ଏରସମା,୨୮ା୧୦(ସ୍ବ.ପ୍ର.): ମହାବାତ୍ୟାର ଲୋମଟାଙ୍କୁରା ଘଟଣାବଳୀକୁ ଏବେବି ଲୋକେ ଭୁଲି ପାରିନାହାନ୍ତି। ୨୨ ବର୍ଷ ତଳେ ଅର୍ଥାତ୍ ୧୯୯୯, ଅକ୍ଟୋବର ୨୯ରେ ତାଣ୍ଡବ ରଚିଥିଲା ମହାବାତ୍ୟା। ଏବେବି ସେଦିନର ବିଭୀଷିକାପୂର୍ଣ୍ଣ କଥା ମନେପଡିଲେ ଛାତି ଥରିଉଠେ ବୋଲି ଜଗତ୍ସିଂହପୁର ଜିଲା ଏରସମା ବ୍ଲକ ଅନ୍ତର୍ଗତ ଆମ୍ବିକିର ପୂର୍ବତନ ସରପଞ୍ଚ ଶଙ୍କର ଚରଣ ସେଠୀ, ନଗରୀ କଲୋନୀର ନିବାସ ଫନ୍ଦକାର, ସୁବତ୍ର ସାମନ୍ତ ଓ ଦହିବର ଗ୍ରାମର ଦେବଦତ୍ତ ଦାସ ଓ ଅର୍ଜୁନ ଜେନା କହିଛନ୍ତି। ସେଦିନ ମେଘ ସାଙ୍ଗକୁ ପବନ ଧ୍ୱଂସଲୀଳା ରଚିଥିଲା।
ସମୁଦ୍ରରୁ ୩୦ ଫୁଟ ଉଚ୍ଚର ଲୁଣା ଜୁଆର ଉଠି ଏରସମାର ଭୌଗୋଳିକ ସ୍ଥିତିକୁ ଛାରଖାର କରି ଚାଲିଗଲା। ଏହାର ପ୍ରଭାବରେ ଅନେକ ଘରଦ୍ୱାର, ଗଛ ଭାଙ୍ଗିବା ସହ ଶତାଧିକ ମଣିଷ, ଜୀବଜନ୍ତୁଙ୍କ ଜୀବନ ଯାଇଥିଲା। ୨୨ ବର୍ଷ ତଳେ ବିନାଶ ଭିତରୁ ସୂତ୍ରପାତ ହୋଇଛି ବିକାଶର ପର୍ବ। ତଥାପି ଏରସମାବାସୀଙ୍କ ମନରେ ସେଦିନର ଦୃଶ୍ୟ ଅଲିଭା ସ୍ମୃତି ହୋଇ ରହିଯାଇଛି।
ଅସୁରକ୍ଷିତ ହୋଇପଡିଛି ବାତ୍ୟା ଆଶ୍ରୟସ୍ଥଳ ପ୍ର।କୃତିକ ବିପଯର୍ୟୟକୁ ମୁକାବିଲା କରିବା ପାଇଁ ଏହି ବ୍ଲକରେ ପ୍ରତିଷ୍ଠା କରାଯାଇଥିବା ବାତ୍ୟା ଆଶ୍ରୟସ୍ଥଳ ମରାମତି ଅଭାବରୁ ଅସୁରକ୍ଷିତ ହୋଇପଡିଲାଣି। ନିର୍ମାଣ କରାଯାଇଥିବା ୯୨ଟି ଆଶ୍ରୟସ୍ଥଳ ମଧ୍ୟରୁ ପୋର୍ଟ ଟ୍ରଷ୍ଟ ପକ୍ଷରୁ ୧୨ଟି ଓ ମହାରାଷ୍ଟ୍ର ସରକାରଙ୍କ ପକ୍ଷରୁ ୨୯ଟି ବହୁମୁଖୀ ଆଶ୍ରୟସ୍ଥଳ ମରାମତି ଅଭାବରୁ ଅସୁରକ୍ଷିତ ହୋଇପଡିଛି।
