ଓ୍ବାଶିଂଟନ, ୨୨।୫ : କରୋନା ସଂକ୍ରମଣ ଯୋଗୁ ଚାଇନାରେ କଡା ପ୍ରତିବନ୍ଧକ ଲଗାଯାଇଛି। ଏପରିସ୍ଥଳେ ପ୍ରସିଦ୍ଧ କମ୍ପାନୀ ଆପଲ ଚାଇନା ବାହାରେ ବ୍ୟବସାୟ କରିବା ବିଷୟରେ ସୂଚନା ଦେଇଛି। ୱାଲ ଷ୍ଟ୍ରିଟ ଜର୍ଣ୍ଣାଲରେ ପ୍ରକାଶିତ ଏକ ରିପୋର୍ଟରେ କୁହାଯାଇଛି ଯେ କମ୍ପାନୀ ଏହାର କିଛି ଚୁକ୍ତିନାମା ନିର୍ମାତାଙ୍କୁ କହିଛି ଯେ ଏହା ଚାଇନା ବାହାରେ ଏହାର ଉତ୍ପାଦନ ବୃଦ୍ଧି କରିବାକୁ ଚାହୁଁଛି। ଏହା ଦ୍ୱାରା ଚାଇନାକୁ ବଡ଼ ଝଟ୍କା ଲାଗିଛି।
ଏହି ରିପୋର୍ଟରେ କୁହାଯାଇଛି ଯେ କମ୍ପାନୀ ଏଥିପାଇଁ ଭାରତ ଏବଂ ଭିଏତନାମ ଭଳି ଦେଶକୁ ଯିବାର ଯୋଜନା କରିଛି। ଆମେରିକାର ବୃହତ୍ତମ କମ୍ପାନୀ ଆପଲ ଏପରି ନିଷ୍ପତ୍ତି ନେବା ପଛରେ ଦୁଇଟି ଗୁରୁତ୍ୱପୂର୍ଣ୍ଣ କାରଣ ଥିବା କୁହାଯାଉଛି। ରୁଷିଆ ଏବଂ ୟୁକ୍ରେନ ମଧ୍ୟରେ ଚାଲିଥିବା ବିବାଦରେ ଚାଇନା ପରୋକ୍ଷରେ ରୁଷିଆକୁ ସାହାଯ୍ୟ କରୁଛି। ଯାହା ପରେ ଅନେକ ପାଶ୍ଚାତ୍ୟ କମ୍ପାନୀ ଚାଇନା ଉପରେ ସେମାନଙ୍କର ଉତ୍ପାଦନର ନିର୍ଭରଶୀଳତା ହ୍ରାସ କରିବାକୁ ଚାହୁଁଛନ୍ତି।
ଏହା ବ୍ୟତୀତ ଚାଇନାରେ କରୋନା ସଂକ୍ରମଣକୁ ଦୃଷ୍ଟିରେ ରଖି ବହୁ ସହରରେ ପ୍ରତିବନ୍ଧକ ଲଗାଯାଇଛି, ଯେଉଁଥିପାଇଁ ଏହି କମ୍ପାନୀଗୁଡିକର କାରବାର ବ୍ୟାହତ ହେଉଛି। ବିଶେଷଜ୍ଞଙ୍କ ଅନୁଯାୟୀ, ଆପଲର ୯୦ ପ୍ରତିଶତ ଆଇଫୋନ, ଆଇପ୍ୟାଡ ଏବଂ ମ୍ୟାକବୁକ ଲାପଟପ ଚାଇନାରେ ନିର୍ମିତ ହେଉଛି।
ଏପ୍ରିଲରେ ଆପଲ ଯୋଗାଣ ଶୃଙ୍ଖଳା ସହିତ ଜଡିତ ଆହ୍ବାନଗୁଡିକ ଉପରେ ମନ୍ତବ୍ୟ ଦେଇ କମ୍ପାନୀର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଟିମ କୁକ କହିଛନ୍ତି ଯେ ଆମର ଯୋଗାଣ ଶୃଙ୍ଖଳା ପ୍ରକୃତରେ ବିଶ୍ୱବ୍ୟାପୀ ଏବଂ ସେଥିପାଇଁ ଆମର ଉତ୍ପାଦ ସବୁ ସ୍ଥାନରେ ତିଆରି ହୋଇଥାଏ। ଆମେ ଏହାକୁ ବୃଦ୍ଧି କରିବାକୁ କ୍ରମାଗତ ଭାବରେ ନୂତନ ସ୍ଥାନ ଖୋଜୁଛୁ। ଚାଇନାରେ କରୋନା ନିୟମକୁ ଦୃଷ୍ଟିରେ ରଖି ସାଂଘାଇ ଏବଂ ଅନ୍ୟାନ୍ୟ ସହରରେ ଲକଡାଉନ ଲଗାଯାଇଛି। ଯେଉଁଥିପାଇଁ ଅନେକ କମ୍ପାନୀର ଯୋଗାଣ ଶୃଙ୍ଖଳା ପ୍ରଭାବିତ ହୋଇଛି।
ଚାଇନାରେ ଚାଲିଥିବା ପ୍ରତିବନ୍ଧକ ହେତୁ, ଆପଲ ପରି ଏକ ବଡ କମ୍ପାନୀ ଏହାର କାର୍ଯ୍ୟନିର୍ବାହୀ ଏବଂ ଇଞ୍ଜିନିୟରମାନଙ୍କୁ ଗତ ୨ ବର୍ଷ ଧରି ସେଠାକୁ ପଠାଇବାକୁ ସକ୍ଷମ ହୋଇ ପାରୁ ନାହିଁ। ଏହାର ଅର୍ଥ ହେଉଛି କମ୍ପାନୀ ଚାଇନାରେ ଉତ୍ପାଦନ ସାଇଟଗୁଡିକ ବିଷୟରେ ସଠିକ ତଥ୍ୟ ସଂଗ୍ରହ କରିବାରେ ଅସମର୍ଥ ହେଉଛି। ଚାଇନା ପରେ କମ୍ପାନୀ ବର୍ତ୍ତମାନ ଭାରତରେ ଉତ୍ପାଦନ କରିବାକୁ ଯୋଜନା ପ୍ରସ୍ତୁତ କରୁଛି। ଉଭୟ ଦେଶର ଜନସଂଖ୍ୟା ପ୍ରାୟ ସମାନ ଏବଂ ଉଭୟ ଦେଶରେ ମଧ୍ୟ ଆପଲର କାରବାର କମ୍ ରହିଛି। ତେଣୁ ଭାରତରେ ଏହାର ଉତ୍ପାଦନ ଏବଂ ବ୍ୟବସାୟ ବୃଦ୍ଧି ପାଇଁ ଆପଲ କମ୍ପାନୀ ଏହାର କିଛି ଯୋଗାଣକାରୀଙ୍କ ସହ ଆଲୋଚନା କରୁଛି।
ଭାରତ ଗତ ବର୍ଷ ବିଶ୍ୱର ମୋଟ ଆଇଫୋନ ଉତ୍ପାଦନର ୩.୧ ପ୍ରତିଶତ ଉତ୍ପାଦନ କରିଥିଲା ଏବଂ ଚଳିତ ବର୍ଷ ଏହା ୬ରୁ୭ ପ୍ରତିଶତ ମଧ୍ୟରେ ରଖାଯାଇଛି।
