ନୟାଗଡ଼ ଅଫିସ,୨୨।୮: ନୟାଗଡ଼ ସ୍ବୟଂ ଶାସିତ ମହାବିଦ୍ୟାଳୟରେ ୫ ଅଧ୍ୟାପିକାଙ୍କୁ ୭ ଛାତ୍ର ଅଶ୍ଲୀଳ ଭାଷାରେ ଗାଳିଗୁଲଜ ସହ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି। ଏନେଇ ସମ୍ପୃକ୍ତ ଅଧ୍ୟାପିକାମାନେ ମହାବିଦ୍ୟାଳୟର ଅଧ୍ୟକ୍ଷଙ୍କ ନିକଟରେ ଅଭିଯୋଗ କରିବା ପରେ ଘଟଣା ଲୋକଲୋଚନକୁ ଆସିଛି। ଅଭିଯୋଗ ଅନୁଯାୟୀ, ମହାବିଦ୍ୟାଳୟର ଇଣ୍ଟରନାଲ ପରୀକ୍ଷା ଚାଲୁଥିବା ସମୟରେ ଜଣେ କମର୍ସ ଛାତ୍ରଙ୍କୁ କପି କରିବା ବେଳେ ଜଣେ ଅଧ୍ୟାପିକା ଧରିଥିଲେ। କପି କାହିଁକି ଧରିଲ ବୋଲି କହି ସମ୍ପୃକ୍ତ ଛାତ୍ରଜଣକ ଅଧ୍ୟାପିକାଙ୍କ ସହ ଯୁକ୍ତିତର୍କ କରିବା ସହିତ ଗାଳିଗୁଲଜ ଓ ଖରାପ ବ୍ୟବହାର କରିଥିଲେ। ସେହିପରି ମହାବିଦ୍ୟାଳୟର ୪ ଅଧ୍ୟାପିକାଙ୍କୁ ୬ଜଣ ଯୁକ୍ତ ୩ କମର୍ସ ଛାତ୍ର ଅନୁରୂପ ଭାବେ ଦୁର୍ବ୍ୟବହାର ଓ ଅଶ୍ଲୀଳ ଭାଷାରେ ଗାଳିଗୁଲଜ କରିଥିବା ଅଭିଯୋଗ ହୋଇଛି। ଏନେଇ ମହାବିଦ୍ୟାଳୟର ଅଧ୍ୟକ୍ଷ ସୁରେଶ କୁମାର ପ୍ରଧାନଙ୍କୁ ପଚାରିବାରୁ ୨ଟି ଅଭିଯୋଗ ହୋଇଛି। ସୋମବାର ଷ୍ଟାଫ୍ କାଉନସିଲ ବୈଠକ ହେବାର ଅଛି। ଏଥିରେ ଏ ସଂକ୍ରାନ୍ତରେ ଆଲୋଚନା ହେବା ପରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
