ଖୋର୍ଦ୍ଧା ଅଫିସ,୩ା୩: ପୌର ନିର୍ବାଚନ ପାଇଁ ବୁଧବାରଠାରୁ ନାମାଙ୍କନପତ୍ର ଦାଖଲ ପ୍ରକ୍ରିୟା ଆରମ୍ଭ ହୋଇଛି। ୩ବର୍ଷ ପରେ ପୌର ନିର୍ବାଚନ ହେବାକୁ ଯାଉଥିବାରୁ ଦଳୀୟ କର୍ମୀଙ୍କ ମଧ୍ୟରେ ବେଶ୍ ଉତ୍ସାହ ପ୍ରକାଶ ପାଇଛି। ନାମାଙ୍କନପତ୍ର ଦାଖଲ ପ୍ରକ୍ରିୟା ବୁଧବାରଠାରୁ ଆରମ୍ଭ ହୋଇଯାଇଥିବାରୁ କିଏ ଦଳୀୟ ପ୍ରାର୍ଥୀ ହେବେ, ସେନେଇ ଜୋରଦାର ଅଙ୍କକଷା ଚାଲିଛି। ତେବେ ପୌର ନିର୍ବାଚନରେ ବିରୋଧୀ କେତେ ପ୍ରଭାବ ଦେଖାଇପାରିବେ ତାହା ଏବେଠୁ କହିବା କଷ୍ଟକର। କାରଣ, ସଦ୍ୟ ସମାପ୍ତ ହୋଇଥିବା ପଞ୍ଚାୟତ ନିର୍ବାଚନରେ ବିରୋଧୀ ସମ୍ପୂର୍ଣ୍ଣ ଭାବେ ଧରାଶାୟୀ ହୋଇଛନ୍ତି। ସବୁଠି ଶାସକ ଦଳ ବିଜେଡି ବାଜି ମାରିନେଇଛି। ଖୋର୍ଦ୍ଧା ଜିଲାରେ ଭୁବନେଶ୍ୱର ଏମ୍ପି ଅପରାଜିତା ଷଡ଼ଙ୍ଗୀ ଏବଂ ଜଟଣୀ ବିଧାୟକ ସୁରେଶ କୁମାର ରାଉତରାୟଙ୍କ ରଣନୀତି ଫେଲ୍ ମାରିଛି। ୩୦ରୁ ୨୮ ଜିଲା ପରିଷଦ ଆସନରେ ବିଜେଡି ଏକତରଫା ଭାବେ ବିଜୟ ଲାଭ କରିଛି। ଏଣୁ ଏହି ଫଳାଫଳ ପୌର ନିର୍ବାଚନରେ ପ୍ରଭାବ ପକାଇବ ଏବଂ ବିଜେଡି ପୁଣି ବାଜିମାତ୍ କରିବ ବୋଲି ଚର୍ଚ୍ଚା ହେଉଛି।
ନିର୍ବାଚନ ପାଇଁ ୩ ପ୍ରମୁଖ ଦଳ ବିଜେଡି, ଭାଜପା ଓ କଂଗ୍ରେସ ଏପର୍ଯ୍ୟନ୍ତ ପ୍ରାର୍ଥୀ ତାଲିକା ପ୍ରକାଶ କରିନାହାନ୍ତି। ବିଜେଡି ଟିକେଟ ପାଇଁ ଦଳୀୟ ନେତା ଓ ବିଧାୟକଙ୍କ ନିକଟରେ କର୍ମୀଙ୍କ ଲମ୍ବାଧାଡ଼ି ଲାଗୁଛି। ପ୍ରତି ୱାର୍ଡରେ ୪ରୁ ୫ଜଣ ଆଶାୟୀ ରହିଛନ୍ତି। ଏପରି କି କେତେଜଣ ଆଶାୟୀ ଦଳୀୟ ନେତାଙ୍କ ଫଟୋ ଥାଇ ପୋଷ୍ଟର ଓ ବ୍ୟାନର ମାରିସାରିଲେଣି। ଅନ୍ୟ କେତେଜଣ ସମସ୍ୟା ସବୁ ସମାଧାନ କରିଦେବେ ବୋଲି କହି ବୁଲିଲେଣି। ତେଣୁ ରାଜନୀତି ପାଣିପାଗ ଉଷ୍ମ ହେବାରେ ଲାଗିଛି। ବିଜେଡି ପକ୍ଷରୁ ତାଲିକା ଚୂଡ଼ାନ୍ତ ହୋଇ ନ ଥିଲେ ବି ପ୍ରତି ୱାର୍ଡରୁ ୩ଜଣ ନାମ ସଭାପତିଙ୍କ ପାଖକୁ ପଠାଯାଇଛି। ସେଠାରୁ ନିର୍ଦ୍ଦେଶ କ୍ରମେ ପ୍ରାର୍ଥୀଙ୍କ ନାମ ଘୋଷଣା କରାଯିବ। ସେହିପରି କଂଗ୍ରେସ ଓ ଭାଜପା ମଧ୍ୟ ନୀରବ ରହିଛି।
ଏଥର ପୌରାଧ୍ୟକ୍ଷ ପଦବୀ ମହିଳାଙ୍କ ପାଇଁ ଉଦ୍ଦିଷ୍ଟ ଥିବାବେଳେ ସିଧାସଳଖ ଭୋଟ ହେବ। ତେଣୁ ଏହି ପଦବୀ ଲାଗି ବିଜେଡିରେ ଆଶାୟୀଙ୍କ ତାଲିକା ଲମ୍ବିବାରେ ଲାଗିଛି। କେତେଜଣ ବରିଷ୍ଠ କର୍ମୀ ନିଜ ସ୍ତ୍ରୀ, ଝିଅ କିମ୍ବା ସମ୍ପର୍କୀୟଙ୍କ ପାଇଁ ଲବି କରୁଥିବା ଜଣାପଡ଼ିଛି। ପୌରାଧ୍ୟକ୍ଷା ପଦବୀ ପାଇଁ ୧୫ରୁ ଊର୍ଦ୍ଧ୍ୱ ଆଶାୟୀ ରହିଥିବା ସୂଚନା ମିଳିଛି। ସେହିପରି ଏହି ଦୌଡ଼ର ଆଗ ଧାଡ଼ିରେ ଦୁଇ ବିଧାୟକଙ୍କ ପରିବାର ରହିଛନ୍ତି। ବେଗୁନିଆ ବିଧାୟକ ରାଜେନ୍ଦ୍ର ସାହୁଙ୍କ ସହଧର୍ମିଣୀ ସଂଯୁକ୍ତା ସାହୁ ୨୦୧୩ରେ ପୌରାଧ୍ୟକ୍ଷା ରହିଥିଲେ। ଚଳିତ ନିର୍ବାଚନରେ ପୁଣି ତାଙ୍କୁ ପୌରାଧ୍ୟକ୍ଷା ଆସନରେ ବସାଇବା ପାଇଁ ଯୋଜନା ଚାଲିଛି। ଅନ୍ୟପକ୍ଷରେ ପୋଖତ ରାଜନେତା ଭାବେ ପରିଚିତ ଖୋର୍ଦ୍ଧା ବିଧାୟକ ଜ୍ୟୋତିରୀନ୍ଦ୍ରନାଥ ମିତ୍ର ମଧ୍ୟ ସହଧର୍ମିଣୀ ପ୍ରଫେସର ମମତା ଦେଙ୍କୁ ପୌରାଧ୍ୟକ୍ଷା ଆସନରେ ବସାଇବା ପାଇଁ ଲବି ଚଳାଇଥିବା ଶୁଣିବାକୁ ମିଳୁଛି। ତେବେ ଏ ନେଇ ସମ୍ପୃକ୍ତ ବିଧାୟକ ଦ୍ୱୟଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ। ଦଳର ବିଭିନ୍ନ ସାଙ୍ଗଠନିକ ଦାୟିତ୍ୱରେ ଥିବା ବହୁ ବରିଷ୍ଠ କର୍ମୀ ମଧ୍ୟ ଟିକେଟ ଲାଗି ଲବି ଚଳାଇଛନ୍ତି। ଅନ୍ୟପଟେ ଭାଜପା ଓ କଂଗ୍ରେସ ବତ୍ତର୍ର୍ମାନ ନେତୃତ୍ୱବିହୀନ ହୋଇପଡ଼ିଥିବା ଓ ଦଳରେ କନ୍ଦଳ ଥିବା ଆଲୋଚନା ହେଉଛି। ତେଣୁ ଉଭୟ ଦଳ ପକ୍ଷରୁ ବର୍ତ୍ତମାନ ସୁଦ୍ଧା ପ୍ରାର୍ଥୀ ତାଲିକା ସ୍ଥିର ହୋଇ ନ ଥିବା କୁହାଯାଉଛି।
