ଭୁବନେଶ୍ୱର,(ବ୍ୟୁରୋ)/ ପିପିଲି,(ସ୍ବ.ପ୍ର.) ୮।୭: ମାତ୍ର ୭ବର୍ଷର ଶିଶୁଟିଏ। କିଏ ପର କିଏ ଆପଣାର ଜାଣେନାହିଁ। ହେଲେ ତା’ ପ୍ରତି ବାପା ଓ ସାବତ ମା’ ପାତରଅନ୍ତର ମନୋଭାବ ରଖି ନିଷ୍ଠୁର ହୋଇ ବର୍ବରତାର ସୀମା ଟପିଛନ୍ତି। ବାପା ଓ ସାବତ ମା’ କୁନିଝିଅକୁ ସ୍କୁଲକୁ ନ ଛାଡ଼ି ଅମାନବୀୟ ଭାବେ ଶିକୁଳିରେ ବାନ୍ଧି ରଖିବା ସହ ନାନା ପ୍ରକାର ନିର୍ଯାତନା ଦେଉଥିଲେ। ଗରମ ପାଣିରେ ତା’ ହାତ ବୁଡ଼ାଇଦେବା ସହ ମାଡ଼ ମାରୁଥିଲେ। ଏପରି କି, ଅନେକ ସମୟରେ ଖାଇବାକୁ ମଧ୍ୟ ଦେଉ ନ ଥିଲେ। ନିଜ ଜନ୍ମିତ ମା’କୁ ଝୁରି ହେଉଥିବାରୁ ଶିଶୁକନ୍ୟାଟି ଏଭଳି କଠୋର ଦଣ୍ଡ ପାଇଥିବା କୁହାଯାଉଛି। ଭୁବନେଶ୍ୱର ଉପକଣ୍ଠ ବାଲିପାଟଣା ଥାନା ଅଧୀନ ବାରହଳ ଅଞ୍ଚଳରେ ଘଟିଥିବା ଏଭଳି ଦୁଃଖଦ ଘଟଣା ରାଜଧାନୀ ସମେତ ପିପିଲି ଅଞ୍ଚଳରେ ଆଲୋଡ଼ନ ସୃଷ୍ଟି କରିଛି। ନିର୍ଯାତନା ଯୋଗୁ ଗୁରୁତର ହୋଇପଡ଼ିଥିବା ସମ୍ପୃକ୍ତ ଶିଶୁକନ୍ୟାକୁ ବୁଧବାର ତା’ର ଜନ୍ମଦାତ୍ରୀ ମା’ ଜଣେ ସାମାଜିକ କର୍ମୀଙ୍କ ସହାୟତାରେ ଉଦ୍ଧାର କରି ଚିକିତ୍ସା ପାଇଁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଛନ୍ତି।
ଅନୁଯାୟୀ, ୨୦୧୩ରେ ବାରହଳ ଅଞ୍ଚଳର ବିଲାଲ ଖାନ୍ ପିପିଲି ଅଞ୍ଚଳର ରିଜଓ୍ବାନା ପରଓ୍ବିନଙ୍କୁ ବିବାହ କରିଥିଲେ। ସେମାନଙ୍କର ଗୋଟିଏ ଝିଅ ଥିବାବେଳେ କିଛିବର୍ଷ ପରେ କୌଣସି କାରଣରୁ ଉଭୟଙ୍କ ମଧ୍ୟରେ ମନୋମାଳିନ୍ୟ ସୃଷ୍ଟି ହୋଇଥିଲା। ଏହା ପରେ ବିବାହ ବିଚ୍ଛେଦ ଯୋଗୁ ସେମାନେ ଅଲଗା ରହୁଥିଲେ। ପରଓ୍ବିନ ଝିଅ ସହ ବାପଘରେ ଆସି ରହିଥିଲେ। ପରେ ବିଲାଲ ଦ୍ୱିତୀୟ ବିବାହ କରି ବାରହଳ ଅଞ୍ଚଳରେ ରହୁଥିଲେ। ୨୦୨୦ରେ ବିଲାଲ ଜୋରଜବରଦସ୍ତି ପରଓ୍ବିନଙ୍କ ନିକଟରୁ ଝିଅକୁ ନେଇ ନିଜ ପାଖରେ ରଖିଥିଲେ। ମାତ୍ର ପରବର୍ତ୍ତୀ ସମୟରେ ଶିଶୁ କନ୍ୟାକୁ କୌଣସି କାରଣ ନେଇ ତା’ର ବାପା ଓ ସାବତ ମା’ ଶାରୀରିକ ଓ ମାନସିକ ନିର୍ଯାତନା ଦେଉଥିଲେ। ଶିଶୁକନ୍ୟା ସ୍ବାସ୍ଥ୍ୟାବସ୍ଥା ଗୁରୁତର ଥିବା ବୁଧବାର ଖବରପାଇ ଜଣେ ସାମାଜିକ କର୍ମୀଙ୍କ ସହାୟତାରେ ପରଓ୍ବିନ ଝିଅକୁ ଉଦ୍ଧାର କରି କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଛନ୍ତି। ଘଟଣା ସମ୍ପର୍କରେ ବାଲିପାଟଣା ଥାନା ଓ ଶିଶୁ କଲ୍ୟାଣ ବୋର୍ଡକୁ ଅବଗତ କରାଯାଇଛି। ଖବର ଲେଖା ହେବା ପର୍ଯ୍ୟନ୍ତ ଏନେଇ ଥାନାରେ ଲିଖିତ ଅଭିଯୋଗ ହୋଇ ନ ଥିବା ଜଣାପଡ଼ିଛି। ଅନ୍ୟପକ୍ଷରେ ବିଲାଲ୍ ନିର୍ଯାତନା କଥାକୁ ଖଣ୍ଡନ କରିବା ସହ ଝିଅ ନିଜ ମା’କୁ ଝୁରି ଏଭଳି ଅବସ୍ଥା ହୋଇଥିବା କହିଛନ୍ତି। ଝିଅ ଏଣିକି ମୋ’ ପାଖରେ ରହିବ ଏବଂ ଚିକିତ୍ସା ପାଇଁ ସେ ୩୦ ହଜାର ଟଙ୍କା ଦେଇଥିବା ପ୍ରକାଶ କରିଛନ୍ତି। ତେବେ ଚିକିତ୍ସା ପରେ ସେ ପୋଲିସର ଦ୍ୱାରସ୍ଥ ହେବେ ବୋଲି ଶିଶୁକନ୍ୟାର ଜନ୍ମଦାତ୍ରୀ ମା’ କହିଛନ୍ତି।
