ସିଡନୀ, ୧୦।୧: ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ସିଡନୀରେ ଚାଲିଥିବା ତୃତୀୟ ଟେଷ୍ଟରେ ଅଷ୍ଟ୍ରେଲିଆର କିଛି ଦର୍ଶକ ସମସ୍ତ ସୀମା ଅତିକ୍ରମ କରିଥିଲେ। ବିସିସିଆଇ ସୂତ୍ର ଅନୁଯାୟୀ, ପଡ଼ିଆରେ ଉପସ୍ଥିତ ଥିବା କିଛି ଦର୍ଶକ ଫିଲ୍ଡିଂ କରୁଥିବା ମହମ୍ମଦ ସିରାଜଙ୍କୁ ଦୁର୍ବ୍ୟବହାର କରିବା ସହିତ ବିଗ ମଙ୍କି ଏବଂ ବ୍ରାଉନ ଡଗ ବୋଲି କହିଥିଲେ। ଏହାକୁ ନେଇ ଆଇସିସି ଅଷ୍ଟ୍ରେଲିଆ କ୍ରିକେଟ୍ ବୋର୍ଡକୁ ଜବାବ ତଲବ କରିଛି। ସୂଚନାଯୋଗ୍ୟ, ମ୍ୟାଚ୍ର ତୃତୀୟ ଦିନରେ ଦର୍ଶକ ଭାରତୀୟ ବୋଲର୍ ମହମ୍ମଦ ସିରାଜଙ୍କ ଉପରେ ଅଶାଳୀନ ମନ୍ତବ୍ୟ ଦେଇଥିଲେ। ଉଭୟ ଜସପ୍ରୀତ ବୁମରା ଏବଂ ସିରାଜ ମଧ୍ୟ ଏ ବିଷୟରେ ଅଭିଯୋଗ କରିଥିଲେ। କ୍ରମାଗତ ଦ୍ୱିତୀୟ ଦିନ ସିଡନୀରେ ଉପସ୍ଥିତ ଦର୍ଶକମାନେ ସିରାଜଙ୍କୁ ଦୁର୍ବ୍ୟବହାର କରିଥିଲେ। ମ୍ୟାଚର ଚତୁର୍ଥ ଦିନରେ ଚା ସମୟ ପୂର୍ବରୁ ୮୬ତମ ଓଭର ଶେଷ ହେବା ପରେ ପଡ଼ିଆରେ ସବୁକିଛି ସ୍ବାଭାବିକ ଥିଲା। ବୋଲିଂ ପରେ ଫିଲ୍ଡିଂ କରିବାକୁ ଯାଇଥିବା ସିରାଜ ପୁଣିଥରେ ଜାତିଗତ ମନ୍ତବ୍ୟର ସମ୍ମୁଖୀନ ହୋଇଥିଲେ।
