ନୂଆଦିଲ୍ଲୀ,୧୨।୭: ସୀମାରେ ମୁତୟନ ଥିବା ବିଏସ୍ଏଫ୍ ଯବାନମାନେ ଏକ ନିଆରା ପଦକ୍ଷେପ ଗ୍ରହଣ କରିଛନ୍ତି। ସୀମାରେ ଚୋରା ଚାଲାଣ ହେଉଥିବା ବିରଳ ପ୍ରଜାତିର କଇଁଛ ଓ କଙ୍କଡା ସମେତ ୧୮ହଜାରରୁ ଉର୍ଦ୍ଧ୍ୱ ପକ୍ଷୀଙ୍କୁ ଉଦ୍ଧାର କରି ନୂଆ ଜୀବନ ଦେଇଛନ୍ତି ବିଏସ୍ଏଫ୍ର ସୁରକ୍ଷାକର୍ମୀ। ଏହି ସବୁ ଜୀବଙ୍କୁ ଅନ୍ତଃରାଷ୍ଟ୍ରୀୟ ବଜାରରେ ଚୋରାଚାଲଣକାରୀମାନେ ଚଢ଼ା ଦରରେ ବିକ୍ରି କରିିବା ସହ ଲକ୍ଷ ଲକ୍ଷ ଟଙ୍କା ଆୟ କରୁଥିବା ଅଭିଯୋଗ ହୋଇଛି। ଦେଶର ସୀମା ସୁରକ୍ଷାର ଦାୟିତ୍ୱ ଯବାନଙ୍କ ଉପରେ ରହିଥିବା ବେଳେ ଦେଶର ବନ୍ୟପ୍ରାଣୀ ବା ଜୀବଜନ୍ତୁ ଏହି ସୁରକ୍ଷାରୁ ବାଦ୍ ପଡ଼ିବେ ବା କିପରି । ବିଲୁପ୍ତ ପ୍ରଜାତିର ଜୀବଜନ୍ତୁମାନେ ରାଜସ୍ତାନ, ଗୁଜରାଟ, ପଶ୍ଚିମ ବଙ୍ଗ, ଜମ୍ମୁ କଶ୍ମୀର, ମିଜୋରାମ ସମେତ ଅନ୍ୟ କିଛି ସୀମାରେ ଏମାନଙ୍କୁ ଦେଖିବାକୁ ମିଳିଥାଏ। ସୀମାରେ ଚୋରାଚାଲାଣକାରୀମାନେ ସମୁଦ୍ର ଉପକୂଳରେ ଥିବା ଦେଶରେ ପାରା, କପୋତ, ଏମୁ, କଙ୍କଡା ଓ କଇଁଛ ଆଦିଙ୍କୁ ଫଳ ବାକ୍ସ ଓ କଣା ଥିବା ଡବାରେ ଭର୍ତ୍ତି କରି ଚାଲାଣ କରିବା ସହ ଲକ୍ଷାଧିକ ଟଙ୍କା ରୋଜଗାର କରିଥାନ୍ତି। ଏମାନେ ସୀମାରେ ପ୍ରବେଶ କରିବା ଓ ବିଏସ୍ଏଫ୍ଙ୍କ ଆଖିରେ ଧୂଳି ଦେବା ଲାଗି ବନ୍ୟବିଭାଗଠାରୁ ନକଲି ଅନୁମତି ପତ୍ର ତିଆରି କରିଥାନ୍ତି। ସେହିପରି ଗତ ସପ୍ତାହରେ ବିଏସ୍ଏଫ୍ ଡିଆରଆଇ ସହ ମିଳିତ କାର୍ଯ୍ୟାନୁଷ୍ଠାନରେ ଆଇଜଲରୁ ୮ଚୋରାଚାଲାଣକରୀଙ୍କୁ ଗିରଫ କରିବା ସହ ୨୩ଟି ପାରା, ଏମୁ ଓ କପୋତକୁ ଜବତ କରାଯାଇଥିଲା। ଏମାନଙ୍କର ମୂଲ୍ୟ ପ୍ରାୟ ୨୮ଲକ୍ଷ ହେବ ବୋଲି ଜଣାପଡ଼ିଛି।
