ବ୍ରହ୍ମପୁର ଅଫିସ,୨ା୯: ବ୍ରହ୍ମପୁରରେ କ୍ରମଶଃ ନୂଆସାହି ବସ୍ତି ସାଙ୍ଗକୁ ଜନସଂଖ୍ୟା ବଢ଼ି ଚାଲିଛି। ଏହାସହ ଛାତ୍ରୀଛାତ୍ରଙ୍କ ସଂଖ୍ୟା ମଧ୍ୟ ବୃଦ୍ଧି ପାଇବାରେ ଲାଗିଛି। ରେଶମ ନଗରୀରେ ଶତାଧିକ ସରକାରୀ ଓ ଘରୋଇ ଶିକ୍ଷାନୁଷ୍ଠାନ ରହିଛି। ତେବେ ବେସରକାରୀ ସ୍କୁଲଗୁଡିକରେ ମାତ୍ରାଧିକ ଫି ନେଇ ଶୋଷଣ କରାଯାଉଥିବା ବେଳେ ସରକାରୀ ଶିକ୍ଷାନୁଷ୍ଠାନରେ ଗୁଣାତ୍ମକ ଶିକ୍ଷାଦାନ ହେଉନଥିବା ଅନେକ ଅଭିଭାବକଙ୍କ ପକ୍ଷରୁ ବହୁବାର ଅଭିଯୋଗ ହୋଇଛି। କେଉଁ ଆବାହମାନ କାଳରୁ ମହାନଗରରେ ମାତ୍ର ଗୋଟିଏ କେନ୍ଦ୍ରୀୟ ବିଦ୍ୟାଳୟ ଅଛି। ସେଠାରେ ପ୍ରଥମରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ପାଠ ପଢ଼ା ବ୍ୟବସ୍ଥା ରହିଛି। କେନ୍ଦ୍ରୀୟ ଶିକ୍ଷାନୁଷ୍ଠାନରେ ଉନ୍ନତମାନର ଶିକ୍ଷାଦାନ ଯୋଗୁ ପିଲାଙ୍କ ଆଗ୍ରହ ବଢ଼ୁଛି। ତେଣୁ ଦ୍ୱିତୀୟ କେନ୍ଦ୍ରୀୟ ବିଦ୍ୟାଳୟ ପ୍ରତିଷ୍ଠା ନିମନ୍ତେ ବିଭିନ୍ନ ମହଲରୁ ଦାବି କରାଯାଇଛି।
କେନ୍ଦ୍ର ଏନଡିଏ ସରକାରରେ ଧର୍ମେନ୍ଦ୍ର ପ୍ରଧାନ ଶିକ୍ଷା ମନ୍ତ୍ରୀ ହୋଇଛନ୍ତି। ତେଣୁ ବ୍ରହ୍ମପୁରରେ ଦ୍ୱିତୀୟ କେନ୍ଦ୍ରୀୟ ବିଦ୍ୟାଳୟ ସ୍ଥାପନ ଲାଗି ପଦକ୍ଷେପ ନେବାର ଲୋକେ ଆଶା କରିଛନ୍ତି। ଅନ୍ୟପକ୍ଷରେ ଚିକିଟି ନିର୍ବାଚନ ମଣ୍ଡଳୀର ପାତ୍ରପୁର ବ୍ଲକରେ ଅନେକ ଉପାନ୍ତ ଅଞ୍ଚଳ ରହିଛି। ଆଦିବାସୀ ଓ ଅନୁସୂଚିତ ଜାତିର ପିଲାଙ୍କୁ ଉନ୍ନତମାନର ଶିକ୍ଷାଦାନ ପାଇଁ ସେହି ବ୍ଲକରେ ମଧ୍ୟ କେନ୍ଦ୍ରୀୟ ବିଦ୍ୟାଳୟ ପ୍ରତିଷ୍ଠା କରାଯିବାକୁ ଗୁରୁତ୍ୱ ଦିଆଯାଇଛି। ଜିଲାର ଭାଜପା ନେତାମାନେ ମନ୍ତ୍ରୀଙ୍କ ଉପରେ ଚାପ ପକଇ କାର୍ଯ୍ୟକାରୀ କରିବାକୁ ମତ ପ୍ରକାଶ ପାଇଛି। ଆଗାମୀ ଶିକ୍ଷାବର୍ଷରୁ ଯେଭଳି ସ୍ଥାପନ ହୋଇପାରିବ ସେଥିପାଇଁ ନେତାମାନେ ଉଦ୍ୟମ କରିବାକୁ ସଚେତନ କରାଯାଇଛି।
ଆଲୋଚନା ପ୍ରସଙ୍ଗରେ ଭାଜପା ରାଜ୍ୟ କାର୍ଯ୍ୟକାରିଣୀ ସଦସ୍ୟ ସରୋଜ ସାବତ କହିଛନ୍ତି, ୨୦୨୧ ସେପ୍ଟେମ୍ବର ୨୯ରେ ବ୍ରହ୍ମପୁରରେ ଦ୍ୱିତୀୟ ଏବଂ ଚିକିଟି ନିର୍ବାଚନ ମଣ୍ଡଳୀରେ ନୂତନ ଭାବେ କେନ୍ଦ୍ରୀୟ ବିଦ୍ୟାଳୟ ପ୍ରତିଷ୍ଠା ନିମନ୍ତେ କେନ୍ଦ୍ର ଶିକ୍ଷାମନ୍ତ୍ରୀଙ୍କୁ ଦଳ ପକ୍ଷରୁ ପ୍ରସ୍ତାବ ଦିଆଯାଇଛି। କେବଳ କେନ୍ଦ୍ରୀୟ ବିଦ୍ୟାଳୟ ନୁହେଁ ଗଞ୍ଜାମ ଜିଲାରେ ଲକ୍ଷ ଲକ୍ଷ କୁଶଳୀ ଶ୍ରମିକ ଅନ୍ୟ ରାଜ୍ୟକୁ ଯାଇ ଜୀବିକା ନିର୍ବାହ କରୁଛନ୍ତି ଓ ପ୍ରଶଂସିତ ହେଉଛନ୍ତି। ସେମାନଙ୍କୁ ଉନ୍ନତମାନର ତାଲିମ ଦେବା ପାଇଁ ବ୍ରହ୍ମପୁରରେ ଦକ୍ଷତା ବିକାଶ ମନ୍ତ୍ରଣାଳୟ ପକ୍ଷରୁ ଦକ୍ଷତା ବିକାଶ ପରୀକ୍ଷଣ ପ୍ରତିଷ୍ଠାନ ଖୋଲିବା ନିମନ୍ତେ ପ୍ରସ୍ତାବ ଦିଆଯାଇଛି। ଉପରୋକ୍ତ ପ୍ରସ୍ତାବ ଅନୁଧ୍ୟାନ କରାଯାଉଛି ଓ ପଦକ୍ଷେପ ନିଆଯିବାର ମନ୍ତ୍ରୀଙ୍କଠାରୁ ସୂଚନା ମିଳିଥିବା ସାବତ ଦର୍ଶାଇଛନ୍ତି।
