ପଟ୍ଟାଙ୍ଗୀ, ୨୧।୩(ଡି.ଏନ.ଏ.): ମା’ ଓ ଶିଶୁ ମୃତ୍ୟୁ ରୋକିବାକୁ ପ୍ରଶାସନ ଓ ବିଭିନ୍ନ ବେସରକାରୀ ଅନୁଷ୍ଠାନ ପକ୍ଷରୁ ଗ୍ରାମାଞ୍ଚଳ ଲୋକଙ୍କୁ ସଚେତନ କରାଯାଉଥିଲେ ମଧ୍ୟ ଏହାର ପ୍ରଭାବ ଲୋକଙ୍କ ଉପରେ ପଡୁନାହିଁ । ଫଳରେ ଶିଶୁମୃତ୍ୟୁକୁ ରୋକି ହେଉନାହିଁ। ଗୋଟିଏ ମାସରେ ୫ ନବଜାତ ଶିଶୁ ମୃତ୍ୟୁବରଣ କରିବା ପରି ଘଟଣା କୋରାପୁଟ ଜିଲା ପଟ୍ଟାଙ୍ଗୀ ବ୍ଲକ ଅନ୍ତର୍ଗତ ତଥା ଅମ୍ପାବାଲି ପଞ୍ଚାୟତର ଚିକାପାରୁ ଗ୍ରାମରେ ଘଟିଛି। ଏହି ଗ୍ରାମରେ ବସବାସ କରୁଥିବା ମାରି ସିମାଦ୍ରିଙ୍କ ଏକ ଶିଶୁପୁତ୍ର ସ୍ବାସ୍ଥ୍ୟକେନ୍ଦ୍ରରେ ଜନ୍ମ ହୋଇଥିଲା। ମାତ୍ର ଜନ୍ମ ସମୟରେ ଶିଶୁପୁତ୍ରଟି ଭଲ ଥିବା ବେଳେ ଗ୍ରାମକୁ ଫେରିବା ପରେ ପରିବାର ଲୋକେ ଶିଶୁକୁ ହଳଦୀ ଲଗାଇ ଥଣ୍ଡା ପାଣିରେ ଗାଧୋଇ ଦେଇଥିଲେ। ଯାହାଦ୍ୱାରା ଶିଶୁଟିକୁ ଥଣ୍ଡା ଜ୍ୱର ସହ ନିମୋନିଆ ହୋଇଥିଲା । ଏଥିରେ ତାର ମୃତ୍ୟୁ ହୋଇଥିଲା। ସେହିପରି ଗ୍ରାମର ମାରି ନାଇଡୁଙ୍କ ୨୧ ଦିନର ଶିଶୁୁ, ମାରି ସମାରଙ୍କ ଦୁଇ ମାସର ଶିଶୁ ଏବଂ ମାରି ଭାସ୍କରଙ୍କ ତିନି ମାସର ଶିଶୁର ନିମୋନିଆରେ ମୃତ୍ୟୁ ହୋଇଛି ଗେମେଲ ଲିଙ୍ଗୁଙ୍କ ଦେଢ ମାସର ଶିଶୁ ପୁତ୍ର ଝାଡାରେ ଆକ୍ରାନ୍ତ ହୋଇ ତାର ମୃତ୍ୟୁ ଘଟିଥିବା ଜଣାପଡିଛି। ଏନେଇ ସୂଚନା ପାଇ ସୁଙ୍କି ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରୁ ଏକ ଡାକ୍ତରୀ ଟିମ୍ ଚିକାପାରୁ ଗ୍ରାମରେ ପହଞ୍ଚତ୍ ମୃତ୍ୟୁବରଣ କରିଥିବା ଶିଶୁଙ୍କ ପରିବାର ବର୍ଗଙ୍କ ସହ ଆଲୋଚନା କରିଛନ୍ତି। ଗ୍ରାମରେ ଥିବା ଅନ୍ୟ ଶିଶୁମାନଙ୍କ ସ୍ବାସ୍ଥ୍ୟ ପରୀକ୍ଷା କରି ପରିବାର ଲୋକଙ୍କୁ ବୁଝାଇ ଫେରିଛନ୍ତି । ସୂଚନାଯୋଗ୍ୟ, ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ପକ୍ଷରୁ ପ୍ରତି ମାସରେ ଅଙ୍ଗନଓ୍ବାଡ଼ି କେନ୍ଦ୍ରରେ ହେଉଥିବା ଭିଲେଜ ହେଲଥ ନିୟୁଡ୍ରେସନ ଡେ କାର୍ଯ୍ୟକ୍ରମରେ ଏହି ଶିଶୁମାନଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇ ଔଷଧ ପ୍ରଦାନ କରାଯାଇଥିଲା। ଶିଶୁମାନଙ୍କୁ ଥଣ୍ଡା ପାଣିରେ ନ ଗାଧୋଇବା ଲାଗି ପରିବାର ଲୋକଙ୍କୁ ଅବଗତ କରାଯାଇଥିଲା। ମାତ୍ର ପରିବାର ଲୋକେ ଏହି ପରାମର୍ଶ ନ ମାନି ଶିଶୁମାନଙ୍କୁ ଥଣ୍ଡା ପାଣିରେ ଗାଧୋଇବାରୁ ସେମାନେ ନିମୋନିଆରେ ଆକ୍ରାନ୍ତ ହୋଇଥିଲେ।
