ଭୁବନ, ୧୦।୯(ଡି.ଏନ୍.ଏ.): ଗଣେଶ ପୂଜା ଭସାଣିକୁ କେନ୍ଦ୍ରକରି ଢେଙ୍କାନାଳ ଜିଲା ଭୁବନ ଥାନା ଓଡ଼ିଶ ଗ୍ରାମରେ ସୃଷ୍ଟି ହୋଇଥିବା ସବର୍ଣ୍ଣ-ଅସବର୍ଣ୍ଣ ବିବାଦର ସମାଧାନ ପାଇଁ ଉଦ୍ୟମ ଆରମ୍ଭ ହୋଇଛି। ଗ୍ରାମରେ ସ୍ବାଭାବିକ ସ୍ଥିତି ଫେରାଇ ଆଣିବା ଲାଗି ପୋଲିସ ପ୍ରଶାସନ ଅଣ୍ଟା ଭିଡ଼ିଛି। ସବର୍ଣ୍ଣମାନେ ଯାତାୟାତ କରୁଥିବା ରାସ୍ତାକୁ ବିପକ୍ଷ ଗୋଷ୍ଠୀ କାଟି ଦେଇଥିବାବେଳେ ଥାନାଧିକାରୀ ସୌଭାଗ୍ୟ କୁମାର ସ୍ବାଇଁଙ୍କ ନେତୃତ୍ୱରେ ଥାନାର କର୍ମଚାରୀମାନେ ଶୁକ୍ରବାର ଏହାର ମରାମତି କରିଛନ୍ତି। କୌଣସି ପ୍ରକାର ଅପ୍ରୀତିକର ପରିସ୍ଥିତି ଏଡ଼ାଇବାକୁ ଗ୍ରାମରେ ପୋଲିସ ମୁତୟନ କରାଯାଇଛି। ଶାନ୍ତି ଫେରାଇ ଆଣିବା ଲାଗି ଖୁବ୍ଶୀଘ୍ର ଏକ ଶାନ୍ତି କମିଟି ଗଠନ କରାଯିବ ବୋଲି ଥାନାଧିକାରୀ ସୂଚନା ଦେଇଛନ୍ତି।
ପୋଲିସ ସୂଚନା ଅନୁଯାୟୀ, ଗତ ମଙ୍ଗଳବାର ଅସବର୍ଣ୍ଣ ଗୋଷ୍ଠୀର ଗଣେଶ ପୂଜା ଭସାଣି ଚାଲିଥିବାବେଳେ ମେଢ଼ ଜଣେ ସବର୍ଣ୍ଣ ପରିବାରର ଘରେ ଲାଗିଯାଇଥିଲା। ତୀବ୍ର ଶବ୍ଦଯୁକ୍ତ ଡିଜେକୁ ନେଇ ଉଭୟ ଗୋଷ୍ଠୀ ମୁହଁାମୁହିଁ ହେବା ଫଳରେ ୬ଜଣ ଗୁରୁତର ହୋଇ ଚିକିତ୍ସାଳୟରେ ଭର୍ତ୍ତି ହୋଇଥିଲେ। ସବର୍ଣ୍ଣଙ୍କ ପକ୍ଷରୁ ନଂ. ୩୬୩/୨୨ ଏବଂ ଅସବର୍ଣ୍ଣ ଗୋଷ୍ଠୀ ତରଫରୁ ନଂ. ୩୬୫/୨୨ରେ ଏକ ମାମଲା ରୁଜୁ ହୋଇଥିଲା। ଉଭୟ ପକ୍ଷର ୧୦ରୁ ଊର୍ଦ୍ଧ୍ୱ ଜଣଙ୍କ ନାମରେ ମାମଲା ରୁଜୁ ହୋଇଥିଲା। ଇତିମଧ୍ୟରେ ଅସବର୍ଣ୍ଣ ଗୋଷ୍ଠୀ ସବର୍ଣ୍ଣମାନେ ଯାତାୟାତ କରୁଥିବା ରାସ୍ତାକୁ କାଟି ଦେଇଥିଲେ। ଏ ନେଇ ଗ୍ରାମରେ ଉତ୍ତେଜନା ବଢ଼ି ଅଶାନ୍ତ ପରିବେଶ ସୃଷ୍ଟି ହୋଇଥିବାବେଳେ ଶୁକ୍ରବାର ଥାନାଧିକାରୀ ଗ୍ରାମରେ ପହଞ୍ଚତ୍ ପୃଥକ୍ ବୈଠକ କରିଛନ୍ତି। ଭାଇଚାରା ଓ ଶାନ୍ତିପୂର୍ଣ୍ଣ ବାତାବରଣ ଫେରାଇ ଆଣିବାକୁ ସମସ୍ତଙ୍କୁ ନିବେଦନ କରାଯାଇଛି। ପୋଲିସ କର୍ମଚାରୀମାନେ ରାସ୍ତା ମରାମତି କରିଛନ୍ତି। ସବର୍ଣ୍ଣ-ଅସବର୍ଣ୍ଣ ବିବାଦର ସମାଧାନ ପାଇଁ ପୋଲିସ ପ୍ରଶାସନର ଏଭଳି ଉଦ୍ୟମକୁ ବିଭିନ୍ନ ମହଲରେ ପ୍ରଶଂସା କରାଯାଇଛି।
