ବାଲେଶ୍ୱର ଅଫିସ,୩।୪-କରୋନା ସମୟରେ ସରକାର ସହରାଞ୍ଚଳରେ ବସବାସ କରୁଥିବା ଚିତ୍ରଶିଳ୍ପୀ, କାରିଗର ଓ ମହିଳାଗୋଷ୍ଠୀମାନଙ୍କୁ ରୋଜଗାର ଯୋଗାଇଦେବା ପାଇଁ ନୂଆ ନୂଆ ଯୋଜନା ପ୍ରଣୟନ କରିଥିଲେ। ସେଗୁଡିକ ମଧ୍ୟରେ ସହରାଞ୍ଚଳ ଶ୍ରମଭିତ୍ତିକ କର୍ମନିଯୁକ୍ତି ଯୋଜନା ଅନ୍ୟତମ। ଏହାର ସଫଳ ରୂପାୟନ ପାଇଁ ସହରରେ ଆବର୍ଜନା, ୱେଜ୍ ଏମ୍ପ୍ଲୋୟମେଣ୍ଟ ଇନିସିଏଟିଭ୍ ସ୍କିମ୍ ଜରିଆରେ ସରକାରୀ କାନ୍ଥଗୁଡ଼ିକୁ ରଙ୍ଗ କରାଯାଇ ସୁନ୍ଦର ସୁନ୍ଦର ଚିତ୍ର ଅଙ୍କାଯାଉଛି। ଯାହାକୁ ଆଙ୍କି ଅନେକ ଚିତ୍ରଶିଳ୍ପୀ ଓ ମହିଳା ସ୍ବୟଂ ସହାୟିକା ଗୋଷ୍ଠୀ ମହିଳାମାନେ କାମ ପାଇବା ସହ ରୋଜଗାରକ୍ଷମ ହୋଇପାରିଛନ୍ତି। ବାଲେଶ୍ୱର ସହରରେ ଅନେକ ଜାଗାରେ ଏଷ୍ଟିମେଟ୍ଠାରୁ ବହୁତ କମ୍ ଟଙ୍କା ବ୍ୟବହାର କରାଯାଇଛି। ଲକ୍ଷ ଲକ୍ଷ ଟଙ୍କା ବ୍ୟାଙ୍କ ଖାତାରେ ପଡ଼ି ରହିଛି। ବିଭାଗୀୟ ଅଧିକାରୀଙ୍କ ଉଦାସୀନତା ପାଇଁ ଏଭଳି ବ୍ୟତିକ୍ରମ ଦେଖିବାକୁ ମିଳିଛି ବୋଲି ସାଧାରଣରେ ଅଭିଯୋଗ ହୋଇଛି।
ବାଲେଶ୍ୱର ପୌରାଞ୍ଚଳ ୨ନଂ. ୱାର୍ଡ଼ ବଡ଼ଖୁଆ ଗ୍ରାମର ବଳାଙ୍ଗୀ କଲେଜ ସମ୍ମୁଖ ପାର୍କ ପାଚେରିରେ ଉକ୍ତ ଯୋଜନାରେ ୱାଲ୍ ପେଣ୍ଟିଂ ହୋଇଛି। ଉକ୍ତ ପାଚେରିରେ ନାଗରିକ ସୂଚନାଫଳକ ମଧ୍ୟ ଲାଗିଛି। ୱାଲ୍ପେଣ୍ଟିଂ ପାଇଁ ପ୍ରକଳ୍ପ ମୂଲ୍ୟ ୧ଲକ୍ଷ ୯ହଜାର ୭ଶହ ଟଙ୍କା ହୋଇଥିବା ବେଳେ ନିତାଇ ଗୌର ସ୍ବୟଂସହାୟକ ଗୋଷ୍ଠୀ କାର୍ଯ୍ୟନିର୍ବାହୀ ସଂସ୍ଥା ଭାବେ ପୌରାଞ୍ଚଳ ଅଫିସ୍ରୁ କାର୍ଯ୍ୟାଦେଶ ପାଇଛି। ନାଗରିକ ସୂଚନା ଫଳକରେ କାର୍ଯ୍ୟାରମ୍ଭ ତାରିଖ ଓ କାର୍ଯ୍ୟ ସମ୍ପୂର୍ଣ୍ଣ ତାରିଖ ଲେଖା ନ ଥିବା ବେଳେ କାନ୍ଥରେ ମାତ୍ର ୪ଟି ଚିତ୍ର ଦେଖିବାକୁ ମିଳୁଛି। ଉକ୍ତ ପ୍ରକଳ୍ପର ଆଶିଂକ ବିଲ୍ ମଧ୍ୟ ପୈଠ ହୋଇଛି। ସ୍ବୟଂ ସହାୟିକା ଗୋଷ୍ଠୀ ପ୍ରକଳ୍ପ କାର୍ଯ୍ୟ ଶେଷ କରିବା ନାଁ ଧରୁ ନ ଥିବାରୁ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି। ସେହିପରି ପୌରାଞ୍ଚଳର ପ୍ରତ୍ୟେକ ୱାର୍ଡ଼କୁ ଏହି ପ୍ରକଳ୍ପରେ ୧ଲକ୍ଷରୁ ଊର୍ଦ୍ଧ୍ୱ ଟଙ୍କା ମିଳିଛି। କେତେକ ୱାର୍ଡ଼ରେ କାର୍ଯ୍ୟ ଶେଷ ହୋଇଥିବା ବେଳେ ଅଧିକାଂଶ ୱାର୍ଡ଼ରେ ଏଭଳି ଅଧାପନ୍ତରିଆ ଅବସ୍ଥା ଦେଖିବାକୁ ମିଳିଛି।
ଏନେଇ ପୌରାଞ୍ଚଳର କମ୍ୟୁନିଟି ଅର୍ଗାନାଇଜେର ସାବିତ୍ରୀ ମିଶ୍ର କହିଛନ୍ତି, ସହରାଞ୍ଚଳ ଶ୍ରମଭିତ୍ତିକ କର୍ମନିଯୁକ୍ତି ଯୋଜନାରେ ଉକ୍ତ ପ୍ରକଳ୍ପଗୁଡିକୁ ସ୍ବୟଂ ସହାୟିକା ଗୋଷ୍ଠୀମାନଙ୍କୁ ଦିଆଯାଇଛି। କେତେକ ଶେଷ କରିଦେଇଥିବା ବେଳେ ଅଧିକାଂଶ ସମ୍ପୂର୍ଣ୍ଣ କରିବା ପାଇଁ ସମୟ ଲଗାଉଛନ୍ତି। ଏନେଇ ବିଭାଗ ତରଫରୁ ବାରମ୍ବାର ତାଗିଦ୍ କରାଯାଉଛି। ଯେଉଁ ଗୋଷ୍ଠୀ ଯେତିକି ୱାଲ୍ପେଣ୍ଟିଂ କରୁଛି ସେହି ଅନୁସାରେ ବିଲ୍ ପୈଠ କରାଯାଉଛି। ବାକି ଥିବା କାର୍ଯ୍ୟ ଖୁବ ଶୀଘ୍ର ସମ୍ପୂର୍ଣ୍ଣ କରାଯିବାର ପ୍ରକାଶ କରିଛନ୍ତି।
