କୁଆମରା, ୧୫।୯(ଡି.ଏନ.ଏ.)-କ୍ରମାଗତ ତିନି ଦିନ ଧରି ଲଘୁଚାପଜନିତ ବର୍ଷା ଯୋଗୁ ମୟୂରଭଞ୍ଜ ଜିଲା ଗୋପବନ୍ଧୁ ନଗର ବ୍ଲକର ଜନଜୀବନ ଅସ୍ତବ୍ୟସ୍ତ ହୋଇପଡିଛି। ବିଭିନ୍ନ ନଦୀର ବନ୍ୟାଜଳ ବୃଦ୍ଧି ପାଉଥିବାରୁ ନଦୀକୂଳିଆ ଲୋକଙ୍କ ଚିନ୍ତା ବଢିଯାଇଛି। ତେବେ ତିନି ଦିନରେ ମୋଟ ୧୧୬ ମିଲିମିଟର ବର୍ଷା ହୋଇଥିବା ରେକର୍ଡ କରାଯାଇଛି। ତୁହାକୁ ତୁହା ବର୍ଷା ଲାଗି ରହିବାରୁ ମଙ୍ଗଳବାର ସକାଳେ ଗଙ୍ଗାହାର ନଦୀରେ ବନ୍ୟାଜଳ ଦେଖାଦେଇଛି। ଫଳରେ ଖଡିକାପଦା କଲଭର୍ଟ ଉପରେ ୨ଫୁଟ ଉଚ୍ଚର ବନ୍ୟାଜଳ ପ୍ରବାହିତ ହେବା ଯୋଗୁ କୁଆମରା-ବଡସାହି ରାସ୍ତା ଯୋଗାଯୋଗ ବିଚ୍ଛିନ୍ନ ହୋଇପଡିଛି। ନଦୀକୂଳରେ ଥିବା ଚାଷ ଜମିଗୁଡିକ ଜଳମଗ୍ନ ହୋଇଛି। ଅପରାହ୍ନ ସୁଦ୍ଧା ଉପରମୁଣ୍ଡରେ ବର୍ଷା ଲାଗି ରହିଥିବାରୁ ନଦୀର ଜଳସ୍ତର ବୃଦ୍ଧି ପାଇବା ନେଇ ଆଶଙ୍କା କରାଯାଉଛି। ଦୋମୁହାଣି ପୋଲ ଉପରେ ବନ୍ୟାଜଳ ପ୍ରବାହିତ ହେଉଛି। ନାଲୁହା ନଦୀରେ ମଧ୍ୟାହ୍ନ ସୁଦ୍ଧା ବନ୍ୟାଜଳ ଦୁଇ କୂଳ ଲଂଘୁଥୁବା ବେଳେ କୁଆମରା ପଞ୍ଚାୟତର କସିବଣୀ ଓ ପଶୁଦା ପଞ୍ଚାୟତ ଭୋଳପଦା ଗ୍ରାମର ଲୋକେ ଆତଙ୍କିତ ଅବସ୍ଥାରେ ଅଛନ୍ତି। ସେହିପରି ସୋନ ନଦୀର ଜଳସ୍ତର ବୃଦ୍ଧି ପାଇବାରେ ଲାଗିଛି। ବିଭିନ୍ନ ସ୍ଥାନରେ ନଦୀ ଫୁଲୁଥିବା ଦେଖିବାକୁ ମିଳୁଛି। ନଦୀର ବନ୍ୟା ଜଳ ଚାଷ ଜମି ଉପରେ ମାଡିଯାଉଛି। ସେହିପରି ଦେଓ ନଦୀର ଜଳପତ୍ତନ ବୃଦ୍ଧି ଯୋଗୁ କଇଁସାରୀ ନିକଟସ୍ଥ ଜାମଘାଟ ପୋଲ ଉପରେ ୩ଫୁଟ ଉଚ୍ଚରେ ବନ୍ୟାଜଳ ପ୍ରବାହିତ ହେଉଛି। ଟଙ୍ଗଣା ନଦୀ କଲଭର୍ଟ ଉପରେ ୪ଫୁଟ ଉଚ୍ଚର ବନ୍ୟାଜଳ ପ୍ରବାହିତ ହେଉଛି। ଫଳରେ ଉଦଳା, ଗୋପବନ୍ଧୁନଗର, ଜୟପୁର ତଥା ବରହମପୁର ଯୋଗାଯୋଗ ବିଚ୍ଛିନ୍ନ ହୋଇପଡିଛି।
