ପୁରୀ ଅଫିସ,୧୮ା୧୦:ବୃନ୍ଦାବତୀ ନିବାସରେ ସୋମବାର ସନ୍ଧ୍ୟାରେ ଅଭାବନୀୟ ଘଟଣା ଘଟିଛି। ୩ଜଣ ହବିଷିଆଳି ଶ୍ରୀମନ୍ଦିରରୁ ଦାରୁଦିଅଁଙ୍କ ଦର୍ଶନ ସାରି ବୃନ୍ଦାବତୀ ନିବାସକୁ ଫେରିବାବେଳେ ଲିଫ୍ଚରେ ଫସିଯାଇଥିଲେ। ଅଧଘଣ୍ଟାରୁ ଊର୍ଦ୍ଧ୍ୱ ସମୟ ଧରି ୩ଜଣ ହବିଷିଆଳି ବନ୍ଦ ଲିଫ୍ଟ ଭିତରେ ଫସି ରହିଥିଲେ। ସେମାନଙ୍କ କାନ୍ଦବୋବାଳି ଶୁଣିବା ପରେ ରେଡକ୍ରସ କର୍ମଚାରୀମାନେ ଲିଫ୍ଟ ଭିତରେ କେହି ଫସି ରହିଥିବା ଜାଣିପାରିଥିଲେ। ଏହାପରେ ଲିଫ୍ଟ କର୍ମଚାରୀଙ୍କ ସହଯୋଗରେ ମାଷ୍ଟର ଚାବି ଯୋଗେ ଲିଫ୍ଟକୁ ତଳକୁ ଅଣାଯାଇ ୩ ହବିଷିଆଳିଙ୍କୁ ଉଦ୍ଧାର କରାଯାଇଥିଲା। ତେବେ ନୟାଗଡ଼ ନିବାସୀ କୁନି ଆଚାର୍ଯ୍ୟ ଅଚେତ ହୋଇଯାଇଥିଲେ। ଅସୁସ୍ଥ ଅବସ୍ଥାରେ ତାଙ୍କୁ ବୃନ୍ଦାବତୀ ନିବାସର ଅସ୍ଥାୟୀ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରକୁ ନିଆଯାଇଥିଲା। ପରେ ଅତିରିକ୍ତ ଜିଲା ସ୍ବାସ୍ଥ୍ୟ ଅଧିକାରୀ ବିରଜା ଶଙ୍କର ରଥ ତାଙ୍କ ସ୍ବାସ୍ଥ୍ୟ ପରୀକ୍ଷା କରିଥିଲେ। କୁନି ଭୟଭୀତ ହେବା କାରଣରୁ ତାଙ୍କର ସ୍ନାୟୁକ୍ରିୟା ସାମାନ୍ୟ ପ୍ରଭାବିତ ହୋଇଥିଲା। ତେବେ ଖୁବ୍ କମ୍ ସମୟ ମଧ୍ୟରେ ସ୍ବାସ୍ଥ୍ୟାବସ୍ଥା ସ୍ବାଭାବିକ ହୋଇଥିଲା ବୋଲି ଅତିରିକ୍ତ ଚିକିତ୍ସାଧିକାରୀ କହିଥିଲେ। ଜିଲାପାଳ ସମର୍ଥ ବର୍ମା ଏବଂ ଉପଜିଲାପାଳ ଭବତାରଣ ସାହୁ ଘଟଣାସ୍ଥଳରେ ପହଞ୍ଚି ଅସୁସ୍ଥ ହବିଷିଆଳି ଓ ବୃନ୍ଦାବତୀ ନିବାସର କର୍ତ୍ତୃପକ୍ଷଙ୍କ ସହ ଆଲୋଚନା କରିଥିଲେ।
ଘଟଣା ଅନୁଯାୟୀ, ଶ୍ରୀମନ୍ଦିରରୁ ଦର୍ଶନ ସାରି ଫେରିବା ପରେ ହବିଷିଆଳିମାନେ ବୃନ୍ଦାବତୀ ନିବାସ ଲିଫ୍ଟ ପାଖରେ ପହଞ୍ଚିଥିଲେ। ବୃନ୍ଦାବତୀ ନିବାସରେ ଥିବା ସମସ୍ତ ୬ଟି ଲିଫ୍ଟରେ ସୁରକ୍ଷାକର୍ମୀ ମୁତୟନ ରହିଛନ୍ତି। ହବିଷିଆଳିମାନଙ୍କୁ ଲିଫ୍ଟ ଯୋଗେ ନେବା ଆଣିବା କରିବା ଦାୟିତ୍ୱ ସୁରକ୍ଷାକର୍ମୀଙ୍କ ଉପରେ ନ୍ୟସ୍ତ ହୋଇଥାଏ। ତେବେ ସୁରକ୍ଷାକର୍ମୀ ପରିସ୍ରା କରିବାକୁ ଯାଇଥିବାବେଳେ ୩ ଜଣ ହବିଷିଆଳି ତାଙ୍କୁ ଅପେକ୍ଷା ନ କରି ପଛ ପଟ ଲିଫ୍ଟ ମଧ୍ୟକୁ ଚାଲିଯାଇ ସୁଇଚ ମାରିଥିଲେ। ତେବେ ମନଇଚ୍ଛା ସୁଇଚ ମାରିବା ଫଳରେ ଲିଫ୍ଟ ଅଧାରେ ଅଟକି ଯାଇଥିଲା। ଏହାପରେ ଲିଫ୍ଟ ଭିତରୁ ହବିଷିଆଳିମାନେ ଚିତ୍କାର କରିଥିଲେ। ସେମାନଙ୍କ ଚିତ୍କାର ଶୁଣି ବୃନ୍ଦାବତୀ ନିବାସ ଦାୟିତ୍ୱରେ ଥିବା ଅଧିକାରୀମାନେ ଘଟଣାସ୍ଥଳରେ ପହଞ୍ଚି ଲିଫ୍ଟ ମ୍ୟାନ୍ଙ୍କ ସହ ଯୋଗାଯୋଗ କରିଥିଲେ। ଲିଫ୍ଟ ମ୍ୟାନ ମାନୁଆଲି ମାଷ୍ଟର କି’ ଯୋଗେ ଲିଫ୍ଟକୁ ଖୋଲିବାପରେ ହବିଷିଆଳିମାନଙ୍କୁ ଉଦ୍ଧାର କରାଯାଇଥିଲା। ତେବେ ହବିଷିଆଳିମାନେ ବାହାରକୁ ଆସିବା ପରେ ଜଣେ ଅସୁସ୍ଥ ହୋଇପଡ଼ିଥିବାବେଳେ ଅନ୍ୟ ଦୁଇଜଣ ସ୍ବାଭାବିକ ସ୍ଥିତିରେ ରହିଥିଲେ। ସେମାନଙ୍କୁ ଗ୍ଲୁକୋଜ ପିଇବାକୁ ଦିଆଯାଇଥିଲା। ଏ ନେଇ ଉପଜିଲାପାଳ ଭବତାରଣ ସାହୁ କହିଛନ୍ତି, ହବିଷିଆଳିମାନେ ଲିଫ୍ଟ ପରିଚାଳନା ସମ୍ପର୍କରେ ଜାଣି ନ ଥିବାରୁ ସୁରକ୍ଷାକର୍ମୀଙ୍କୁ ଏହି ଦାୟିତ୍ୱ ଦିଆଯାଇଛି। କମ୍ ସମୟ ପାଇଁ ସୁରକ୍ଷାକର୍ମୀ ନ ରହିବା ସମୟରେ ହବିଷିଆଳିମାନେ ଲିଫ୍ଟରେ ଚଢ଼ିଯାଇଥିଲେ। ତେବେ ସୁରକ୍ଷାକର୍ମୀଙ୍କୁ ଅଧିକ ସତର୍କ ଓ ଦାୟିତ୍ୱବାନ ହୋଇ କାର୍ଯ୍ୟ କରିବା ପାଇଁ ନିର୍ଦ୍ଦେଶ ଦିଆଯାଇଛି।
