କୋରୁକୋଣ୍ଡା, ୫।୫(ଡି.ଏନ୍.ଏ.) : ନିର୍ମାଣ ପରଠାରୁ ମାତ୍ର ୧୫ ଦିନ ଲୋକଙ୍କ ସେବାରେ ଲାଗିଛି। ତା’ପରଠାରୁ ତାଲା ପଡ଼ି ରହିଛି ଗୋଷ୍ଠୀ ଶୌଚାଳୟ। ଜନକଲ୍ୟାଣ ଉଦ୍ଦେଶ୍ୟରେ ବିଭିନ୍ନ ପ୍ରକଳ୍ପରେ କେନ୍ଦ୍ର ଓ ରାଜ୍ୟ ସରକାର ଖର୍ଚ୍ଚ କରୁଥିବା ଅର୍ଥ ଏପରି ଅପବ୍ୟୟ ହେଉଥିବା ନଜିର ସାମ୍ନାକୁ ଆସିଛି। ମାଲକାନଗିରି ଜିଲା କୋରୁକୋଣ୍ଡା ବ୍ଲକ ପୋଟ୍ରୋଲ ପଞ୍ଚାୟତରେ ନିର୍ମିତ ଗୋଷ୍ଠୀ ଶୌଚାଳୟ ଏହାର ଉଦାହରଣ।
ପୋଟ୍ରେଲ ଛକଠାରେ ୨୦୨୦-୨୧ ଆର୍ଥିକ ବର୍ଷରେ ସ୍ବଚ୍ଛ ଭାରତ ମିଶନ ପକ୍ଷରୁ ୩ ଲକ୍ଷ ଟଙ୍କା ବ୍ୟୟରେ ଏହି ଗୋଷ୍ଠୀ ଶୌଚଳୟ ନିର୍ମାଣ କରାଯାଇଥିଲା। ମାତ୍ର ଦୀର୍ଘଦିନ ଧରି ବିଦ୍ୟୁତ୍ ସଂଯୋଗ ନ ହେବାରୁ ଶୌଚାଳୟ ଲୋକଙ୍କ କାମରେ ଲାଗି ନ ଥିଲା। ଏନେଇ ବିଭିନ୍ନ ସମୟରେ ଅସନ୍ତୋଷ ପ୍ରକାଶ ପାଇବାରୁ ପ୍ରଶାସନ ସେଠାରେ ପାଣି ପାଇଁ ମୋଟର ଲଗାଇ ବିଦ୍ୟୁତ୍ ସଂଯୋଗ କରିଥିଲା। ଫଳରେ ଜନସାଧାରଣ ଏବଂ ବିଭିନ୍ନ କାର୍ଯ୍ୟରେ ଯାତାୟାତ ଲାଗି ସେଠାରେ ବସ୍କୁ ଅପେକ୍ଷା କରୁଥିବା ଯାତ୍ରୀଙ୍କ ମଧ୍ୟରେ ଖୁସି ପ୍ରକାଶ ପାଇଥିଲା। ମାତ୍ର ସେମାନଙ୍କ ଏହି ଖୁସି ୧୫ଦିନ ନ ପୁରୂଣୁ ମିଳେଇଯାଇଥିଲା। ଲଗାଯାଇଥିବା ମୋଟରଟି ଅଚଳ ହୋଇପଡିଥିଲା। ଫଳରେ ଏବେ ଏହି ଗୋଷ୍ଠୀ ଶୌଚାଳୟରେ ଦୀର୍ଘଦିନ ହେଲା ତାଲା ପଡିଛି। ମୋଟର ସଜାଡ଼ି ଏହାକୁ କାର୍ଯ୍ୟକ୍ଷମ କରିବା ଲାଗି ପଞ୍ଚାୟତ କିମ୍ବା ବ୍ଲକ ପ୍ରଶାସନ କେହି ଆଗ୍ରହ ପ୍ରକାଶ କରୁନାହାନ୍ତି। ଏନେଇ ପୋଟ୍ରେଲ ସରପଞ୍ଚ ଦାଇମତି ପଡ଼ିଆମିଙ୍କୁ ପଚାରିବାରୁ ସେ କହିଲେ, ଏ ସମ୍ପର୍କରେ ସେ ଗ୍ରାମପଞ୍ଚାୟତ ଅଧିକାରୀଙ୍କୁ ଜଣାଇଛନ୍ତି। ସେ କାମ ଠିକାଦାର ବୁଝିବେ ବୋଲି କହି ନୀରବ ରହିଛନ୍ତି। ଗ୍ରାମପଞ୍ଚାୟତ ଅଧିକାରୀଙ୍କୁ ପଚାରିବା ଲାଗି ତାଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ତାହା ସମ୍ଭବ ହୋଇ ନ ଥିଲା। ଗୋଷ୍ଠୀ ଶୌଚାଳୟକୁ ଜଳଯୋଗାଣ ଦାୟିତ୍ୱରେ ଥିବା କନିଷ୍ଠଯନ୍ତ୍ରୀ ସୁଗଡ଼ ହେମ୍ବ୍ରମଙ୍କୁ ପଚାରିବାରୁ ସେ କହିଲେ, ସେଠାକାର ସମସ୍ତ ଦାୟିତ୍ୱ ପାଣି ପଞ୍ଚାୟତ କମିଟିକୁ ହସ୍ତାନ୍ତର କରାଯାଇଛି। ସେ କାମ କମିଟି କରିବ। ତେବେ ପାଣି ପଞ୍ଚାୟତ କମିଟି ସଦସ୍ୟଙ୍କ ଦୃଷ୍ଟି ଆକର୍ଷଣ କରିବାରୁ ସେ କହିଲେ, ଜଳ ଯୋଗାଣ ଦାୟିତ୍ୱ ଆମକୁ ମିଳିଛି ସତ, ହେଲେ ଗୋଷ୍ଠୀ ଶୌଚାଳୟ ଦାୟିତ୍ୱ ଆମର ନୁହେଁ ବୋଲି କହିଥିଲେ।
