ଚିତ୍ରଡ଼ା,୧୭।୪(ଡି.ଏନ.ଏ.)- ଦିନେ ଯେଉଁଠି ଦୂବ କଅଁଳୁ ନ ଥିଲା ଏବେ ସେହି ଚାଷ ଜମି ହସୁଛି। ବିସ୍ତୀର୍ଣ୍ଣ ପଡ଼ିଆ ଜମିରେ ପିଜୁଳି ଚାଷ କରି ଉଦାହରଣ ସାଜିଛନ୍ତି ୪୦ ଚାଷୀ। ପ୍ରାୟ ୫୦ ଏକର ଡାହି ପଡ଼ିଆ ଜମିରେ ଉନ୍ନତମାନର ପିଜୁଳି ଚାଷ କରି ସେମାନେ ବେଶ ଦୁଇ ପଇସା ରୋଜଗାର କରିପାରିବା ସହିତ ବହୁ ଶ୍ରମିକଙ୍କୁ ରୋଜଗାର କ୍ଷମ କରାଇ ପାରିଛନ୍ତି। ଏଭଳି ଚାଷ ଦେଖିବାକୁ ମିଳିଛି ମୟୂରଭଞ୍ଜ ଜିଲା ମୋରଡ଼ା ବ୍ଲକ ଅନ୍ତର୍ଗତ ପାଟପୁର ଗ୍ରାମରେ।
୨୦୧୫ରେ ୪୦ ଚାଷୀ ମିଳିତ ବୈଠକ କରି ପିଜୁଳି ଚାଷ କରିବା ପାଇଁ ସରକାରଙ୍କ ହର୍ଟିକଲଚର ବିଭାଗର ସହାୟତା ଲୋଡ଼ିଥିଲେ। ଏମ୍ଜିଏନ୍ଆର୍ଇଜିଏସ୍ରେ ଏହି ଚାଷୀମାନଙ୍କୁ ସରକାର ଯୋଗାଇ ଦେଇଥିଲେ ସବୁକିଛି ସୁବିଧା। ସେମାନେ ନିଜ ଜାଗାରେ ପିଜୁଳି ଗଛ ଲଗାଇ ଦୀର୍ଘ ୩ ବର୍ଷ ଅକ୍ଳାନ୍ତ ପରିଶ୍ରମ କରି ଟାଙ୍ଗରା ଭୂଇଁରେ ଫଳାଇ ପାରିଛନ୍ତି ଉନ୍ନତମାନର ଭିଏନ୍ଆର ଜାତୀୟ ପିଜୁଳି। ଯେଉଁ ପିଜୁଳିକୁ ଦିନେ ଖାଇବା ପାଇଁ ଲୋକେ ପଡ଼ୋଶୀ ରାଜ୍ୟ ଉପରେ ନିର୍ଭର କରିଆସୁଥିଲେ ଏବେ ସେହି ପିଜୁଳି ଟନଟନ ଉତ୍ପାଦନ କରି ରାଜ୍ୟ ତଥା ରାଜ୍ୟ ବାହରକୁ ବିକ୍ରି ପାଇଁ ପଠାଇ ଖୁବ ଲାଭବାନ ହେଉଛନ୍ତି ଚାଷୀମାନେ। ୫୦ ଏକର ଜାଗାରେ ଲାଗିଛି ୫ହଜାରରୁ ଊଦ୍ଧର୍ବ ଭିଏନ୍ଆର ଜାତିର ପିଜୁଳି ଗଛ। ଯେଉଁ ଗଛ ପଡ଼ୋଶୀ ରାଜ୍ୟ ଛତିଶଗଡ଼ର ରାୟପୁରରୁ ଆଣି ଲଗାଇଥିଲେ ପ୍ରତାପ ମହାନ୍ତ ଓ ଅନ୍ୟ ଚାଷୀମାନେ। ଏବେ ପ୍ରତି ବର୍ଷ ୧୦୦ ଟନ୍ ପିଜୁଳି ଉତ୍ପାଦନ ହେଉଛି। ପିଜୁଳି ଗଛର ରକ୍ଷଣାବେକ୍ଷଣ ଦାୟିତ୍ୱ ବହନ କରିଛନ୍ତି ଚାଷୀ ଜୟ ପ୍ରକାଶ ରାଉଳ। ପ୍ରତ୍ୟେକ ଦିନ ଗଛର ଯତ୍ନ ନେବା ପାଇଁ ୨୦ଜଣ ଶ୍ରମିକଙ୍କୁ କାମରେ ଲଗା ଯାଉଛି। ଦୈନିକ ୨୫୦ଟଙ୍କା ମଜୁରୀ ପାଇ ପରିବାର ଚଳାଉଥିବା କହିଛନ୍ତି ଶ୍ରମିକ ପ୍ରଦୀପ ଦାସ। ବଜାରରେ କିଲୋପ୍ରତି ୮୦ଟଙ୍କା ଦରରେ ପିଜୁଳି ବିକ୍ରି କରି ଖୁବ୍ ଲାଭବାନ ହେଉଛନ୍ତି ଏହି ଚାଷୀମାନେ। ତେବେ ସରକାରଙ୍କ ପକ୍ଷରୁ ଅଧିକ ସହାୟତା ମିଳିଲେ ସେମାନେ ପିଜୁଳି ଉତ୍ପାଦନ ବଢ଼ାଇବା ସହ ସମଗ୍ର ରାଜ୍ୟ ବାସୀଙ୍କ ଚାହିଦା ମେଣ୍ଟାଇ ପାରନ୍ତେ ବୋଲି ଚାଷୀମାନେ କହିଛନ୍ତି।
