ଭୁବନେଶ୍ୱର,୧୬।୧(ବ୍ୟୁରୋ): କିଡ୍ନୀ ଦେବା ନାଁରେ ରାଜ୍ୟରେ ସକ୍ରିୟ ଥିବା ଠକେଇ ର଼୍ୟାକେଟ୍ର ମାଷ୍ଟରମାଇଣ୍ଡ୍ କେନ୍ଦ୍ରାପଡ଼ାର ହିମାଂଶୁ ଭୂଷଣ ନନ୍ଦଙ୍କୁ ରିମାଣ୍ଡରେ ନେବାକୁ ଅନୁମତି ଦେଇଛନ୍ତି ଏସ୍ଡିଜେଏମ୍ କୋର୍ଟ। ଶନିବାରଠାରୁ ତାଙ୍କୁ ୩ ଦିନିଆ ରିମାଣ୍ଡରେ ଆଣିବ କମିଶନରେଟ ପୋଲିସ। ର଼୍ୟାକେଟରେ ଅନ୍ୟ କେଉଁମାନଙ୍କର ସମ୍ପୃକ୍ତି ରହିଛି, ଅଭିଯୋଗ ବାଦ୍ ଆଉ କେତେଜଣଙ୍କୁ କିଡ୍ନୀ ଦେବାକୁ କହି କେତେଟଙ୍କା ଠକି ନେଇଛନ୍ତି ଓ ଲୁଟ୍ ଟଙ୍କା କେଉଁଠି ରଖିଛନ୍ତି ତାହାର ଟିକିନିଖି ତଥ୍ୟ ହାସଲ କରିବାକୁ ଲକ୍ଷ୍ୟ ରଖିଛି ପୋଲିସ। ତେବେ ହିମାଂଶୁ କେତେକ ହସ୍ପିଟାଲ ଓ କେତେଜଣ ଡାକ୍ତରଙ୍କ ସହଯୋଗରେ ର଼୍ୟାକେଟ ଚଳାଉଥିବା ସନ୍ଦେହ କରାଯାଉଛି। ଏସବୁ ଦିଗକୁ ଜେରାବେଳେ ପୋଲିସ ଗୁରୁତ୍ୱ ଦେବ ବୋଲି ଜଣାପଡିଛି।
ସୂଚନାଯୋଗ୍ୟ, ଭୁବନେଶ୍ୱରର ଏକ ଘରୋଇ ହସ୍ପିଟାଲର ହିମାଂଶୁ ମାର୍କେଟିଂ ବିଭାଗରେ ଚାକିରି କରୁଥିଲେ। ଏହି ସମୟରେ ସେ ହସ୍ପିଟାଲରେ କିଡ୍ନୀ ଆବଶ୍ୟକ ଥିବା ଲୋକଙ୍କ ସମ୍ପର୍କରେ ତଥ୍ୟ ହାସଲ କରିଥିଲେ। ଏହାପରେ ସେମାନଙ୍କୁ ଯୋଗାଯୋଗ କରି କିଡ୍ନୀ ଦେବାକୁ ମିଥ୍ୟା ପ୍ରତିଶ୍ରୁତି ଦେଇ ସେମାନଙ୍କଠାରୁ ଟଙ୍କା ଠକି ନେଇଥିଲେ। ପରେ ଆଉ ଧରାଛୁଆଁ ଦେଉ ନ ଥିଲେ। ଏକ ଅଭିଯୋଗ ଆଧାରରେ ନୟାପଲ୍ଲୀ ପୋଲିସ ତାଙ୍କୁ ଗିରଫ କରିବା ପରେ ହିମାଂଶୁଙ୍କ କଳାକାରନାମା ସାମ୍ନାକୁ ଆସିଥିଲା। ଇତିମଧ୍ୟରେ ଲକ୍ଷ୍ମୀସାଗର ଓ ମଞ୍ଚେଶ୍ୱର ଥାନାରେ ମଧ୍ୟ ତାଙ୍କ ନାମରେ ଅଭିଯୋଗ ହୋଇଥିବାବେଳେ ବହୁ କୋଟି ଠକେଇ କରିଥିବା ଜଣାପଡିଛି। ତେବେ ଠକେଇର ଶିକାର ଲୋକେ ତୁରନ୍ତ ପୋଲିସକୁ ଜଣାଇବାକୁ ଭୁବନେଶ୍ୱର ଡିସିପି ଉମାଶଙ୍କର ଦାଶ ପରାମର୍ଶ ଦେଇଛନ୍ତି।
