ଓ୍ବାଶିଂଟନ୍, ୧୬ା୬: ମାଇକ୍ରୋସଫ୍ଟର ସର୍ବପୁରାତନ ବ୍ରାଉଜର ଇଣ୍ଟରନେଟ୍ ଏକ୍ସପ୍ଲୋରର୍ (ଆଇଇ) ଦୀର୍ଘ ୨୭ ବର୍ଷ ଧରି ସେବା ଯୋଗାଇବା ପରେ ବୁଧବାର ମଧ୍ୟ ରାତ୍ରିରେ ଅବସର ନେଇଛି। ଏଣିକି ଡେସ୍କଟପ୍ରେ ଥିବା ଆଇଇ ଆଇକନ୍ କାମ କରିବ ନାହିଁ। ୟୁଜର୍ସ ଏହି ବ୍ରାଉଜର ବ୍ୟବହାର କରିବାକୁ ଚାହିଁଲେ ଆପେ ଆପେ ତାହା ମାଇକ୍ରୋସଫ୍ଟ ଏଜ୍କୁ ରିଡାଇରେକ୍ଟ ହୋଇଯିବ। ଅର୍ଥାତ ଆଇଇରୁ ଯେଉଁ ସେବା ମିଳୁଥିଲା ଏବେ ତାହା ମାଇକ୍ରୋସଫ୍ଟ ଏଜ୍ରୁ ୟୁଜର୍ସ ପାଇପାରିବେ।
୧୯୯୫ ଅଗଷ୍ଟ ୮ରେ ପ୍ରଥମେ ଇଣ୍ଟରନେଟ୍ ଏକ୍ସପ୍ଲୋରର ଆଡ୍-ଅନ୍ ପ୍ୟାକେଜ୍ରେ ଭାବେ ଓ୍ବିଣ୍ଡୋଜ୍ ୯୫ ପାଇଁ ରିଲିଜ ହୋଇଥିଲା। ପରେ କମ୍ପାନୀ ଏହି ବ୍ରାଉଜରକୁ ଉକ୍ତ ପ୍ୟାକେଜର ଅଂଶ ଭାବେ ମାଗଣା କରିଥିଲା। ୨୦୦୪ରେ ଇଣ୍ଟରନେଟ ଏକ୍ସପ୍ଲୋରରକୁ ସର୍ବାଧିକ ୯୫% ୟୁଜର୍ସ ବ୍ୟବହାର କରିଥିବା ରେକର୍ଡ ହୋଇଥିଲା। ହେଲେ ପରେ ଆଇଇ ନିଜ ପୂର୍ବ ସ୍ଥିତି ବଜାୟ ରଖିବାରେ ବିଫଳ ହେବାରୁ ଏହାର ୟୁଜର୍ସ କମିବାରେ ଲାଗିଲେ। ତେଣୁ କମ୍ପାନୀ ଗତ ବର୍ଷ ମେ’ରେ ଏହି ବ୍ରାଉଜରକୁ ବନ୍ଦ କରିବା ପାଇଁ ନିଷ୍ପତ୍ତି ନେଇଥିଲା। ଏବେ ଗୁଗଲ କ୍ରୋମ, ଆପଲର ସଫାରି, ମୋଜିଲା ଫାୟାରଫକ୍ସ ସର୍ବାଧିକ ବ୍ୟବହାର କରାଯାଉଥିବା ବ୍ରାଉଜର। ପ୍ରକାଶ ଯେ, ୨୦୨୧ରେ ଇଣ୍ଟରନେଟ ଏକ୍ସପ୍ଲୋରର ଏହାର ଶେଷ ଭର୍ସନ (ଆଇଇ-୧୧) ଆଣିଥିଲା।
