ସାରସକଣା,୧ା୧୦(ଡି.ଏନ୍.ଏ.): ମୟୂରଭଞ୍ଜ ଜିଲା ସାରସକଣା ବ୍ଲକ ପୋଖରିଡିହା ପଞ୍ଚାୟତରେ ଛତୁଆରେ ଅପମିଶ୍ରଣ କରାଯାଉଥିବା ନେଇ ଛତୁଆ ବାଣ୍ଟିବାକୁ ଆସିଥିବା ଗାଡ଼ିକୁ ଅଟକାଇ ରଖିଥିଲେ ଗ୍ରାମବାସୀ।
ପ୍ରକାଶଥାଉ କି,ସେପ୍ଟେମ୍ବର ୧୪ରେ ସାରସକଣା ପଞ୍ଚାୟତ ସମିତି ବୈଠକରେ ଛତୁଆରେ ଅପମିଶ୍ରଣ କରାଯାଇ ଶିଶୁମାନଙ୍କୁ ଅଖାଦ୍ୟ ଦିଆଯାଉଥିବା ନେଇ ସରପଞ୍ଚ ଓ ସମିତିସଭ୍ୟମାନେ ଅଭିଯୋଗ କରିଥିଲେ ଏବଂ ଏହାର ନମୁନା ଜିଲା ଅଧିକାରୀଙ୍କୁ ପଠାଯାଇଥିବା ନେଇ ଅଭିଯୋଗକାରୀ ଏବଂ ବିଡିଓ କରୁଣାକର ଧିଣ୍ଡା ପ୍ରକାଶ କରିଥିଲେ। ତେବେ ଶନିବାର ଛତୁଆ ବଣ୍ଟନ ପାଇଁ ଆସିଥିବା ଗାଡ଼ିକୁ ପୋଖରିଡିହା ସରପଞ୍ଚ କାଳିପଦ ସିଂଙ୍କ ସହିତ ଗ୍ରାମବାସୀ ଅଟକାଇ ଛତୁଆ ବାଣ୍ଟିବା ନେଇ ଅଭିଯୋଗ କରିଥିଲେ । ସରପଞ୍ଚଙ୍କ କହିବା ଅନୁଯାୟୀ, ପୂର୍ବ ବୈଠକରେ ପ୍ରମାଣ ସହିତ ଛତୁଆରେ ଅପମିଶ୍ରଣ କରାଯିବା ନେଇ ଆଲୋଚନା ହୋଇଥିଲା ମାତ୍ର ଅଭିଯୋଗକୁ ହେୟଜ୍ଞାନ କରି ଘଟଣାର ଯାଞ୍ଚ ପ୍ରକ୍ରିୟା ସରିବା ପୂର୍ବରୁ ପୁଣି ସେହି ଏସ୍.ଏଚ୍.ଜି.କୁ ବଣ୍ଟନ କରିବାକୁ ନେଇ ଗ୍ରାମବାସୀ ଓ ସରପଞ୍ଚ ନିନ୍ଦା କରିଥିଲେ। ତେବେ ଏନେଇ ବିଧାୟକ ଡା.ବୁଢାନ ମୁର୍ମୁଙ୍କୁ ପଚାରିବାରୁ କହିଥିଲେ, ଯେ ସିଡିପିଓ ଫୋନ୍ ଯୋଗେ ଛତୁଆ ବଣ୍ଟନ କରିବାକୁ ଦିଆଯାଉ ବୋଲି ତାଙ୍କୁ ଅନୁମତି ମାଗିଥିଲେ ମାତ୍ର ବିଧାୟକ ମନା କରିଥିଲେ। ସିଡିପିଓ ଭାନୁମତୀ ବେହେରାଙ୍କୁ ପଚାରିବାରୁ ସେ କହିଥିଲେ, ଭୁବନେଶ୍ବରସ୍ଥିତ ପରୀକ୍ଷାଗାରକୁ ନମୁନା ପରୀକ୍ଷା ପାଇଁ ପଠାଯାଇଛି ଏବଂ ନମୁନାର ରିପୋର୍ଟ ଆସିନାହିଁ ଏବଂ କେବେ ଆସିବ ଜଣାନାହିଁ , ସେତେଦିନ ପର୍ଯ୍ୟନ୍ତ କ’ଣ ଛୁଆମାନଙ୍କ ଖାଦ୍ୟ ବନ୍ଦ କରିହେବ। ଯେପର୍ଯ୍ୟନ୍ତ ଅଖାଦ୍ୟ ବୋଲି ପରୀକ୍ଷାଗାରରୁ ଆସିନାହିଁ ତାକୁ ତ ଖାଦ୍ୟରେ ଗଣାଯିବ। ମହିଳା ଓ ଶିଶୁ ବିକାଶ ମନ୍ତ୍ରୀ ଶ୍ରୀମତୀ ବାସନ୍ତୀ ହେମ୍ବ୍ରମଙ୍କୁ ପଚାରିବାରୁ ସେ କହିଥିଲେ, ମୁଁ ତ ଘଟଣା ବାବଦରେ ଜାଣି ନ ଥିଲି, ତେବେ ଛତୁଆକୁ ନେଇ ଲୋକଙ୍କ କୌଣସି ଅଭିଯୋଗ ରହିଥିଲେ ମନ୍ତ୍ରୀଙ୍କ ଅଫିସକୁ ଏବଂ ଜିଲାପାଳଙ୍କୁ ଅଭିଯୋଗ ପତ୍ର ପଠାଇଲେ ତଦନ୍ତ କରାଯାଇ ନିଶ୍ଚୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଖବର ପାଇ ସବ୍ଇନ୍ସପେକ୍ଟର ମୋନାଲିସା ବେହେରା ଘଟଣାସ୍ଥଳରେ ପହଞ୍ଚି ସ୍ଥାନୀୟ ଲୋକଙ୍କ ସହିତ ବୁଝାଶୁଝା କରିଥିଲେ। ତେବେ ସମସ୍ତ ଘଟଣା ବାବଦରେ ଜିଲା କଲ୍ୟାଣ ଅଧିକାରିଣୀ କୁସୁମମାଳା ମିଶ୍ର ଏବଂ ଖାଦ୍ୟ ଯୋଗାଣ ନିରୀକ୍ଷକ ସଂଯୁକ୍ତା ହେମ୍ବ୍ରମଙ୍କୁ ବାରମ୍ବାର ଯୋଗାଯୋଗ ପରେ ସୁଦ୍ଧା ଫୋନ୍ର ଉତ୍ତର ଦେଇ ନ ଥିଲେ।
