ତାଳଚେର, ୨୦ା୮(ନି.ପ୍ର.): ୨୦୨୧-୨୨ ବର୍ଷରେ ଉତ୍ପାଦନ, ଗୁଣବତ୍ତା ଓ ସୁରକ୍ଷା ଶ୍ରେଣୀରେ ମହାନଦୀ କୋଲ୍ଫିଲଡସ୍ ଲିମିଟେଡ (ଏମ୍ସିଏଲ୍) ପ୍ରଥମ ପୁରସ୍କାର ହାସଲ କରି କୋଇଲା ମନ୍ତ୍ରୀ ପୁରସ୍କାରରେ ସମ୍ମାନିତ ହୋଇଛି। ଗୁରୁବାର ନୂଆଦିଲ୍ଲୀଠାରେ ଆୟୋଜିତ କାର୍ଯ୍ୟକ୍ରମରେ ଏମ୍ସିଏଲ୍ର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ (ସିଏମ୍ଡି) ଓ.ପି. ସିଂ କେନ୍ଦ୍ର ସଂସଦୀୟ ବ୍ୟାପାର, କୋଇଲା ଏବଂ ଖଣି ବିଭାଗର ମନ୍ତ୍ରୀ ପ୍ରହ୍ଲାଦ ଜୋଷୀଙ୍କ ଠାରୁ ଏହି ପୁରସ୍କାର ଗ୍ରହଣ କରିଛନ୍ତି। ଏହି ପୁରସ୍କାର ବିତରଣ ସମାରୋହରେ ଏମ୍ସିଏଲ୍ ନିର୍ଦ୍ଦେଶକ (କାର୍ମିକ) କେଶବ ରାଓ, ନିର୍ଦ୍ଦେଶକ ବୈଷୟିକ (ଯୋଜନା ଏବଂ ପରିଯୋଜନା) ଯୁଗଳ କୁମାର ବୋରା, ନିର୍ଦ୍ଦେଶକ (ବିତ୍ତ) ଏ.କେ. ବେହୁରା, କୋଇଲା ମନ୍ତ୍ରାଣାଳୟ ସଚିବ ଡ. ଏ.କେ. ଜୈନ, କୋଲ ଇଣ୍ଡିଆ ଅଧ୍ୟକ୍ଷ ପ୍ରମୋଦ ଅଗ୍ରୱାଲ ପ୍ରମୁଖ ଉପସ୍ଥିତ ଥିଲେ। ଏତଦ୍ବ୍ୟତୀତ ତିନୋଟି କ୍ଷେତ୍ରର ଜେନେରାଲ ମ୍ୟାନେଜର ସଞ୍ଜୟ ଝା, ଏ.କେ. ସ୍ବର୍ଣ୍ଣକାର ଏବଂ କେ.କେ. ରୁଲ ଯଥାକ୍ରମେ ବସୁନ୍ଧରା କ୍ଷେତ୍ର, ହିଙ୍ଗୁଳା କ୍ଷେତ୍ର ଏବଂ କଣିହାଁ କ୍ଷେତ୍ରର ପ୍ରଦର୍ଶନରେ ଉତ୍କର୍ଷ ପାଇଁ କୋଇଲା ମନ୍ତ୍ରୀ ପୁରସ୍କାର ଗ୍ରହଣ କରିଥିଲେ। ଏହି ପୁରସ୍କାର ଜିତିବା ପରେ ସିଏମ୍ଡି ସମଗ୍ର ଏମ୍ସିଏଲ୍ ଟିମ୍କୁ ଅଭିନନ୍ଦନ ଜଣାଇଛନ୍ତି। ଟିମ୍ ଏମସିଏଲର ପ୍ରତ୍ୟେକ ସଦସ୍ୟ ଏବଂ ଖଣି କାର୍ଯ୍ୟରେ ନିୟୋଜିତ ସମସ୍ତ ଠିକା କର୍ମଚାରୀଙ୍କୁ ଏହି କୋଇଲା ମନ୍ତ୍ରୀ ପୁରସ୍କାର ଉତ୍ସର୍ଗ ବୋଲି ସିଂ କହିଛନ୍ତି। ମୋଟ ୫ଟି ବର୍ଗ ମଧ୍ୟରୁ ଏମ୍ସିଏଲ୍ ତିନିଟି ବର୍ଗରେ ପ୍ରଥମ ପୁରସ୍କାର ହାସଲ କରିଥିବାବେଳେ ସ୍ଥିରତା ବର୍ଗର ପ୍ରଥମ ପୁରସ୍କାର ୱେଷ୍ଟର୍ନ କୋଲ୍ଫିଲଡସ ଲିମିଟେଡ (ଡବ୍ଲ୍ୟୁସିଏଲ) ଓ ଇଆରପି କାର୍ଯ୍ୟକାରୀ କରିବାରେ ନର୍ଦ୍ଦନ କୋଲଫିଲଡସ ଲିମିଟେଡ(ଏନ୍ସିଏଲ୍) ପ୍ରଥମ ପୁରସ୍କାର ଲାଭ କରିଛି।
