ହାଇଦ୍ରାବାଦ, ୨୩।୮ : ହାଇଦ୍ରାବାଦରେ ଭାଜପା କର୍ମକର୍ତ୍ତାଙ୍କ ଗିରଫଦାରୀକୁ ବିରୋଧ କରି ବିକ୍ଷୋଭ କରୁଥିବା ତେଲେଙ୍ଗାନାଭାଜପା ଅଧ୍ୟକ୍ଷ ବି.ସଞ୍ଜୟ କୁମାରଙ୍କୁ ପୋଲିସ ଗିରଫ କରିଛି। ଏହାକୁ ନେଇ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ତେଲେଙ୍ଗାନା ସରକାରଙ୍କୁ କଡ଼ା ସମାଲୋଚନା କରିଛନ୍ତି। ଟିଆରଏସର ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ (କେସିଆର) ସରକାରଙ୍କ ଏଭଳି କାର୍ଯ୍ୟକୁ ନଡ୍ଡା ନିନ୍ଦା କରିଛନ୍ତି। ଏହି ବେଆଇନ ଗିରଫ ରାଜନୈତିକ ପ୍ରତିଶୋଧ ପ୍ରଣୋଦିତ ବୋଲି ନଡ୍ଡା କହିଛନ୍ତି।
ତେଲେଙ୍ଗାନା ମୁଖ୍ୟମନ୍ତ୍ରୀଙ୍କୁ ଟାର୍ଗେଟ କରି ସେ କହିଛନ୍ତି ଟିଆରଏସର ଦୁର୍ନୀତିଗ୍ରସ୍ତ ତଥା ପାରିବାରିକ କେନ୍ଦ୍ରିକ ରାଜନୀତି ବିରୋଧରେ ରାଜ୍ୟର କୋଣ ଅନୁକୋଣରୁ ଭାଜପାକୁ ଯେଉଁ ବିପୁଳ ସମର୍ଥନ ମିଳୁଛି ତାହା ଦେଖି କେସିଆର ଚିନ୍ତାରେ ପଡିଛନ୍ତି। ଆମେ ଗଣତାନ୍ତ୍ରିକ ଉପାୟରେ ଲଢ଼େଇ ଜାରି ରଖି ଏବଂ ଆଗାମୀ ନିର୍ବାଚନରେ ଟିଆରଏସର କେସିଆର ସରକାରଙ୍କୁ ରାଜ୍ୟରୁ ମୂଳପୋଛ କରିବୁ।
ସୂଚନାଯୋଗ୍ୟ, ଦିଲ୍ଲୀର ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କ ଉପରେ ସିବିଆଇ ଚଢ଼ାଉ ପରେ ଭାଜପା ଏମ୍ପି ପ୍ରବେଶର ବର୍ମା ଏବଂ ପୂର୍ବତନ ବିଧାୟକ ମନଜିନ୍ଦର ସିଂ ସିର୍ସା ଅଭିଯୋଗ କରିଥିଲେ ଯେ ତେଲେଙ୍ଗାନା ମୁଖ୍ୟମନ୍ତ୍ରୀ କେସିଆରଙ୍କ ଝିଇ ତଥା ପୂର୍ବତନ ଏମ୍ପି କବିତା କଲଭାକୁନ୍ତଳାଙ୍କ ପରିବାର ମଧ୍ୟ ଦିଲ୍ଲୀର ଅବକାରୀ ନୀତି ମାମଲାରେ ଜଡିତ। ଏହା ପରେ କବିତା ଏହି ଅଭିଯୋଗକୁ ଅସ୍ବୀକାର କରି ଭାଜପା ନେତାଙ୍କ ବିରୋଧରେ ମାନହାନି ମକଦ୍ଦମା ଦାଏର କରିବାକୁ କହିଥିଲେ।
ତାଙ୍କ ବିବୃତ୍ତି ପରେ ବହୁ ଭାଜପାକର୍ମୀ ହାଇଦ୍ରାବାଦର ବଞ୍ଜରା ହିଲ୍ସରେ ଥିବା କବିତାଙ୍କ ବାସଭବନ ସମ୍ମୁଖରେ ପହଞ୍ଚି ଏହାକୁ ବିରୋଧ କରିଥିଲେ ଏବଂ ପରେ ପୋଲିସ ତାଙ୍କୁ ଗିରଫ କରିଥିଲା। ଏହି ଗିରଫଦାରୀ ବିରୋଧରେ ଭାଜପା ରାଜ୍ୟ ଅଧ୍ୟକ୍ଷ ବି.ସଞ୍ଜୟ କୁମାର ପୋଲିସ ଅନୁମତି ନ ନେଇ ଜନଗାଓଁରେ ଧାରଣା ଦେବାକୁ ଯାଉଥିଲେ। ପରେ ତାଙ୍କୁ ପୋଲିସ ଗିରଫ କରିଥିଲା।
