ଚଣ୍ଡିଗଡ଼,୨୨ା୧୦: ଆମ୍ ଆଦ୍ମୀ ପାର୍ଟି (ଏଏପି) ସରକାର ପଞ୍ଜାବର ସରକାରୀ କର୍ମଚାରୀମାନଙ୍କ ଲାଗି ଦିଓ୍ବାଲି ଭେଟି ସ୍ବରୂପ ପୁରୁଣା ପେନ୍ସନ ଯୋଜନା ପୁନର୍ବାର କାର୍ଯ୍ୟକାରୀ କରିବାକୁ ଶୁକ୍ରବାର ନିଷ୍ପତ୍ତି ନେଇଛନ୍ତି। ଏନେଇ ରାଜ୍ୟ କ୍ୟାବିନେଟରେ ନୀତିଗତ ନିଷ୍ପତ୍ତି ନିଆଯାଇଥିବା ମୁଖ୍ୟମନ୍ତ୍ରୀ ଭଗଓ୍ବନ୍ତ ମାନ୍ ଘୋଷଣା କରିଛନ୍ତି। ପୁରୁଣା ପେନ୍ସନ ଯୋଜନା ଲାଗୁ ହେଲେ ରାଜ୍ୟର ଲକ୍ଷାଧିକ କର୍ମଚାରୀ ଉପକୃତ ହେବେ। କର୍ମଚାରୀମାନଙ୍କୁ ପୁରୁଣା ପେନ୍ସନ ଯୋଜନାରେ ସାମିଲ ହେବା ଲାଗି ବିକଳ୍ପ ଦିଆଯିବ। ୨୦୦୪ରୁ ବନ୍ଦ ରହିଥିବା ପୁରୁଣା ପେନ୍ସନ ଯୋଜନାକୁ ପୁନର୍ବାର ଲାଗୁ କରିବା ସରକାରୀ କର୍ମଚାରୀମାନଙ୍କର ବଡ଼ ଦାବି ରହିଥିଲା। ପଞ୍ଜାବରେ ଏଏପିି କ୍ଷମତାକୁ ଆସିଲେ ଉକ୍ତ ଯୋଜନା ପୁନର୍ବାର ଲାଗୁ ହେବ ବୋଲି ଗତବର୍ଷ ଅଗଷ୍ଟରେ ଦଳର ବରିଷ୍ଠ ନେତା ତଥା ବର୍ତ୍ତମାନର ଅର୍ଥମନ୍ତ୍ରୀ ହରପାଲ ସିଂ ଚିମା ପ୍ରତିଶ୍ରୁତି ଦେଇଥିଲେ। ପଞ୍ଜାବ ସରକାରଙ୍କ ନିଷ୍ପତ୍ତିକୁ ଦିଲ୍ଲୀ ମୁଖ୍ୟମନ୍ତ୍ରୀ ତଥା ଏଏପି ଆବାହକ ଅରବିନ୍ଦ କେଜ୍ରିଓ୍ବାଲ ସ୍ବାଗତ କରିଛନ୍ତି। ଗୁଜରାଟ ଓ ହିମାଚଳପ୍ରଦେଶରେ ଦଳ କ୍ଷମତାକୁ ଆସିଲେ ପୁରୁଣା ପେନ୍ସନ ଯୋଜନା ଲାଗୁ ହେବ ବୋଲି ସେ ପ୍ରତିଶ୍ରୁତି ଦେଇଛନ୍ତି।
