କାଏରୋ,୨୯।୩: ଇଜିପ୍ଟରେ ଥିବା ସୁଏଜ୍ କେନାଲରେ ଗତ ୬ ଦିନ ଧରି ମାର୍ଚ୍ଚ ୨୩ଠାରୁ କୌଣସି ପଣ୍ୟ ବୋଝେଇ ଜାହାଜ ଚଳାଚଳ କରିପାରୁ ନ ଥିଲା। କେନାଲ ପଥରେ ଏଭର ଗିଭେନ୍ ନାମକ ଏକ ବିରାଟକାୟ ଜାହାଜ ଅଟକି ରହିବାରୁ ଏଭଳି ସଙ୍କଟ ସୃଷ୍ଟି ହୋଇଥିଲା। ବାଲି ଝଡ଼ ଯୋଗୁ ଜାହାଜଟି ଭାସି ନ ପାରି ବାଲିରେ ଅଟକି ରହିଥିଲା। ଜାହାଜଟି ଏସିଆ ଏବଂ ୟୁରୋପ ମଧ୍ୟରେ ପଣ୍ୟ ପରିବହନ କରିଥାଏ। ଫଳରେ ୧୯୩.୩ କିଲୋମିଟର ଦୀର୍ଘ କେନାଲର ଉଭୟ ପଟରେ ୪୫୦ରୁ ଅଧିକ ଜାହାଜ ଅଟକି ରହିଥିଲେ। ବିରାଟକାୟ ଜାହାଜରୁ ପଣ୍ୟ ଖଲାସ ପାଇଁ ଯୋଜନା କରାଯାଇଥିଲା। ତେବେ ସୋମବାର ଜାହାଜଟି ପୁଣି ପାଣିରେ ଭାସିବା ଆରମ୍ଭ କରିଛି। ଜାହାଜଟି ପୁଣି ଗନ୍ତବ୍ୟ ପଥରେ ଯାତ୍ରା ଆରମ୍ଭ କରିଛି। ବାଲିରେ ଲାଖି ରହିଥିବାରୁ ରବିବାର ଉଚ୍ଚ ଜୁଆର ପରେ ମଧ୍ୟ ଏହା ଭାସି ନ ଥିଲା। ତେଣୁ କେନାଲରେ ଜାହାଜ ଚଳାଚଳ ଠପ୍ ହୋଇ ଯାଇଥିଲା। ଏହି କେନାଲ ଦେଇ ପୃଥିବୀର ମୋଟ କାରବାରର ୧୨ ପ୍ରତିଶତ ସମ୍ପନ୍ନ ହୋଇଥାଏ। ଜାହାଜ ଅଟକି ରହିଥିବା ଯୋଗୁ ଅତ୍ୟାବଶ୍ୟକ ସାମଗ୍ରୀ ପରିବହନରେ ବାଧା ସୃଷ୍ଟି ହୋଇଥିଲା। ଫଳରେ ପୃଥିବୀ ବ୍ୟାପୀ ବିଭିନ୍ନ ସାମଗ୍ରୀର ଦାମ୍ ବୃଦ୍ଧି ଆଶଙ୍କା ରହିଥିଲା। ମାତ୍ର ବିରାଟକାୟ ଜାହାଜଟି ପୁଣି ଭାସିବା ଆରମ୍ଭ କରିବା ଯୋଗୁ ଏହି ଆଶଙ୍କା ଦୂର ହୋଇଛି। ଜାହାଜଟି ଭାସିବା ପାଇଁ କେନାଲରେ ଏହା ଅଟକି ରହିଥିବା ସ୍ଥାନରୁ ୨୭ ହଜାର କ୍ୟୁବିକ ମିଟର ବାଲି ଖନନ କରାଯାଇ କେନାଲକୁ ୧୮ ମିଟର ଗଭୀର କରାଯାଇଥିଲା। ସୂଚନାଯୋଗ୍ୟ, ସୁଏଜ୍ କେନାଲ ଦେଇ ପ୍ରତିଦତିନ ୫୦ରୁ ଅଧିକ ଜାହାଜ ଚଳାଚଳ କରିଥାନ୍ତି। ଏଭର ଗିଭେନ୍ ଜାହାଜ ଅଯକି ରହିବା ଯୋଗୁ ପ୍ରତିଦିନ ୪୦୦ ନିୟୁତ ଡଲାରର କ୍ଷତି ହେଉଥିଲା।
