ଓ୍ବାଶିଂଟନ୍ ୧୦ା୬: ବଫାଲୋ, ନ୍ୟୁୟର୍କ, ଉଭାଲଡେ ଗୁଳିକାଣ୍ଡ ପରେ ଆମେରିକାର ଜୋ ବାଇଡେନ୍ଙ୍କ ସରକାର ବୁଧବାର ହାଉସ୍ ଅଫ୍ ରିପ୍ରେଜେଣ୍ଟେଟିଭ୍ସ୍ରେ ବନ୍ଧୁକ ନିୟନ୍ତ୍ରଣ ବିଲ୍ ଆଣିଛନ୍ତି। ବିଲ୍ ସପକ୍ଷରେ ୨୨୩ ଭୋଟ ଏବଂ ବିପକ୍ଷରେ ୨୦୪ ଭୋଟ ପଡ଼ିଥିଲା। ଫଳରେ ନିମ୍ନସଦନରେ ଏହି ବିଲ୍ ପାରିତ ହୋଇଛି। ଏଥିରେ ସେମି-ଅଟୋମେଟିକ୍ ବନ୍ଧୁକ କିଣିବା ପାଇଁ ସର୍ବନିମ୍ନ ବୟସ ସୀମା ବଢ଼ାଯିବା ପ୍ରାବଧାନ ରହିଛି। ଏଥିସହ ୧୫ ରାଉଣ୍ଡରୁ ଅଧିକ ମାଗାଜିନ୍ ଧାରଣ କ୍ଷମତା ବିଶିଷ୍ଟ ବନ୍ଧୁକ ବ୍ୟବହାର ଉପରେ କଟକଣା ଲଗାଯିବ। ତେବେ ଏହି ବିଲ୍ ଆଇନରେ ପରିଣତ ହେବା ସମ୍ଭାବନା ବହୁତ କମ୍। ପ୍ରାୟ ଅଧିକାଂଶ ରିପବ୍ଲିକାନ୍ ସଦସ୍ୟ ଏହାକୁ ବିରୋଧ କରିଛନ୍ତି। ସିନେଟ୍ରେ ବିଲ୍ ପାରିତ ହେବାକୁ ଆଉ ୧୦ ରିପବ୍ଲିକାନ୍ଙ୍କ ସମର୍ଥନ ଆବଶ୍ୟକ। ଏହାବାଦ୍ ଅଧିକାଂଶ ସିନେଟରମାନେ ମାନସିକ ସ୍ବାସ୍ଥ୍ୟ କାର୍ଯ୍ୟକ୍ରମ, ସାମାଜିକ ସୁରକ୍ଷା ବ୍ୟବସ୍ଥା ବୃଦ୍ଧି ଏବଂ ତଦନ୍ତ ପ୍ରକ୍ରିୟାକୁ ଅଧିକ ମଜଭୁତ କରିବା ଦିଗରେ ସେମାନଙ୍କ ଧ୍ୟାନ କେନ୍ଦ୍ରୀଭୂତ କରିଛନ୍ତି। ଆସନ୍ତା ନଭେମ୍ବରରେ ଡେମୋକ୍ରାଟ୍ ସଦସ୍ୟ ମତଦାତାଙ୍କ ପାଇଁ ଏକ ନୀତି ଆଣିବାର ସୁଯୋଗ ମିଳିବ। ଏହାଦ୍ୱାରା ସେମାନେ ବନ୍ଧୁକ ନିୟନ୍ତ୍ରଣ ପଲିସି ଉପରେ ନିଜ ମତ ରଖିପାରିବେ।
