ବିଜନେସ୍ ଲ’ରେ ସ୍ନାତକୋତ୍ତର ଡିଗ୍ରୀ ହାସଲ କରି ଚାହିଁଥିଲେ ଜଣେ ଭଲ ଆଇନଜୀବୀ ହୋଇପାରିଥାଆନ୍ତେ ଶୋକାଥ ଜମାଲ। କିନ୍ତୁ ସେ ସାଗରର ସୁରକ୍ଷା ଏବଂ ବେଳାଭୂମିର ସ୍ବଚ୍ଛତା ଉପରେ କାର୍ଯ୍ୟ କରୁଛନ୍ତି। ବେ ଅଫ ଲାଇଫ ସର୍ଫିଙ୍ଗ ସ୍କୁଲ ଖୋଲି ଛାତ୍ର ଓ ବୟସ୍କମାନଙ୍କୁ ମାଗଣାରେ ସର୍ଫିଙ୍ଗ ପ୍ରଶିକ୍ଷଣ ଦେଇ ସେମାନଙ୍କ ସହଯୋଗରେ ସ୍ବଚ୍ଛତା କାର୍ଯ୍ୟକ୍ରମ ଜାରି ରଖିଛନ୍ତି। କେବଳ ଏତିକି ନୁହେଁ, ସେ ବନ୍ୟଜୀବ ସୁରକ୍ଷା ଏବଂ ଜନସଂଖ୍ୟା ନିୟନ୍ତ୍ରଣ କରିବା ଦିଗରେ ଅଭିଯାନ ଚଳାଇଛନ୍ତି। ତାମିଲନାଡୁ ଚେନ୍ନାଇର କୋଭାଲାମ ବିଚ୍ରେ ସେ ବର୍ଜ୍ୟ ସଂଗ୍ରହ ଅଭିଯାନ ଆରମ୍ଭ କରି ଏଯାବତ୍ ୨୪,୦୦୦ କେ.ଜି. ବର୍ଜ୍ୟ ସଂଗ୍ରହ କରିସାରିଛନ୍ତି। ସର୍ଫିଙ୍ଗ ସ୍କୁଲ ଖୋଲିବା ପୂର୍ବରୁ ସେ ବିଚ୍ରେ ବିଦେଶୀମାନଙ୍କଠାରୁ ସର୍ଫିଙ୍ଗ ପ୍ରଶିକ୍ଷଣ ନେଇଥିଲେ। ୨୦୧୭ରେ ପ୍ରଥମେ କଲେଜ ଛାତ୍ରମାନଙ୍କୁ ନେଇ ବିଚରେ ସଫେଇ କାର୍ଯ୍ୟ ଆରମ୍ଭ କରିଥିଲେ। ଏହାପରେ ଦୁଇ ବର୍ଷ ମଧ୍ୟରେ ୫୦୦ କେ.ଜି. ବର୍ଜ୍ୟ ସଂଗ୍ରହ କରାଯାଇପାରିଥିଲା। ଏବେ ସୁଦ୍ଧା ୬୬ ଜଣ ବ୍ୟକ୍ତି ବିଚ୍ ସଫେଇ କାର୍ଯ୍ୟକ୍ରମରେ ଯୋଗଦେଇ ମାଗଣାରେ ସର୍ଫିଙ୍ଗ ପ୍ରଶିକ୍ଷଶ ନେଇସାରିଛନ୍ତି। ମୋଟରେ ସର୍ଫିଙ୍ଗ୍ ସ୍କୁଲରେ ମାଗଣାରେ ୯,୦୦୦ ଛାତ୍ର ପ୍ରଶିକ୍ଷଣ ପାଇସାରିଛନ୍ତି। ଏଥିପାଇଁ ୧୪ ଜଣ ସର୍ଫର ପ୍ରଶିକ୍ଷକ ରହିଛନ୍ତି। ମାଗଣାରେ ସର୍ଫିଙ୍ଗ୍ ଶିଖିବାକୁ ହେଲେ ଛାତ୍ରମାନଙ୍କୁ ବର୍ଜ୍ୟ ଗୋଟେଇ ବେ ଅଫ୍ ଲାଇଫ୍ ଅଫିସ୍ରେ ଦେଉଛନ୍ତି। ସେହିପରି ବୟସ୍କମାନେ ୫ କେ.ଜି. ବର୍ଜ୍ୟ ସଂଗ୍ରହ କରିବାକୁ ପଡୁଛି। ଅନ୍ୟମାନେ ଦେୟ ଦେଇ ସର୍ଫିଙ୍ଗ ଶିକ୍ଷା ନେଉଛନ୍ତି। ଏଥିରୁ ଯାହା ଆୟ ହେଉଛି ତାହାକୁ ଜମାଲ ବିଭିନ୍ନ ସାମାଜିକ କଲ୍ୟାଣ କାର୍ଯ୍ୟକ୍ରମରେ ଲଗାଉଛନ୍ତି।
