ନୂଆଦିଲ୍ଲୀ, ୨୮।୭: କରୋନା ସଂକ୍ରମଣ ହ୍ରାସ ପାଇବା ପରେ ଅନେକ ରାଜ୍ୟରେ ପୁଣି ଥରେ ସ୍କୁଲ ଓ କଲେଜ ଖୋଲିଛି। ଗୁଜରାଟ, କର୍ନାଟକ, ମଧ୍ୟପ୍ରଦେଶ, ଓଡ଼ିଶା ଓ ପଞ୍ଜାବ ଆଦି ରାଜ୍ୟରେ ସ୍କୁଲ ଖୋଲିଥିବା ବେଳେ ଉତ୍ତରାଖଣ୍ଡ ଓ ବିହାର ସମେତ ଅନ୍ୟରାଜ୍ୟଗୁଡ଼ିକରେ ଅକ୍ଟୋବରରୁ ସ୍କୁଲ ଖୋଲିବା ନେଇ ବିଚାର କରାଯାଉଛି। କିନ୍ତୁ ଏବେ ବି କିଛି ରାଜ୍ୟ ଅଛି ଯେଉଁଠାରେ ସ୍କୁଲ ଖୋଲିବା ନେଇ କୌଣସି ନିଷ୍ପତ୍ତି ନିଆଯାଇନାହିଁ। ଏହିକ୍ରମରେ ଦିଲ୍ଲୀ ଓ ଉତ୍ତରପ୍ରଦେଶ ସାମିଲ ରହିଛି। ବର୍ତ୍ତମାନ ଦିଲ୍ଲୀରେ ଅଭିଭାବକ ଓ ଛାତ୍ରୀଛାତ୍ରମାନେ ସ୍କୁଲ ଖୋଲିବା ଘୋଷଣା ନେଇ ଅପେକ୍ଷା କରି ରହିଛନ୍ତି। ଇତିମଧ୍ୟରେ ଏହି ପ୍ରସଙ୍ଗ ଉପରେ ଅଭିଭାବକ, ଶିକ୍ଷକ ଓ ପ୍ରିନ୍ସିପାଲଙ୍କଠାରୁ ସରକାର ପରାମର୍ଶ ଲୋଡ଼ିଛନ୍ତି। ରାଜ୍ୟର ଶିକ୍ଷାମନ୍ତ୍ରୀ ମନୀଷ ସିସୋଡିଆ ଏନେଇ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ବର୍ତ୍ତମାନ ଆଖପାଖ ରାଜ୍ୟଗୁଡ଼ିକରେ ସ୍କୁଲ ଖୋଲିଗଲାଣି। ହେଲେ ଦିଲ୍ଲୀରେ ସ୍କୁଲ ଖୋଲିବା ନେଇ ଅଭିଭାବକ, ଶିକ୍ଷକ ଓ ପିନ୍ସିପାଲଙ୍କ କ’ଣ ମତାମତ ରହିଛି ବୋଲି ସିସୋଡିଆ ପଶ୍ନ କରିଛନ୍ତି। ସମସ୍ତଙ୍କ ପରାମର୍ଶକୁ ବିଚାରକୁ ନେବା ପରେ ସ୍କୁଲ ଖୋଲିବା ନେଇ ନିର୍ଣ୍ଣୟ ନିଆଯିବ ବୋଲି ସିସୋଡିଆ କହିଛନ୍ତି।
