ମେକ୍ସିକୋ ସିଟି,୧୫।୧୨: ଉତ୍ତର ହାଇତିରେ ଏକ ଇନ୍ଧନ ପରିବହନକାରୀ ଟ୍ୟାଙ୍କର ବିସ୍ଫୋରଣ ହେବା ଯୋଗୁ ୬୦ ରୁ ଅଧିକ ଲୋକଙ୍କର ମୃତ୍ୟୁ ଘଟିଛି ଏବଂ ଅନେକ ଲୋକ ଆହତ ହୋଇଛନ୍ତି। ଗଣମାଧ୍ୟମ ରିପୋର୍ଟ ଅନୁଯାୟୀ, ହାଇତିର ଉତ୍ତର ବନ୍ଦର ସହର କ୍ୟାପ-ହାତିୟନରେ ଏହି ବିସ୍ଫୋରଣ ଘଟିଛି ବୋଲି ପ୍ରଧାନମନ୍ତ୍ରୀ ଏରିୟଲ ହେନେରୀ ମଙ୍ଗଳବାର ଟୁଇଟ କରି ସରକାରଙ୍କ ତରଫରୁ ହାଇତିବାସୀଙ୍କୁ ସମବେଦନା ଜଣାଇଛନ୍ତି। ସେ କହିଛନ୍ତି ଯେ ପୀଡିତଙ୍କ ସ୍ମୃତିରେ ତିନି ଦିନିଆ ଜାତୀୟ ଶୋକ ଘୋଷଣା କରାଯାଇଛି। ସମସ୍ତ ସମ୍ଭାବ୍ୟ ସହାୟତା ପ୍ରଭାବିତ ଲୋକଙ୍କୁ ଦିଆଯିବ ।
କ୍ୟାପ-ହାତିୟନ ଡେପୁଟି ମେୟର ପାଟ୍ରିକ ଆଲମୋନର୍ କହିଛନ୍ତି ଯେ ମୋଟରସାଇକେଲକୁ ଧକ୍କାରୁ ଏଡାଇବାକୁ ଚେଷ୍ଟା କରୁଥିବାବେଳେ ଏକ ଇନ୍ଧନ ପରିବହନକାରୀ ଟ୍ରକ ଓଲଟି ପଡିଛି। ସ୍ଥାନୀୟ ବାସିନ୍ଦା ଟ୍ୟାଙ୍କରର ଇନ୍ଧନ ଲୁଟିବାକୁ ଚେଷ୍ଟା କରିଥିଲେ। ଏହି ସମୟରେ ବିସ୍ଫୋରଣ ଘଟି ୬୦ରୁ ଅଧିକ ଲୋକ ଜୀବନ୍ତ ଜଳି ଯାଇଛନ୍ତି। ବିସ୍ଫୋରଣରେ, ନିକଟରେ ଥିବା ୨୦ରୁ ଅଧିକ ଘରର ବିଦ୍ୟୁତ ସରବରାହ ବନ୍ଦ ହୋଇ ଯାଇଛି। ମୃତାହତଙ୍କ ସଂଖ୍ୟା ବଢ଼ିବାର ଆଶଙ୍କା ଥିବା ସେ କହିଛନ୍ତି। ଘର ଭିତରେ ମୃତ୍ୟୁ ଘଟିଥିବା ଲୋକଙ୍କ ସଂଖ୍ୟା ଏପର୍ଯ୍ୟନ୍ତ ଗଣନା କରାଯାଇ ନାହିଁ।
ହାଇତିର ପୂର୍ବତନ ପ୍ରଧାନମନ୍ତ୍ରୀ କ୍ଲୋଡ ଜୋସେଫ ଟୁଇଟ କରି କହିଛନ୍ତି ଯେ ଏହି ଖବର ନେଇ ସେ ମର୍ମାହତ। ହାଇତିରେ ବିଦ୍ୟୁତ ସଙ୍କଟ ଦେଖାଦେଇଛି। ଏହି କାରଣରୁ ଲୋକମାନେ ଜେନେରେଟରର ବ୍ୟବହାର କରୁଛନ୍ତି। ଟ୍ୟାଙ୍କର ଓଲଟିବା ପରେ ଲୋକମାନେ ମାଗଣାରେ ତେଲ ନେବାକୁ ଭିଡ଼ ଜମାଇଥିଲେ।
ଗଣମାଧ୍ୟମ ରିପୋର୍ଟ ଅନୁଯାୟୀ, ହାଇତିରେ ବିଦ୍ୟୁତ ସଙ୍କଟ ଯୋଗୁ ରାଜଧାନୀ ପୋର୍ଟ-ଓ-ପ୍ରିନ୍ସରେ ଅଳ୍ପ ସମୟ ପାଇଁ ବିଦ୍ୟୁତ୍ ଆଲୋକ ରହୁଛି। ଫଳରେ ଇନ୍ଧନ ମାଫିଆ ଏଠାରେ ଅଧିକ ସକ୍ରିୟ ହେବାରେ ଲାଗିଛନ୍ତି। ସେମାନେ ପ୍ରାୟତ ତେଲ ଟ୍ୟାଙ୍କର୍ ଲୁଟ କରୁଛନ୍ତି।
