ଯାଜପୁର ରୋଡ,୩୦ା୮(ଡି.ଏନ.ଏ.):ନଦୀଶଯ୍ୟାରୁ ବାଲି ଖନନ ପାଇଁ କୌଣସି ମେଶିନ ବ୍ୟବହାର ଅନୁମତି ଦିଆଯିବ ନାହିଁ। ଏହାସହ ବାଲିଖାଦାନଗୁଡ଼ିକରେ ସିସିଟିଭି ଏବଂ ପରିବହନ ଗାଡ଼ିରେ ଜିପିଏସ୍ ସ୍ଥାପନ କରିବାକୁ ନ୍ୟାଶନାଲ ଗ୍ରୀନ୍ ଟ୍ରିବ୍ୟୁନାଲ (ଏନ୍ଜିଟି) ପକ୍ଷରୁ ନିକଟରେ ନିର୍ଦ୍ଦେଶ ହୋଇଛି। କିନ୍ତୁ ବୈତରଣୀ ନଦୀରେ ଏହାର ଖୋଲାଖୋଲି ଉଲ୍ଲଂଘନ କରି ଜନବସତି ରାସ୍ତାରେ ଓଭରଲୋଡିଂ ପରିବହନ ସାଧାରଣ ଲୋକଙ୍କ ପାଇଁ ବିପଦ ସାଜିଛି। ଏଥିପାଇଁ ଯାଜପୁରରୁ କେନ୍ଦୁଝର ଜିଲାକୁ ସଂଯୋଗ କରୁଥିବା ଏକମାତ୍ର ମଥୁରାପୁର ସେତୁ କେତେବେଳେ ଭୁଶୁଡି ପଡ଼ିବ ବୋଲି ସନ୍ଦେହ ହୋଇଛି। ଏହିକ୍ରମରେ କେରେଇ ସଂଗ୍ରାମ ସମିତି ପକ୍ଷରୁ ଏକାଧିକ ଥର ଆନ୍ଦୋଳନ ଓ ପ୍ରତିବାଦ କରାଯାଇଥିଲେ ହେଁ କିଛି ସୁଫଳ ମିଳି ପାରୁନାହିଁ। ତେଣୁ ସମିତି ଆଗାମୀ ଦିନରେ ପୁଣି ଆନ୍ଦୋଳନକୁ ଓହ୍ଲାଇବ ବୋଲି ସୋମବାର ଏକ ବୈଠକରେ ଚେତାବନୀ ଦେଇଛି। ଅଭିଯୋଗ ଅନୁସାରେ ବୈତରଣୀ ନଦୀର ସାଆଁଳା-୨, ମୁକୁନ୍ଦପୁର-୨, ସାଲବା, ରଣପାଳ, ଧନତ୍ରୀ, ନିଶଙ୍ଖପୁର, ବରପଦା ଆଦି ବାଲିଘାଟରୁ ୨୪,୭୯୫ ଘନମିଟର ବାଲି ଉତ୍ତୋଳନ କରିବାକୁ ଅନୁମତି ମିଳିଛି। ଅନୁମତି ପତ୍ରରେ ପୋକଲିନ ବ୍ୟବହାର ହୋଇପାରିବ ନାହିଁ ଏବଂ ମାନୁଆଲ ଭାବେ ଉତ୍ତୋଳନ କରାଯିବ ବୋଲି ନିର୍ଦ୍ଦେଶ ରହିଛି। ହେଲେ ପ୍ରାୟ ସମସ୍ତ ବାଲିଘାଟରେ ୭/୮ଟି ଲେଖାଏ ପୋକଲିନ ମେଶିନ ବ୍ୟବହାର କରାଯାଇ ଅନୁମୋଦନଠାରୁ ବହୁ ଗୁଣ ବାଲି ଉତ୍ତୋଳନ ହେଉଥିବା ଦେଖିବାକୁ ମିଳିଛି। ଏହାର ପ୍ରତିବାଦରେ ସମିତି ପକ୍ଷରୁ ତହସିଲ ଅଫିସ ଆଗରେ ପାଞ୍ଚ ଦିନ ଧାରଣା ଦିଆଯିବା ପରେ ଦିନରେ ମଥୁରା ପୋଲ ଦେଇ ବିିଭିନ୍ନ ଗ୍ରାମ ରାସ୍ତାରେ ପରିବହନ ନିଷେଧ କରାଯିବା ସହ ଭାରିଯାନ ଯାଇପାରିବ ନାହିଁ ବୋଲି ପ୍ରଶାସନ ପକ୍ଷରୁ ଲିଖିତ ପ୍ରତିଶ୍ରୁତି ଦିଆଯାଇଥିଲା। ଏହାପରେ ଆନ୍ଦୋଳନ ସ୍ଥଗିତ କରାଯାଇଥିଲା। ଏହି ନିର୍ଦ୍ଦେଶକୁ କାର୍ଯ୍ୟକାରୀ କରିବାକୁ କୋରେଇ ଓ ପାଣିକୋଇଲି ଥାନା ଅଧିକାରୀଙ୍କୁ କୁହାଯାଇଥିଲା। ଏହି ନିର୍ଦ୍ଦେଶ କିଛି ଦିନ କାର୍ଯ୍ୟକାରୀ ହେବା ପରେ ଏବେ ପୁଣି ବେଧଡକ ଭାବେ ପୂର୍ବ ପରି ଭାରିଯାନ ପରିବହନ ଆରମ୍ଭ ହୋଇଛି। ଏହାକୁ ତୁରନ୍ତ ରୋକା ନ ଗଲେ କଳିଙ୍ଗନଗର ଅତିରିକ୍ତ ଜିଲାପାଳ ଅଫିସ ସମ୍ମୁଖରେ ଆନ୍ଦୋଳନ କରିବାକୁ ସମିତି ନିଷ୍ପତ୍ତି ନେଇଛି। ଏହିମର୍ମରେ ଏକ ଜରୁରୀ ବୈଠକରେ ସମିତିର ସଭାପତି ବିଦ୍ୟାଧର ମହାନ୍ତି, ସମ୍ପାଦକ ଅଭିମନ୍ୟୁ ମିଶ୍ର, ଆଲୋକ ମହାନ୍ତି, ମନୋରଞ୍ଜନ ନାୟକ, ଦୀପ୍ତିମୟୀ କୁଅଁର, ପ୍ରଦ୍ୟୁମ୍ନ ବୋଇତେଇ, ସୀତାକାନ୍ତ କୁଅଁର, ପ୍ରମୋଦ ପାତ୍ର, ପ୍ରହଲ୍ଲାଦ ଦେଓ ପ୍ରମୁଖ ଆଲୋଚନା କରିବା ସହିତ ଜିଲାପାଳଙ୍କ ଦୃଷ୍ଟି ଆକର୍ଷଣ କରିଛନ୍ତି।
