ବନ୍ତ,୨୯ ।୪(ଡି.ଏନ.ଏ./ସ୍ବ.ପ୍ର.): ଭଦ୍ରକ ଜିଲା ବନ୍ତ ବ୍ଲକ ଗୋପୀନାଥପୁର ପଞ୍ଚାୟତର ଅବ୍ୟବହୃତ ଅମରସିଂହପୁର ପ୍ରାଥମିକ ବିଦ୍ୟାଳୟ ଗୃହକୁ ହସ୍ତାନ୍ତର କରିବା ପାଇଁ ଆଞ୍ଚଳିକ ମଞ୍ଚ ପକ୍ଷରୁ ବ୍ଲକ ପ୍ରଶାସନକୁ ଲିଖିତ ଭାବେ ଜଣାଯାଇଛି। ଗତ ଦୁଇବର୍ଷରୁ ଊର୍ଦ୍ଧ୍ୱ ହେବ ଉକ୍ତ ସ୍କୁଲ ଉଚ୍ଛେଦ ହୋଇ କାଣ୍ଡବା ନୋଡାଲ ଉ.ପ୍ରା. ବିଦ୍ୟାଳୟ ସହ ମିଶ୍ରଣ ହୋଇଥିଲା। ଫଳରେ ଉକ୍ତ ବିଦ୍ୟାଳୟ ଗୃହ ଅବ୍ୟବହୃତ ହୋଇ ରହିଛି। ଉକ୍ତ ଗୃହକୁ ଅମରସିଂହପୁର ଆଞ୍ଚଳିକ ମଞ୍ଚର ଅଫିସ ଗୃହ ଭାବେ ବ୍ୟବହାର ପାଇଁ ଗୋପୀନାଥପୁର ପଞ୍ଚାୟତ ସ୍ତରୀୟ ମହିଳା ମହାସଂଘର ସଭାପତି ଭାରତୀ ଦାସ, ସମ୍ପାଦକ ସୀତା ରାଉଳ, ଆଞ୍ଚଳିକ ମଞ୍ଚର ସଭାନେତ୍ରୀ ରଶ୍ମିତା ବେହେରା, ସମ୍ପାଦିକା ବିଶ୍ୱଭାରତୀ ନାୟକ, ସରପଞ୍ଚ ସବିତାରାଣୀ ନାୟକ, ବିଭିନ୍ନ ସ୍ବୟଂସହାୟକ ଗୋଷ୍ଠୀର ସଭାନେତ୍ରୀ, ସମ୍ପାଦିକାଙ୍କ ସମେତ ସଭ୍ୟାମାନେ ବିଡିଓଙ୍କୁ ଦାବି ଜଣାଇଛନ୍ତି।
ପ୍ରକାଶ ଥାଉକି, ବ୍ଲକର ବିଭିନ୍ନ ପଞ୍ଚାୟତରେ କେତେକ ବିଦ୍ୟାଳୟ ଉଚ୍ଛେଦ ହୋଇ ନିକଟସ୍ଥ ବିଦ୍ୟାଳୟ ସହ ମିଶ୍ରଣ ହୋଇସାରିଛି। ଉଚ୍ଛେଦ ବିଦ୍ୟାଳୟ ଗୃହଗୁଡ଼ିକୁ ସମ୍ପୃକ୍ତ ପଞ୍ଚାୟତର ମହିଳା ମହାସଂଘ କିମ୍ବା ଆଞ୍ଚଳିକ ମଞ୍ଚକୁ ହସ୍ତାନ୍ତର କରାଇ କାର୍ଯ୍ୟରେ ଲଗାଇବାକୁ ରାଜ୍ୟ ସରକାର ସମସ୍ତ ଜିଲା ଓ ବ୍ଲକ ପ୍ରଶାସନକୁ ନିର୍ଦ୍ଦେଶ ଦେଇଥିବା ବେଳେ ଆନ୍ତରିକତା ଅଭାବ ଯୋଗୁ ଏହା ଠିକ୍ ଭାବେ କାର୍ଯ୍ୟକାରୀ ହୋଇପାରୁ ନ ଥିବା ଅଭିଯୋଗ ହେଉଛି।
