଙ୍କୁ ଡିଟିଡିସି କମ୍ପାନୀ ହଜି ଯାଇଥିବା ମୋବାଇଲର ମୂଲ୍ୟ ସହିତ କ୍ଷତିପୂରଣ ବାବଦକୁ ୬୫ ହଜାର ଟଙ୍କା ପ୍ରଦାନ କରିବ। ଦୁଇମାସ ଭିତରେ ଖାଉଟିଙ୍କୁ ଉକ୍ତ ଅର୍ଥ ପ୍ରଦାନ ନ କଲେ କମ୍ପାନୀ ୧୦ପ୍ରତିଶତ ସୁଧ ସହିତ ଅର୍ଥ ପ୍ରଦାନ କରିବ ବୋଲି ରାୟରେ ଉଲ୍ଲେଖ ରହିଛି।
ମାଧବ ଏକ ପାର୍ସଲରେ(ଆଇ ଫୋନ ମୋବାଇଲ) ଯାହାର ମୂଲ୍ୟ ୪୩ ହଜାର ଟଙ୍କା ଡିଟିଡିସି କୋରିଅର ଜରିଆରେ ନୂଆଦିଲ୍ଳୀ ସ୍ଥିତ ବନ୍ଧୁଙ୍କ ନିକଟକୁ ପଠାଇଥିଲେ। ପାର୍ସଲ ପଠାଇବା ସମୟରେ ମାଧବ ଉପଯୁକ୍ତ ମୂଲ୍ୟ ଦେବା ସହିତ ସଠିକ୍ ଠିକଣା ଉଲ୍ଲେଖ କରିଥିଲେ। ତେବେ ଉକ୍ତ ପାର୍ସଲ ପଠାଯାଇଥିବା ବ୍ୟକ୍ତିଙ୍କ ନିକଟରେ ପହଞ୍ଚି ନ ଥିଲା କିମ୍ବା ପାର୍ସଲ ପଠାଇଥିବା ମାଧବଙ୍କ ନିକଟକୁ ଫେରସ୍ତ ହୋଇ ନ ଥିଲା। କୋରିଅର କମ୍ପାନୀର ଅବହେଳାରୁ ପାର୍ସଲଟି ବାଟମାରଣା ହୋଇଯାଇଥିଲା। ଏନେଇ ମାଧବ କୋରିଅର ସେବା କମ୍ପାନୀ ବିରୋଧରେ ସୁବର୍ଣ୍ଣପୁର ଜିଲା ଖାଉଟି ବିବାଦ ସମାଧାନ ମଞ୍ଚରେ ଅଭିଯୋଗ କରିଥିଲେ। ଖାଉଟି ବିବାଦ ମଞ୍ଚ ସଭାପତି ଉପାନନ୍ଦ ପୁରୋହିତ ଓ ସଭ୍ୟ ହଳଧର ପଧାନ ତ୍ୱରିତ ବିଚାର କରି ଡିଟିଡିସି କୋରିଅର କମ୍ପାନୀ ସେବା ଯୋଗାଇବାରେ ଅବହେଳା କରି ଥିବାରୁ ଖାଉଟିଙ୍କ ସପକ୍ଷରେ ଉପରୋକ୍ତ ରାୟ ପ୍ରଦାନ କରିଛନ୍ତି। ଅଭିଯୋଗକାରୀଙ୍କ ପକ୍ଷରୁ ଆଇନଜୀବୀ ହେମନ୍ତ କୁମାର ସା ମାମଲା ପରିଚାଳନା କରୁଥିଲେ ।
