ଭୁବନେଶ୍ୱର, ୧୫।୭(ବ୍ୟୁରୋ): ରାଜ୍ୟରେ ଲକ୍ଡାଉନରୁ ଦୀର୍ଘ ୧୬ ମାସ ହେବ ଗାଡିମଟର ଚଳାଚଳ ବନ୍ଦ ହୋଇ ରହିଛି। ଫଳରେ ବସ୍ ମାଲିକମାନେ ସର୍ବାଧିକ କ୍ଷତି ସହିଛନ୍ତି। ଏହାକୁ ଦୃଷ୍ଟି ଦେଇ ରାଜ୍ୟରେ ବସ୍ ଟିକସ ଛାଡ଼ ପାଇଁ ବିଚାର ଚାଲିଥିବା ପରିବହନ ମନ୍ତ୍ରୀ ପଦ୍ମନାଭ ବେହେରା ବୁଧବାର ସୂଚନା ଦେଇଛନ୍ତି। ଲକ୍ଡାଉନ ପରବର୍ତ୍ତୀ ବସ୍ ଚଳାଚଳ ସ୍ବାଭାବିକ ପାଇଁ ପଦକ୍ଷେପ ନିଆଯାଉଛି। ବସ୍ ମାଲିକଙ୍କ ଟିକସ ଛାଡ ସହ ଅନ୍ୟ ସୁବିଧା ପ୍ରଦାନ ନିମନ୍ତେ ବିଚାର ଚାଲିଛି। କାଟାଗୋରି- ବି ଜିଲାଗୁଡିକରେ ବସ୍ ଚଳାଚଳ କରିବ ନା ନାହିଁ ନିଷ୍ପତ୍ତି ନିଆଯିବ। ମନ୍ତ୍ରୀ ବେହାରା କହିଛନ୍ତି, ଏବେ ମଧ୍ୟ ଆମେ କରୋନାରୁ ବାହାରି ପାରିନାହାନ୍ତି। ରାଜ୍ୟରେ ବର୍ତ୍ତମାନ ଲକ୍ଡାଉନ ଜାରି ରହିଛି। ଏ-କାଟାଗୋରି ୨୦ ଜିଲାରେ ବସ୍ ଚଳାଚଳ କରିବାକୁ ଅନୁମତି ଦିଆଯାଇଛି। ୧୦ ଜିଲାରେ ବସ୍ ଚଳାଚଳ ବନ୍ଦ ରହିଛି। ତେବେ ଲକ୍ଡାଉନର ପରବର୍ତ୍ତୀ ପର୍ଯ୍ୟାୟରେ ବସ୍ ଚଳାଚଳ କରିବ ନା ନାହିଁ ଏହା ଉପରେ ନିଷ୍ପତ୍ତି ନିଆଯିବ। ନିଶ୍ଚିତଭାବେ ବସ୍ ଚଳାଚଳ ନେଇ ବ୍ୟବସ୍ଥା କରାଯିବ ବୋଲି ମନ୍ତ୍ରୀ ବେହେରା କହିଛନ୍ତି। ସୂଚନାଯୋଗ୍ୟ, କିଛିଦିନ ତଳେ ରାଜ୍ୟ ବସ୍ ମାଲିକ ସଂଘ ଜୁଲାଇରୁ ସେପ୍ଟେମ୍ବର ପର୍ଯ୍ୟନ୍ତ ଟିକସ ଛାଡ ସହ ପ୍ରତି ବସ୍ ପିଛା ୧ ଲକ୍ଷ ଟଙ୍କା ସୁଧ ବିହୀନ ଋଣ ଓ କର୍ମଚାରୀଙ୍କୁ ଆର୍ଥିକ ପ୍ୟାକେଜ ପ୍ରଦାନ ଲାଗି ଦାବି କରାଯାଇଛି। ନଚେତ୍ ଆସନ୍ତା ୧୬ତାରିଖରୁ ଲକ୍ଡାଉନ ଖୋଲିଲେ ମଧ୍ୟ ରାଜ୍ୟରେ ଚାଲୁଥିବା ୧୪ ହଜାର ବସ୍ ବନ୍ଦ ରହିବ ବୋଲି ସଂଘ ପକ୍ଷରୁ ଚେତାବନୀ ଦିଆଯାଇଛି।
