ରଘୁନାଥପୁର,୩ା୬(ଡି.ଏନ୍.ଏ.): ଗରିବ ହିତାଧିକାରୀଙ୍କ ନିମନ୍ତେ ରାଜ୍ୟ ସରକାର ଯୋଗାଣ ଷ୍ଟୋର ମାଧ୍ୟମରେ ଟଙ୍କିକିଆ ଚାଉଳ ଯୋଗାଇ ଦେଉଛନ୍ତି। ମାତ୍ର ବହୁ ସମୟରେ ଯୋଗାଣ ଷ୍ଟୋରକୁ ଆସୁଥିବା ବସ୍ତାରେ କମ୍ ପରିମାଣର ଚାଉଳ ରହୁଥିବା ସାଧାରଣରେ ଅଭିଯୋଗ ହୋଇଛି। ଏହାର ଉଦାହରଣ ରଘୁନାଥପୁର ବ୍ଲକ ତାରପୁର ପଞ୍ଚାୟତ ଅନ୍ତର୍ଗତ ଗୋକୁଳପୁରସ୍ଥିତ ରାଶନ ଡିଲର ପଏଣ୍ଟରେ ଦେଖିବାକୁ ମିଳିଛି।
ଠିକାଦାରଙ୍କ ଦ୍ୱାରା ଗୋଦାମରୁ ୫୦ କିଲୋ ଚାଉଳ ବସ୍ତାରେ ଆସୁଛି। ମାତ୍ର ପ୍ରତି ବସ୍ତାରେ ପ୍ରାୟ ୫ରୁ ୮ କିଲୋ ପର୍ଯ୍ୟନ୍ତ ଚାଉଳ କମ୍ ରହୁଛି। ଖାଉଟିଙ୍କ ଉପସ୍ଥିତିରେ ୩ଟି ଚାଉଳ ବସ୍ତା ଓଜନ କରାଯିବା ପରେ ଏବିଷୟରେ ସ୍ପଷ୍ଟ ହୋଇଛି। ଓଜନ ପରେ ଗୋଟିଏ ବସ୍ତାରେ ୪୨ କିଲୋ ୯୫୦ଗ୍ରାମ ଚାଉଳ ଥିଲାବେଳେ ଅନ୍ୟ ୨ ବସ୍ତାରେ ଯଥାକ୍ରମେ ୪୪ କିଲୋ ୧୦୦ ଗ୍ରାମ ଏବଂ ୪୫ କିଲୋ ୩୭୦ ଗ୍ରାମ ଚାଉଳ ଥିଲା। ଅଧିକାଂଶ ଡିଲର ପଏଣ୍ଟରେ ଏପରି ବ୍ୟତିକ୍ରମ ଦେଖାଯାଉଥିଲେ ସୁଦ୍ଧା ଡିଲରମାନେ ଏ ବିଷୟରେ ମୁହଁ ଖୋଳୁନାହାନ୍ତି।
ସମ୍ପର୍କରେ ବ୍ଲକ ଯୋଗାଣ ଅଧିକାରୀ ବାବୁଲାଲ ବାରିକ କୁହନ୍ତି ଯେ, ଗୋଦାମରୁ ଠିକାଦାରଙ୍କ ଜରିଆରେ ଯେଉଁ ଚାଉଳ ବସ୍ତା ଆସୁଛି ତାକୁ ମାପ କରି ରଖିବା ଦାୟିତ୍ୱ ହେଉଛି ଡିଲରମାନଙ୍କର। ଏଥିରେ ତାଙ୍କର କୌଣସି ଭୂମିକା ନାହିଁ। ଏ ସମ୍ପର୍କରେ ଗୋଦାମ ଦାୟିତ୍ୱରେ ଥିବା ଅଧିକାରୀ ମିନର୍ଭା ଶତପଥୀ କୁହନ୍ତି, ଗୋଦାମରୁ ଆବଶ୍ୟକ ମୁତାବକ ସାମଗ୍ରୀ ଠିକାଦାରଙ୍କ ଦ୍ୱାରା ଉଠାଯାଉଛିି। ଏଠାରେ କୌଣସି ପ୍ରକାର ତ୍ରୁଟି ହେଉନାହିଁ। ଏପ୍ରସଙ୍ଗରେ ଜିଲା ଯୋଗାଣ ଅଧିକାରୀ ସୁଜାତା ମିଶ୍ର କହିଛନ୍ତି,ଗୋଦାମ ଗୃହରୁ ଓଜନ ହୋଇ ଡିଲର ପଏଣ୍ଟକୁ ଆସୁଥିବା ରାଶନ ସାମଗ୍ରୀ କାହିଁକି କମୁଛି ସେସମ୍ପର୍କରେ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନିଆଯିବ।
