ନୂଆଦିଲ୍ଲୀ,୪।୧୨: ଏଆଇଏମ୍ଆଇଏମ୍ ଅଧ୍ୟକ୍ଷ ଅସାଦୁଦ୍ଦିନ ଓଓ୍ବାଇସି ଶୁକ୍ରବାର କହିଛନ୍ତି, ଯଦି ଲାଲୁ ଯାଦବଙ୍କ ପରିବାର ତାଙ୍କ କଥା ମାନିଥାଆନ୍ତେ ତେବେ ଆର୍ଜେଡି ନେତା ତେଜସ୍ବୀ ଯାଦବ ବିହାର ମୁଖ୍ୟମନ୍ତ୍ରୀ ହୋଇଥାନ୍ତେ। ଉତ୍ତର ପ୍ରଦେଶ ବିଧାନସଭା ନିର୍ବାଚନ ପାଇଁ ରାଜନୀତି ସରଗରମ ହେବାରେ ଲାଗିଥିବାବେଳେ ହାଇଦ୍ରାବାଦ ଏମ୍ପି ଓଓ୍ବାଇସିଙ୍କ ଦଳ ମଇଦାନକୁ ଓହ୍ଲାଇବାକୁ ସ୍ଥିର କରିଛି। ରାଜ୍ୟର ଅନୂ୍ୟନ ୧୦୦ ଆସନରେ ଏଆଇଏମ୍ଆଇଏମ୍ ପକ୍ଷରୁ ଟିକେଟ ଦିଆଯିବ। ବିହାର ଭଳି ୟୁପିରେ ମଧ୍ୟ ଭାଜପାକୁ ଫାଇଦା ଦେବା ପାଇଁ ସଂଖ୍ୟାଲଘୁ ଭୋଟ ବ୍ୟାଙ୍କ ଭାଙ୍ଗିବାକୁ ଓଓ୍ବାଇସି ଯୋଜନା କରୁଥିବା ନେଇ ରାଜନୈତିକ ମହଲରେ ଆଲୋଚନା ହେଉଛି। ଏକ ଜାତୀୟ ଗଣମାଧ୍ୟମର କାର୍ଯ୍ୟକ୍ରମରେ ଭାଗନେଇଥିବା ହାଇଦ୍ରାବାଦ ଏମ୍ପି ଓଓ୍ବାଇସିଙ୍କୁ ଏନେଇ ପ୍ରଶ୍ନ କରାଯାଇଥିଲା। ଉତ୍ତରରେ ସେ କହିଥିଲେ, ଭାଜପାକୁ ଫାଇଦା ମିଳିବ ନାହିଁ, ଓଲଟା ଗୈରିକ ଦଳର କ୍ଷତି ହେବ। ଏହି ଅବସରରେ ଓଓ୍ବାଇସି ବିହାରର ଉଦାହରଣ ଦେଇ କହିଥିଲେ, ଆର୍ଜେଡିକୁ ମନାଇବା ପାଇଁ ସେ ଅନେକ ଥର ଉଦ୍ୟମ କରିଥିଲେ। ସେହି ଦଳର ନେତାମାନେ ତାଙ୍କ କଥା ଶୁଣି ନ ଥିଲେ। ଆର୍ଜେଡି ଯଦି ତାଙ୍କ କଥା ମାନିଥାଆନ୍ତା ତେବେ ତେଜସ୍ବୀ ଯାଦବ ମୁଖ୍ୟମନ୍ତ୍ରୀ ହୋଇଥାନ୍ତେ।
