ଯାଜପୁର ଟାଉନ,୧୮ା୪(ଡି.ଏନ.ଏ.): ଯାଜପୁର ଜିଲା ଅନ୍ତର୍ଗତ ବୈତରଣୀ ନଦୀ ଅବବାହିକାର ସିଦ୍ଧେଶ୍ୱର ଘାଟରୁ ଶନିବାର ପୁଣି ୫ଫୁଟ ଲମ୍ବର ଏକ ମୁଗୁନିପଥର ନିର୍ମିତ ଶିବଲିଙ୍ଗ ଉଦ୍ଧାର କରାଯାଇଛି। ଉଦ୍ଧାର ଶିବଲିଙ୍ଗଙ୍କୁ ସ୍ଥାନୀୟ ଲୋକେ ସିଦ୍ଧେଶ୍ୱର ମନ୍ଦିରରେ ରଖି ପୂଜାର୍ଚ୍ଚନା କରୁଛନ୍ତି। ବାଲି ଉତ୍ତୋଳନ ବେଳେ ମାର୍ଚ୍ଚ ୧୧ରେ ପ୍ରଥମେ ସିଦ୍ଧେଶ୍ୱର ମନ୍ଦିର ନିକଟରୁ ଶିବଲିଙ୍ଗ ସହ ୨ଟି ଅମୁହାଁ ମନ୍ଦିର ଉଦ୍ଧାର ହୋଇଥିଲା। ମାର୍ଚ୍ଚ ୨୩ରେ ଦେବୀଗଡ଼ା ଘାଟରୁ ମୁଗୁନି ପଥରର ବାସୁଆ ବଳଦ, ଲକ୍ଷ୍ମୀ ମୂର୍ତ୍ତି, ଶିବଲିଙ୍ଗ ଓ ଭଗ୍ନ ଦେବୀମୂର୍ତ୍ତି ଉଦ୍ଧାର ହୋଇଥିବା ବେଳେ ଗତ ଶୁକ୍ରବାର ପୁଣି ଦେବୀଗଡ଼ା ଘାଟରୁ ପ୍ରାଚୀନ ନାରାୟଣ ମୂର୍ତ୍ତି ଓ ପ୍ରାଚୀନ କୀର୍ତ୍ତି ଥିବା ପଥରମାନ ଉଦ୍ଧାର କରାଯାଇଥିଲା। ତେବେ ବୈତରଣୀ ନଦୀରୁ ଏତେ ମାତ୍ରାର ପ୍ରାଚୀନ କୀର୍ତ୍ତି ଓ ପ୍ରାଚୀନ ମୂର୍ତ୍ତି ଉଦ୍ଧାର ହେଉଥିବାରୁ ସେଗୁଡ଼ିକର ରକ୍ଷଣାବେକ୍ଷଣା କରିବାକୁ ସ୍ଥାନୀୟ ଲୋକେ ଦାବି କରି ଆସୁଛନ୍ତି। ମାତ୍ର ଆଜି ପର୍ଯ୍ୟନ୍ତ ପ୍ରତ୍ନତତ୍ତ୍ୱ ବିଭାଗ କୌଣସି ପଦକ୍ଷେପ ଗ୍ରହଣ କରୁ ନ ଥିବାରୁ ସାଧାରଣରେ କ୍ଷୋଭ ପ୍ରକାଶ ପାଇଛି। ଏ ସମ୍ପର୍କରେ ଜିଲାପାଳ ଚକ୍ରବର୍ତ୍ତୀ ସିଂ ରାଠୋର କହିଛନ୍ତି, ମୂର୍ତ୍ତି ଉଦ୍ଧାର ସମ୍ପର୍କରେ ପ୍ରତ୍ନତତ୍ତ୍ୱ ଓ ଦେବୋତ୍ତର ବିଭାଗକୁ ଚିଠି ଲେଖାଯାଇଛି। ଖୁବ୍ଶୀଘ୍ର ପ୍ରତ୍ନତତ୍ତ୍ୱ ବିଭାଗର ଏକ ଟିମ୍ ଆସି ଏହାର ତଦନ୍ତ କରି ଆବଶ୍ୟକ ପଦକ୍ଷେପ ଗ୍ରହଣ କରିବ।
