ତିଗିରିଆ, ୨୩।୧ (ଡି.ଏନ୍.ଏ.): ତିଗିରିଆ ଥାନା ଅନ୍ତର୍ଗତ ଅଚଳକୋଟ ପଞ୍ଚାୟତରେ ସରପଞ୍ଚ ପଦବୀରେ ନାମାଙ୍କନପତ୍ର ଦାଖଲ ପରେ ରାଜନୈତିକ ଆକ୍ରୋଶ ଦେଖିବାକୁ ମିଳିଛି। ଏହି ପଞ୍ଚାୟତ ଅନ୍ତର୍ଗତ ବଡ଼ପାଟଣା ଗ୍ରାମର ଜଣେ ଅବସରପ୍ରାପ୍ତ ଶିକ୍ଷକଙ୍କ ସ୍ତ୍ରୀ ପ୍ରାର୍ଥିପତ୍ର ଦାଖଲ କରିବାରୁ ତାଙ୍କ ୨ ଏକର ଜମିରୁ ଅମଳ ହୋଇଥିବା ଧାନ ଗଦାରେ ଶନିବାର କୌଣସି ଦୁର୍ବୃତ୍ତ ନିଆଁ ଲଗାଇଦେଇଥିବା ଥାନାରେ ଅଭିଯୋଗ ହୋଇଛି। ସମ୍ପୃକ୍ତ ପ୍ରାର୍ଥୀ ଜଣକ ହେଲେ ସୁଜାତା ସ୍ବାଇଁ। ସ୍ବାମୀ ଧ୍ରୁବଚରଣ ସ୍ବାଇଁ ଥାନାରେ କରିଥିବା ଅଭିଯୋଗ ଅନୁଯାୟୀ, ସୁଜାତା ପ୍ରାର୍ଥତ୍ପତ୍ର ଦାଖଲ କରିବା ପରେ କେତେଜଣ ବିରୋଧୀ ତାଙ୍କ ଘରକୁ ଆସି ଗାଳିଗୁଲଜ କରିବା ସହ ପ୍ରାର୍ଥତ୍ତ୍ୱ ପ୍ରତ୍ୟାହାର ନ କଲେ ପରିସ୍ଥିତି ଭୟାନକ ହେବ ବୋଲି କହିଥିଲେ। ଏପରିକି ଘରଦ୍ୱାର ଜାଳି ଦିଆଯିବ ବୋଲି ଧମକ ଦେଇଥିଲେ। ଶନିବାର ଭୋର ସମୟରେ ଧ୍ରୁବଚରଣ ଚାଲିବା ପାଇଁ ବାହାରକୁ ଯାଇଥିବା ବେଳେ ତାଙ୍କର ଧାନଗଦାରେ ନିଆଁ ଲାଗିଥିବା ଖବର ପାଇ ତିଗିରିଆ ଦମକଳ ବାହିନୀକୁ ଜଣାଇଥିଲେ। ଏହାପରେ ଦମକଳ କର୍ମଚାରୀ ପହଞ୍ଚତ୍ ନିଅଁାକୁ ଆୟତ୍ତ କରିଥିଲେ। ମାତ୍ର ସେତେବେଳକୁ ସବୁ ଧାନ ଜଳିଯାଇଥିଲା। ଏନେଇ ଥାନାରେ ଅଭିଯୋଗ ପରେ ପୋଲିସ ଘଟଣାସ୍ଥଳକୁ ଯାଇ ତଦନ୍ତ କରିଛି ବୋଲି ଆଇଆଇସି ସୁଚିତ୍ରା ଜେନା କହିଛନ୍ତି।
