ଓ୍ବାଶିଂଟନ,୩୧ା୧୨: ଆମେରିକାରେ କରୋନା ଭୂତାଣୁ ଏବଂ ଓମିକ୍ରନର ସର୍ବାଧିକ ପ୍ରଭାବ ଦେଖିବାକୁ ମିଳୁଛି। ଏଠାରେ ପ୍ରତିଦିନ ଅଢ଼େଇ ଲକ୍ଷରୁ ଅଧିକ କରୋନା ମାମଲା ପଞ୍ଜୀକୃତ ହେଉଛି। ଏହି ସମୟରେ ରୋଗ ନିୟନ୍ତ୍ରଣ ଏବଂ ନିରାକରଣ କେନ୍ଦ୍ର କହିଛି, ବର୍ତ୍ତମାନ ପିଲାମାନଙ୍କଠାରେ କରୋନା ଭୂତାଣୁ ଅତି ଦ୍ରୁତ ଗତିରେ ବୃଦ୍ଧି ପାଇବାରେ ଲାଗିଛି। ଫଳରେ ରେକର୍ଡ ସଂଖ୍ୟକ ଶିଶୁ ଡାକ୍ତରଖାନାରେ ଭର୍ତ୍ତି ହେଉଛନ୍ତି। ଏମାନଙ୍କ ମଧ୍ୟରୁ ଅଧିକାଂଶ ଯେଉଁମାନେ ଟିକାକରଣ କରିନାହାନ୍ତି। ଏଥିପାଇଁ ଡାକ୍ତରମାନେ ମଧ୍ୟ ଦୁଃଖ ପ୍ରକାଶ କରିଛନ୍ତି। ଏହା ଅତ୍ୟନ୍ତ ହୃଦୟ ବିଦାରକ ବୋଲି ଫିଲାଡେଲଫିଆର ଶିଶୁ ହସ୍ପିଟାଲର ସଂକ୍ରାମକ ରୋଗ ବିଶେଷଜ୍ଞ ଡକ୍ଟର ପଲ ଆଫିଟ୍ କହିଛନ୍ତି। ଗତବର୍ଷ ଏହା ଯଥେଷ୍ଟ କଠିନ ଥିଲା, କିନ୍ତୁ ବର୍ତ୍ତମାନ ଏହାକୁ ବନ୍ଦ କରିବା ପାଇଁ ଏକ ଉପାୟ ଅଛି। ତଥାପି ସ୍ଥିତି ଅସମ୍ଭାଳ।
ରୋଗ ନିୟନ୍ତ୍ରଣ ଏବଂ ନିରାକରଣ କେନ୍ଦ୍ର ପକ୍ଷରୁ ପ୍ରକାଶ ଯେ, ଡିସେମ୍ବର ୨୨ରୁ ୨୮ ମଧ୍ୟରେ ହାରାହାରି ୩୭୮ପିଲା ୧୭ ବର୍ଷରୁ କମ୍ ବୟସର ଡାକ୍ତରଖାନାରେ ଭର୍ତ୍ତି ହୋଇଥିଲେ। ପୂର୍ବ ତୁଳନାରେ ଏହି ସପ୍ତାହରେ ୬୬ ପ୍ରତିଶତ ବୃଦ୍ଧି ଦେଖିବାକୁ ମିଳିଛି। ସିଡିସି ଅନୁଯାୟୀ,ସେପ୍ଟେମ୍ବର ଆରମ୍ଭରେ ଏହିପରି ପ୍ରଥମ ସଂଖ୍ୟକ ମାମଲା ରିପୋର୍ଟ ହୋଇଥିଲା। ଏହି ସମୟରେ ପ୍ରତିଦିନ ହାରାହାରି ୩୪୨ ପିଲା ଡାକ୍ତରଖାନାରେ ଭର୍ତ୍ତି ହୋଇଥିଲେ।