ନୂଆଦିଲ୍ଲୀ, ୨୮।୩ : ଦେଶରେ ଆଇଏଏସ୍ ଅଫିସରଙ୍କ ଅଭାବ ସୃଷ୍ଟି ହୋଇଛି। କ୍ୟାଡରରେ ୨୨ ପ୍ରତିଶତ ପଦବୀ ଖାଲି ପଡ଼ିଛି। ତେଣୁ ରାଜ୍ୟମାନେ କ୍ୟାଡର ପଦବୀରେ ଅଣ କ୍ୟାଡର ଅଧିକାରୀଙ୍କୁ ନିଯୁକ୍ତ କରିବାକୁ ବାଧ୍ୟ ହେଉଛନ୍ତି। ଭାରତୀୟ ପ୍ରଶାସନରେ ଆଇଏଏଏସ୍ ଅଫିସରଙ୍କ ବୃଦ୍ଧି ପାଉଥିବା ଆବଶ୍ୟକତାକୁ ଦୃଷ୍ଟିରେ ରଖି ସଂସଦୀୟ ଷ୍ଟାଣ୍ଡିଂ କମିଟି କାର୍ମିକ ଏବଂ ପ୍ରଶିକ୍ଷଣ ବିଭାଗକୁ ଆଇଏଏଏସ୍ ଅଫିସରଙ୍କ ବାର୍ଷିକ ସଂଖ୍ୟା ବୃଦ୍ଧି କରିବାକୁ ସୁପାରିଶ କରିଛି।
ଗତ ଥର ସିଭିଲ ସର୍ଭିସେସ ପରୀକ୍ଷା ୨୦୨୧ରେ ଆଇଏଏଏସ୍ ଅଫିସରଙ୍କ ବାର୍ଷିକ ନିଯୁକ୍ତିକୁ ବୃଦ୍ଧି କରାଯାଇଥିଲା। ଏବେ ୨୦୨୨ର ସିଭିଲ ସର୍ଭିସେସ ପରୀକ୍ଷାରେ ଆଇଏଏଏସ୍ ଅଫିସରଙ୍କ ସଂଖ୍ୟା ନିର୍ଣ୍ଣୟ କରିବା ପାଇଁ ଏକ ଉପଯୁକ୍ତ ସମାଧାନ ଖୋଜିବାକୁ ଚେଷ୍ଟା କରାଯାଉଛି। ଏଥିପାଇଁ ସରକାରଙ୍କ ଦ୍ୱାରା ଏକ କମିଟି ଗଠନ କରାଯାଇଛି।
ପର୍ସନାଲ, ଜନସାଧାରଣଙ୍କ ଅଭିଯୋଗ, ଆଇନ ଏବଂ ନ୍ୟାୟ ଅର୍ନ୍ତଗତ ସଂସଦର ସ୍ଥାୟୀ କମିଟି ଗତ ସପ୍ତାହରେ ସଂସଦରେ ୧୧୨ ତମ ରିପୋର୍ଟ ଉପସ୍ଥାପନ କରିଛି। ଏହି ରିପୋର୍ଟ ଅନୁଯାୟୀ, ଆଇଏଏଏସ୍ ଅଫିସରଙ୍କ ପ୍ରାଧିକୃତ ଶକ୍ତି ହେଉଛି ୬,୭୪୬। ଯେଉଁଥିରେ ଭାରତୀୟ ସିଭିଲ ସର୍ଭିସେସ ପରୀକ୍ଷଣ ମାଧ୍ୟମରେ ପଦୋନ୍ନତି ପାଇଥିବା ଅଧିକାରୀଙ୍କ ପାଇଁ ୪,୬୮୨ଟି ପଦବୀ ଏବଂ ରାଜ୍ୟ ପବ୍ଲିକ୍ ସର୍ଭିସ୍ କମିଶନରୁ ଆଇଏଏସ୍ କ୍ୟାଡରକୁ ପଦୋନ୍ନତି ପାଇଥିବା ଅଧିକାରୀଙ୍କ ପାଇଁ ୨,୦୬୪ଟି ପଦବୀ ରହିଛି।
ବର୍ତ୍ତମାନ, ପୋଷ୍ଟ ହୋଇଥିବା ଆଇଏଏଏସ୍ ଅଫିସରଙ୍କ ସଂଖ୍ୟା ମାତ୍ର ୫,୨୩୧ ରହିଛି। ଯେଉଁଥିରୁ ୩,୭୮୭ ଜଣ ସିଧାସଳଖ ନିଯୁକ୍ତି ଦ୍ୱାରା ଆଇଏଏସ୍ କ୍ୟାଡରରେ ଯୋଗ ଦେଇଛନ୍ତି ଏବଂ ୧,୪୪୪ଟି ପଦବୀରେ ଅଫିସରମାନେ ରାଜ୍ୟ ସିଭିଲ ସର୍ଭିସରୁ ପଦୋନ୍ନତି ପାଇଛନ୍ତି।
ଜମ୍ମୁ-କଶ୍ମୀରରେ ୫୭ ପ୍ରତିଶତ ଆଇଏଏସ୍ ଅଫିସରଙ୍କ ପଦବୀ ଖାଲି ଅଛି। ସେହିପରି ତ୍ରିପୁରାରେ ୪୦ ପ୍ରତିଶତ, ନାଗାଲାଣ୍ଡରେ ୩୭.୨ ପ୍ରତିଶତ, କେରଳରେ ୩୨ ପ୍ରତିଶତ ଏବଂ ଝାଡଖଣ୍ଡରେ ୩୧ ପ୍ରତିଶତ ପଦବୀ ଖାଲି ଅଛି। ଖାଲିଥିବା ଆଇଏଏସ୍ ଅଫିସରଙ୍କ ପଦବୀଗୁଡ଼ିକର ସର୍ବନିମ୍ନ ପ୍ରତିଶତ ହେଉଛି ତାମିଲନାଡୁ। ଏଠାରେ ୧୪.୩ ପ୍ରତିଶତ ପଦବୀ ଖାଲି ରହିଛି। ମଧ୍ୟପ୍ରଦେଶ ୧୪.୭ ପ୍ରତିଶତ, ହରିୟାଣା ୧୫.୮ ପ୍ରତିଶତ ଏବଂ ଉତ୍ତରପ୍ରଦେଶ ୧୫.୯ ପ୍ରତିଶତ ଆଇଏଏସ୍ ଅଫିସରଙ୍କ ପଦବୀ ଖାଲି ପଡ଼ିଛି।
ସଂସଦୀୟ ଷ୍ଟାଣ୍ଡିଂ କମିଟି ଦ୍ୱାରା ଉପସ୍ଥାପିତ ହୋଇଥିବା ରିପୋର୍ଟରେ କୁହାଯାଇଛି ଯେ କେତେକ ରାଜ୍ୟରେ ଅଣ କ୍ୟାଡର ଅଧିକାରୀଙ୍କୁ ଆଇଏଏସ୍ କ୍ୟାଡର ପଦରେ ନିଯୁକ୍ତ କରାଯାଉଛି। ଏହା ଭାରତୀୟ ପ୍ରଶାସନିକ ସେବା (ଆଇଏଏସ୍) କ୍ୟାଡର ନିୟମ, ୧୯୫୪ ର ନିୟମ ୯ ର ଉଲ୍ଲଂଘନ କରୁଛି ।
ଭାରତୀୟ ପ୍ରଶାସନିକ ସେବା (ଆଇଏଏସ୍) କ୍ୟାଡର ନିୟମ, ୧୯୫୪ର ନିୟମ ୯ ରାଜ୍ୟଗୁଡ଼ିକୁ ଅଣ-ଆଇଏଏସ୍ ଅଧିକାରୀଙ୍କୁ କ୍ୟାଡର ପଦବୀରେ ନିଯୁକ୍ତ କରିବାକୁ ଅନୁମତି ଦେଇଥାଏ ଯଦି ଖାଲି ପଦବୀ ପୂରଣ ପାଇଁ ଉପଯୁକ୍ତ କ୍ୟାଡର ଅଧିକାରୀ ଉପଲବ୍ଧ ନଥାନ୍ତି। ଯଦି ଜଣେ ଆଇଏଏସ୍ କ୍ୟାଡର ଅଧିକାରୀ ଉପଲବ୍ଧ ତେବେ ଅଣ-କ୍ୟାଡର ଅଧିକାରୀଙ୍କୁ ବଦଳାଇବାକୁ ପଡିବ। ଜଣେ ଅଣ-କ୍ୟାଡର ଅଧିକାରୀଙ୍କୁ ୩ ମାସରୁ ଅଧିକ ସମୟ ପାଇଁ ଆଇଏଏସ୍ କ୍ୟାଡର ପଦରେ ରହିବାକୁ ପଡିବା ସ୍ଥଳେ ରାଜ୍ୟ ସରକାରଙ୍କୁ କେନ୍ଦ୍ରର ଅନୁମୋଦନ ନେବାକୁ ପଡିବ।
