ଢେଙ୍କାନାଳ ଅଫିସ, ୨୨।୧୧: ଢେଙ୍କାନାଳ ଜିଲାର ପ୍ରସିଦ୍ଧ ଶୈବକ୍ଷେତ୍ର ତଥା ଇକୋ ସେନ୍ସିଟିଭ୍ ଜୋନ୍ରେ ଅନ୍ତର୍ଭୁକ୍ତ ହୋଇଥିବା କପିଳାସ ଶୈବପୀଠ ହେବ ପ୍ଲାଷ୍ଟିକ ମୁକ୍ତ। ସଫାସୁତରା ପରିବେଶରେ ପର୍ଯ୍ୟଟକ ଦିଅଁ ଦର୍ଶନ କରିପାରିବେ। ଏକ ସୁଖଦ ଅନୁଭୂତି ନେଇ ଫେରିବେ। ଏଭଳି ଏକ ମହତ୍ ଉଦ୍ଦେଶ୍ୟ ନେଇ ଆରମ୍ଭ ହୋଇଛି ‘ପ୍ଲାଷ୍ଟିକ୍ ଫ୍ରି ଅଭିଯାନ’। ଏଥିରେ ଯୋଡ଼ି ହୋଇଛନ୍ତି ସ୍ଥାନୀୟ ଅଞ୍ଚଳର ବୁଦ୍ଧିଜୀବୀ, ସ୍ବେଚ୍ଛାସେବୀ ଅନୁଷ୍ଠାନ ଏବଂ ଯୁବପିଢ଼ି। ଏହି ଉପଲକ୍ଷେ ରବିବାର ଯୁବ ଅନୁଷ୍ଠାନ ହେଲ୍ପିଂ ହ୍ୟାଣ୍ଡ୍ ସୋସିଓ ସ୍ପେଶିଫିକ୍ ଏବଂ ଦେଓଗଁାସ୍ଥିତ ଶ୍ରୀଚନ୍ଦ୍ରଶେଖର ଜୀଉ ୟୁଥ୍ କ୍ଲବ ପକ୍ଷରୁ ପୀଠ ପରିସରରେ ‘ପ୍ଲାଷ୍ଟିକ୍ ଫ୍ରି ମିଶନ ଢେଙ୍କାନାଳ ଟୁରିଜିମ୍’ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। କପିଳାସ ଅଞ୍ଚଳର ୧୦୦ରୁ ଊର୍ଦ୍ଧ୍ୱ ସ୍ବେଚ୍ଛାସେବୀ ଯୋଗଦେଇ ଆବର୍ଜନା, ବୋତଲ ସଂଗ୍ରହ କରିବା ସହ ସଫେଇ କରିଥିଲେ।
ରାଜ୍ୟର ବିଖ୍ୟାତ ଶୈବପୀଠର ପରିବେଶକୁ ସଫାସୁତରା ରଖିବା ସମସ୍ତଙ୍କ ନୈତିକ ଦାୟିତ୍ୱ। ବ୍ୟବସାୟୀ, ପର୍ଯ୍ୟଟକ ଏବଂ ଶ୍ରଦ୍ଧାଳୁଙ୍କ ସହଯୋଗ ବିନା ଏହି ମହତ୍ ଲକ୍ଷ୍ୟ ପୂରଣ କରିବା ଅସମ୍ଭବ। ତେଣୁ ପୀଠକୁ ପଲିଥିନ ବାରଣ କରିବା ସହ ବ୍ୟବସାୟୀଙ୍କୁ ବ୍ୟବସାୟ ପାଇଁ ପଲିଥିନର ବିକଳ୍ପ ବ୍ୟବସ୍ଥା ଆପଣାଇବାକୁ ପଡ଼ିବ। ଏହାଦ୍ୱାରା କପିଳାସର ଶୋଭା ବଢ଼ିବ ବୋଲି ସଚେତନ କରାଯାଇଥିଲା। ସେହିପରି କପିଳାସକୁ ସ୍ବଚ୍ଛ ଏବଂ ପ୍ଲାଷ୍ଟିକ୍ ମୁକ୍ତ ରଖିବା ଦିଗରେ ଜିଲା ପ୍ରଶାସନ ସହଯୋଗରେ ସମସ୍ତ ପ୍ରକାର ପଦକ୍ଷେପ ଗ୍ରହଣ କରାଯିବ ବୋଲି ଅନୁଷ୍ଠାନର କର୍ମକର୍ତ୍ତମାନେ ମତବ୍ୟକ୍ତ କରିଥିଲେ। ପ୍ରସିଦ୍ଧ ପର୍ଯ୍ୟଟନସ୍ଥଳୀ ସପ୍ତଶଯ୍ୟାରୁ ଏହି ଅଭିଯାନ ଆରମ୍ଭ ହୋଇଥିଲା।
