ଆସିକା/ବୁଗୁଡ଼ା,୨୯।୬: ବିଦ୍ୟାଳୟର ସହକାରୀ ଶିକ୍ଷକଙ୍କ କୋଚିଂ ସେଣ୍ଟରରେ ପଢୁଥିବା ଛାତ୍ରୀଛାତ୍ରଙ୍କୁ ଅଧିକ ମାର୍କ ଦିଆଯାଇଥିବା ବେଳେ ଅନ୍ୟ ଛାତ୍ରୀଛାତ୍ରଙ୍କୁ ଜାଣିଶୁଣି ଦିଆଯାଇଛି କମ୍ ମାର୍କ। ସରକାରୀ ନିର୍ଦ୍ଦେଶକୁ ଅବମାନନା କରି ଟ୍ୟୁଶନ କରୁଥିବାରୁ ପୂର୍ବରୁ ଅଭିଭାବକମାନେ ୨ଥର ଜିଲାପାଳଙ୍କ ନିକଟରେ ଅଭିଯୋଗ କରିଥିଲେ। ଏଥିରେ ପ୍ରତିଶୋଧ ପରାୟଣ ହୋଇ ଶିକ୍ଷକ ଜଣକ କମ୍ ମାର୍କ ଦେଇଛନ୍ତି। ଏଭଳି ଅଭିଯୋଗ ଆଣିବା ସହ ବୁଗୁଡ଼ା ବ୍ଲକ ଗୋଲିଆ ହାଇସ୍କୁଲରେ ତାଲା ପକାଇ ଦେଇଛନ୍ତି ଛାତ୍ରୀଛାତ୍ର ଏବଂ ଅଭିଭାବକ।
କରୋନା ଯୋଗୁ ବିନା ପରୀକ୍ଷାରେ ପ୍ରକାଶ ପାଇଥିବା ମାଟ୍ରିକ ଫଳକୁ ନେଇ ଛାତ୍ରୀଛାତ୍ରୀ ଓ ଅଭିଭାବକଙ୍କ ଅସନ୍ତୋଷ ଥମୁନି। ବୁଗୁଡା ସ୍କୁଲ ଭଳି ଆସିକା ବିଦ୍ୟାଳୟରେ ଶିକ୍ଷକ ଓ କର୍ମଚାରୀଙ୍କୁ ତାଲା ପକାଯାଇଥିଲା। ଖବରପାଇ ଭାରପ୍ରାପ୍ତ ଗୋଷ୍ଠୀ ଶିକ୍ଷା ଅଧିକାରୀ ଭାସ୍କର ଲେଙ୍କା ଓ ସହକାରୀ ଗୋଷ୍ଠୀ ଶିକ୍ଷା ଅଧିକାରୀ ଭାଗୀରଥି ପାତ୍ର ବିଦ୍ୟାଳୟରେ ପହଞ୍ଚିଥିଲେ। ପରେ ପୋଲିସ ମଧ୍ୟ ପହଞ୍ଚିଥିଲା। ଜୟପୁର ସରପଞ୍ଚ ସଞ୍ଜୟ ଜେନା, ସମିତିସଭ୍ୟ ପ୍ରତିନିଧି ସିଦ୍ଧାର୍ଥ ଶଙ୍କର ସାମଲଙ୍କ ସମେତ ଅଭିଭାବକମାନଙ୍କ ଆଲୋଚନା କରାଯାଇ ଅସନ୍ତୁଷ୍ଟ ଛାତ୍ରୀଛାତ୍ରଙ୍କ ପୁନଃ ମୂଲ୍ୟାୟନ ନିମନ୍ତେ ପଦକ୍ଷେପ ନେବା ଓ ବିଦ୍ୟାଳୟ ସମସ୍ୟା ଦୂର କରିବା ଲାଗି ପ୍ରତଶ୍ରୁତି ପରେ ପରିସ୍ଥିତି ଶାନ୍ତ ପଡିଥିଲା ।
