ଶିକ୍ଷାଦାନ ସହ ଜୈବିକ ଫଳ ଓ ପରିବା ଉତ୍ପାଦନ କରି ଏକ ଉଦାହରଣ ସୃଷ୍ଟି କରିଛି ବେଙ୍ଗାଲୁରୁର ବିଶ୍ୱ ବିଦ୍ୟାପୀଠ ସ୍କୁଲ। ସ୍କୁଲର ଡାଇରେକ୍ଟର ସୁଶୀଳା ସନ୍ତୋଷଙ୍କ ଦ୍ୱାରା ଏହା ସମ୍ଭବ ହୋଇପାରିଛି। ଉପତ୍ାଦିତ ପନିପରିବାରେ ୧,୪୦୦ ଛାତ୍ରୀଛାତ୍ର ଓ ଶିକ୍ଷକଙ୍କୁ ମାଗଣାରେ ଖାଇବାକୁ ଦିଆଯାଉଛି। ଲକ୍ଡାଉନ ସମୟରେ ଶିକ୍ଷକ ଓ ଅଣଶିକ୍ଷକଙ୍କ ସାହାଯ୍ୟରେ ସୁଶୀଳା ଏହି କାର୍ଯ୍ୟ ଆରମ୍ଭ କରିଥିଲେ । ଲକ୍ଡାଉନ ପରେ ମଧ୍ୟ ତାହା ଜାରି ରଖିଛନ୍ତି। ଋତୁ ଅନୁଯାୟୀ ପର୍ଯ୍ୟାୟକ୍ରମେ ପରିବା ଚାଷ କରାଯାଉଛି। ଅମୃତଭଣ୍ଡା, କଦଳୀ ଚାଷ ଉପରେ ବେଶି ଗୁରୁତ୍ୱ ପ୍ରଦାନ କରାଯାଉଛି। ସ୍କୁଲରେ ମଧ୍ୟ ଏକ ବଗିଚା କରିଛନ୍ତି ସୁଶୀଳା। ଏଥିରେ ୪୦ ପ୍ରକାର ଔଷଧୀୟ ଗଛ ଲଗାଯାଇଛି। ସ୍କୁଲ ହତା ମଧ୍ୟରେ କମ୍ପୋଷ୍ଟ ପିଟ୍ ନିର୍ମାଣ କରାଯାଇ ସେଥିରେ ଝଡ଼ାପତ୍ରରୁ ଜୈବିକ ଖତ ପ୍ରସ୍ତୁତ କରାଯାଇ ଚାଷରେ ପ୍ରୟୋଗ କରାଯାଉଛି। ବର୍ଷାଜଳ ସଂରକ୍ଷଣ କରାଯାଇ ତାହାକୁ ଚାଷରେ ଲଗାଯାଉଛି। ଏପରି କି ସ୍କୁଲ୍ କ୍ୟାମ୍ପସ ମଧ୍ୟରେ ଲଗାଯାଇଥିବା ୨୦୦ କଦଳୀ ଗଛରେ ପାଣି ଦେବା ଲାଗି ଏକ ଓ୍ବାଟର ଚ୍ୟାନେଲ ନିର୍ମାଣ କରାଯାଇଛି। ସ୍କୁଲର ସବୁପିଲା ଓ ଶିକ୍ଷକମାନଙ୍କୁ ମାଗଣାରେ ଖାଦ୍ୟ ପରଷା ଯାଉଛି।
