ମାଲକାନଗିରି,୨୬ା୧: ମାଲକାନଗିରି ଡିଏନ୍କେ ଖେଳ ପଡ଼ିଆରେ ଜିଲାସ୍ତରୀୟ ସାଧାରଣତନ୍ତ୍ର ଦିବସ ପାଳିତ ହୋଇଛି। ମୁଖ୍ୟ ଅତିଥି ଭାବେ କ୍ରୀଡ଼ା ଓ ଯୁବ ବ୍ୟାପାର ମନ୍ତ୍ରୀ ତୁଷାରକାନ୍ତି ବେହେରା ଯୋଗଦେଇ ଜାତୀୟ ପତାକା ଉତ୍ତୋଳନ କରିବା ସହ ପୋଲିସ ବାହିନୀ ପକ୍ଷରୁ ଅଭିବାଦନ ଗ୍ରହଣ କରିଥିଲେ। ଏହି ଉପଲକ୍ଷେ ମନ୍ତ୍ରୀ ନିଜ ଅଭିଭାଷଣରେ କହିଛନ୍ତି, ୭୨ ବର୍ଷରେ ରାଜ୍ୟରେ ବହୁ ଉନ୍ନତି ଘଟିଛି। ବିଗତ ୨୫ ବର୍ଷରେ ମାଲକାନଗିରି ଜିଲାବାସୀ ସ୍ବାଧୀନତାର ଅର୍ଥ ବୁଝିବା ସହ ବିକାଶରେ ସାମିଲ୍ ହୋଇଛନ୍ତି। ଆର୍ଥିକ ବିକାଶ ସହ କୃଷି, ଶିକ୍ଷା, ଜଳସେଚନ, ସ୍ବାସ୍ଥ୍ୟ, ଗମନାଗମନ ଏବଂ ନିଯୁକ୍ତି କ୍ଷେତ୍ରରେ ଜିଲା ବେଶ୍ ଉନ୍ନତି କରିଛି। ଜିଲାର ସର୍ବାଙ୍ଗୀନ ବିକାଶ ନିମନ୍ତେ ସରକାର ପ୍ରଚେଷ୍ଟା ଜାରି ରଖିଥିବା ସେ କହିବା ସହ ମାଓବାଦୀଙ୍କୁ ମୁଖ୍ୟସ୍ରୋତରେ ସାମିଲ ହେବାକୁ ଆହ୍ବାନ କରିଥିଲେ। ଏହି ଅବସରରେ କରୋନା ଯୋଦ୍ଧାଙ୍କୁ ସମ୍ମାନିତ କରାଯାଇଥିଲା। ମନ୍ତ୍ରୀ ମାଲକାନଗିରିସ୍ଥିତ ଶିଶୁ ଗୃହକୁ ଯାଇ ଅନାଥ ଶିଶୁଙ୍କ ସହ ଆଲୋଚନା କରିବା ସହିତ ସମସ୍ୟା ବୁଝିଥିଲେ। କାର୍ଯ୍ୟକ୍ରମରେ ଜିଲାପାଳ ୱାଇ. ବିଜୟ, ଏସ୍ପି ହ୍ରିଷିକେଶ ଡି ଖିଲାରି, ଅତିରିକ୍ତ ଜିଲାପାଳ ବୀରସେନ ପ୍ରଧାନ, ଉପଜିଲାପାଳ ରାମେଶ୍ୱର ପ୍ରଧାନଙ୍କ ସମେତ ବିଭିନ୍ନ ବିଭାଗର ପଦାଧିକାରୀ ଓ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ। ଡିଆଇପିଆର୍ଓ ଦିଲୀପ କୁମାର ସାମନ୍ତରାୟ କାର୍ଯ୍ୟକ୍ରମକୁ ପରିଚାଳନା କରିଥିଲେ।
