ବଣାଇ,୧୩।୧୦(ସ୍ବ.ପ୍ର.): ସୁନ୍ଦରଗଡ଼ ଜିଲା ବଣାଇ ବନଖଣ୍ଡ ଅଞ୍ଚଳରେ ଦୀର୍ଘଦିନ ହେବ ଦୁଇଟି ଦନ୍ତା ତାଣ୍ଡବ ରଚି ଅନେକ ଫସଲ ନଷ୍ଟ କରିବା ସହ ବହୁ ଘର ଭାଙ୍ଗି ଆତଙ୍କ ଖେଳାଉଛନ୍ତି। ମୁଖ୍ୟତଃ ହାତୀ ଦୁଇଟି ବଣାଇ ଓ କୁଳିପୋଷ ବନାଞ୍ଚଳରେ ଘୁରି ବୁଲୁଥିବା ବେଳେ ଏଭଳି ଘଟଣାକୁ ବନବିଭାଗ ହାଲୁକା ଭାବେ ଗ୍ରହଣ କରିବା ବର୍ତ୍ତମାନ ଅସନ୍ତୋଷ ଦେଖାଦେଇଛି।
ଅଞ୍ଚଳରେ ଏକର ଏକର ଧାନ ଫସଲ ନଷ୍ଟ କରିବା ସହିତ ବ୍ୟାପକ ଘର ଭାଙ୍ଗି ଥିବା ଏହି ଦୁଇ ହାତୀ ଏବେ କୁଳିପୋଷ ରେଞ୍ଜର ଶବରା ବନାଞ୍ଚଳରେ ଉତ୍ପାତ ଚଳାଇଛନ୍ତି। ଜଙ୍ଗଲ ଛାଡି ଗାଁ ମୁହାଁ ହୋଇ ତାଣ୍ଡବ କରୁଥିବା ହାତୀଙ୍କ ପାଇଁ ଆତଙ୍କିତ ଅଞ୍ଚଳବାସୀ ଘଉଡାଇବା ପାଇଁ ଏବେ ଆକ୍ରମଣାତ୍ମକ ହୋଇ ପଡିଛନ୍ତି। ଅତିଷ୍ଠ ହୋଇ ଲୋକେ ହାତୀଙ୍କୁ କିଏ ପଥର ମାରୁଛି ତ କିଏ ବର୍ଚ୍ଛା ଆଉ କେହିବାଟୁଳିରେ ଆକ୍ରମଣ କରୁଥିବା ଦେଖିବାକୁ ମିଳିଛି।
ଏପରିକି ହାତୀକୁ ଅନ୍ୟତ୍ର ନେବାକୁ ଦାବିକରି ବନ କର୍ମଚାରୀଙ୍କୁ ନିକଟ ଅତୀତରେ ଆକ୍ରମଣ ମଧ୍ୟ ହୋଇଥିଲା। ସେହିଭଳି ଗତ କିଛି ଦିନ ତଳେ ବାଙ୍କୀ ରେଞ୍ଜରେ ହାତୀ ଉପଦ୍ରବରେ ଅତିଷ୍ଠ ହୋଇ କିଛି ଲୋକ ଏକ ହାତୀକୁ ବର୍ଚ୍ଛା ଦ୍ୱାରା ମାରି ଗିରଫ ହୋଇଥିବା ଘଟଣା ନଜିର ରହିଛି। ବନବିଭାଗର ଅପାରଗତା ପାଇଁ ଏବେ ହାତୀ ଦ୍ୱୟଙ୍କ ଜୀବନ ବିପଦରେ ପଡିଛି। ଏନେଇ ଘଟଣା ସମ୍ପର୍କରେ ଜାଣିବା ପାଇଁ ଯୋଗାଯୋଗ କରାଯାଇଥିଲେ ମଧ୍ୟ ବନ ବିଭାଗର ପ୍ରତିକ୍ରିୟା ମିଳି ପାରିନାହିଁ।
