ଡେରାଡୁନ୍, ୧୬।୫ : ଉତ୍ତରାଖଣ୍ଡରେ ଚାର୍ ଧାମ୍ ଯାତ୍ରା ଆରମ୍ଭରୁ ଇତିମଧ୍ୟରେ ଗତ ୧୩ ଦିନ ମଧ୍ୟରେ ୩୯ ତୀର୍ଥଯାତ୍ରୀଙ୍କ ମୃତ୍ୟୁ ଘଟିଛି। ରାଜ୍ୟ ସ୍ବାସ୍ଥ୍ୟ ବିଭାଗର ମହାନିର୍ଦ୍ଦେଶକ ଡକ୍ଟର ଶୈଲଜା ଭଟ୍ଟ କହିଛନ୍ତି ଯେ ଏହି ସବୁ ମୃତ୍ୟୁର କାରଣ ହେଉଛି ଉଚ୍ଚ ରକ୍ତଚାପ, ହୃଦ୍ ରୋଗ ଏବଂ ଉଚ୍ଚତା ସମ୍ବନ୍ଧୀୟ ମାଉଣ୍ଟେନ୍ ସିକ୍ନେସ୍ ସମସ୍ୟା। ଚଳିତ ବର୍ଷ ଉତ୍ତରାଖଣ୍ଡରେ ଚାର୍ ଧାମ୍ ଯାତ୍ରା ମେ’ ୩ ଅକ୍ଷୟ ତୃତୀୟାଠାରୁ ଆରମ୍ଭ ହୋଇଛି। ମାତ୍ର ୧୩ ଦିନ ମଧ୍ୟରେ ଏତେ ସଂଖ୍ୟକ ତୀର୍ଥଯାତ୍ରୀଙ୍କ ମୃତ୍ୟୁ ନେଇ ସ୍ବାସ୍ଥ୍ୟ ସେବା ପ୍ରସ୍ତୁତି ଉପରେ ପ୍ରଶ୍ନ ଉଠିବାରେ ଲାଗିଛି।
ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ତୀର୍ଥଯାତ୍ରୀଙ୍କ ଏହି ମୃତ୍ୟୁକୁ ଗମ୍ଭୀରତାର ସହ ଗ୍ରହଣ କରିଛନ୍ତି। ମୁଖ୍ୟମନ୍ତ୍ରୀ ନିର୍ଦ୍ଦେଶରେ ରାଜ୍ୟ ସ୍ବାସ୍ଥ୍ୟ ବିଭାଗ ନିର୍ଦ୍ଦେଶାବଳୀ ଜାରି କରିଛି ଏବଂ ମନ୍ଦିରରେ ପ୍ରବଳ ଭିଡ଼କୁ ଦୃଷ୍ଟିରେ ରଖି ପ୍ରତ୍ୟେକ ଧାମ୍ରେ ଦର୍ଶନ ପାଇଁ ସର୍ବାଧିକ ଭକ୍ତଙ୍କ ସଂଖ୍ୟା ଏକ ହଜାରକୁ ବୃଦ୍ଧି କରାଯାଇଛି।
ସ୍ବାସ୍ଥ୍ୟ ବିଭାଗର ନିର୍ଦ୍ଦେଶାବଳୀ ଅନୁଯାୟୀ, ୨୭୦୦ ମିଟରରୁ ଅଧିକ ଉଚ୍ଚରେ ଅବସ୍ଥିତ ବଦ୍ରିନାଥ, କେଦାରନାଥ, ଗଙ୍ଗୋତ୍ରୀ ଏବଂ ଯମୁନୋତ୍ରୀରେ ଥିବା ଚାରୋଟି ଧାମ୍ରେ ତୀର୍ଥଯାତ୍ରୀମାନେ ଅତ୍ୟଧିକ ଥଣ୍ଡା, ନିମ୍ନ ଆର୍ଦ୍ରତା, ଅତ୍ୟଧିକ ଅତିବାଇଗଣି ରଶ୍ମି, ନିମ୍ନ ବାୟୁ ଚାପର ସମ୍ମୁଖୀନ ହୋଇଥାନ୍ତି।
କମ ଅମ୍ଳଜାନ ଗ୍ରହଣ ଦ୍ୱାରା କେତେକ ପ୍ରଭାବ ପ୍ରକାଶିତ ହୋଇଥାଏ। ତେଣୁ ସେମାନେ ଡାକ୍ତରୀ ପରୀକ୍ଷା ପରେ ଯାତ୍ରା ଆରମ୍ଭ କରିବା ଉଚିତ୍। ଏହା ବ୍ୟତୀତ ପୂର୍ବରୁ ଅସୁସ୍ଥ ଲୋକଙ୍କୁ ଡାକ୍ତରଙ୍କ ରିପୋର୍ଟ, ଔଷଧ ଏବଂ ଡାକ୍ତରଙ୍କ ଫୋନ ନମ୍ବର ରଖିବାକୁ କୁହାଯାଇଛି। ସେହିପରି ହୃଦ୍ରୋଗ, ଶ୍ୱାସ ରୋଗ, ମଧୁମେହ, ଉଚ୍ଚ ରକ୍ତଚାପରେ ପୀଡ଼ିତ ରୋଗୀମାନଙ୍କୁ ଉଚ୍ଚ ଉଚ୍ଚତାକୁ ଯିବାବେଳେ ବିଶେଷ ଯତ୍ନ ନେବାକୁ କୁହାଯାଇଛି।
ନୂତନ ନିର୍ଦ୍ଦେଶାବଳୀ ଅନୁଯାୟୀ, ଯଦି ତୀର୍ଥଯାତ୍ରୀଙ୍କର ମୁଣ୍ଡବିନ୍ଧା, ମୁଣ୍ଡ ବୁଲାଇବା, ସ୍ନାୟୁ ଗତ ସମସ୍ୟା, ଦ୍ରୁତ ହୃଦସ୍ପନ୍ଦନ, ବାନ୍ତି, ଓଠ ନୀଳ ପଡ଼ିବା, ଥକାପଣ, ନିଶ୍ୱାସ ପ୍ରଶ୍ୱାସ ସମସ୍ୟା, କାଶ କିମ୍ବା ଅନ୍ୟାନ୍ୟ ଲକ୍ଷଣ ପ୍ରକାଶ ପାଏ ତେବେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସ୍ବାସ୍ଥ୍ୟ ବିଭାଗ ପକ୍ଷରୁ ନିର୍ଦ୍ଦେଶ ଜାରି ହୋଇଛି। ଏଭଳି ତୀର୍ଥଯାତ୍ରୀଙ୍କୁ ସ୍ବାସ୍ଥ୍ୟ କେନ୍ଦ୍ରରେ ପହଞ୍ଚିବାକୁ କୁହାଯାଇଛି।
ତୀର୍ଥଯାତ୍ରୀଙ୍କ ପାଇଁ ହେଲ୍ପଲାଇନ ନମ୍ବର ୧୦୪ ଜାରି କରାଯାଇଛି। ସେହିପରି ବରିଷ୍ଠ ନାଗରିକ, ଅସୁସ୍ଥ ଏବଂ ଯେଉଁମାନେ ପୂର୍ବରୁ କୋଭିଡରେ ସଂକ୍ରମିତ ହୋଇଥିଲେ ସେମାନଙ୍କ ପାଇଁ ଯାତ୍ରା ନକରିବାକୁ କିମ୍ବା ଏହାକୁ କିଛି ଦିନ ସ୍ଥଗିତ ରଖିବାକୁ ପରାମର୍ଶ ଦିଆଯାଇଛି। ଏଥିସହ ତୀର୍ଥଯାତ୍ରୀଙ୍କୁ ତୀର୍ଥସ୍ଥଳରେ ପହଞ୍ଚିବା ପୂର୍ବରୁ ବାଟରେ ଗୋଟିଏ ଦିନର ବିଶ୍ରାମ ନେବାକୁ ପରାମର୍ଶ ଦିଆଯାଇଛି।
