ନୂଆଦିଲ୍ଲୀ: ରାଷ୍ଟ୍ରାୟତ୍ତ ବ୍ୟାଙ୍କଗୁଡିକ ୨୫ ହଜାର ଅତିରିକ୍ତ ପୁଞ୍ଜି ସଂଗ୍ରହ କରିବା ନେଇ ବର୍ତ୍ତମାନ ଯୋଜନା କରୁଛନ୍ତି। ଆଗାମୀ ୩ ମାସରେ ଉଭୟ ଇକ୍ୱିଟି ଏବଂ ଡେଟ୍ ଦ୍ୱାରା ଏଭଳି ପାଣ୍ଠି ସଂଗ୍ରହ କରାଯିବ। ନିୟାମକ ଆବଶ୍ୟକତା ଏବଂ ଋଣ ଯୋଗାଣକୁ ତ୍ୱରାନ୍ବିତ କରିବା ଲାଗି ଏଭଳି ପଦକ୍ଷେପ ନିଆଯାଉଥିବା ଜଣାପଡିଛି। ଗତ କିଛି ମଧ୍ୟରେ ପ୍ରମୁଖ ବ୍ୟାଙ୍କଗୁଡିକ ବଜାରରୁ ପ୍ରାୟ ୪୦ ହଜାର କୋଟି ଟଙ୍କାର ପୁଞ୍ଜି ସଂଗ୍ରହ କରିଛନ୍ତି। ଏହି ବ୍ୟାଙ୍କ ମଧ୍ୟରେ ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆ(ଏସ୍ବିଆଇ), ପଞ୍ଜାବ ନ୍ୟାଶନାଲ ବ୍ୟାଙ୍କ ଏବଂ କାନାରା ବ୍ୟାଙ୍କ ରହିଛନ୍ତି। ଇକ୍ୱିଟି, ଏଟି୧ ଏବଂ ଟାୟାରା-୨ ବଣ୍ଡ ଦ୍ୱାରା ଏଭଳି ପୁଞ୍ଜି ଉଠାଣ କରାଯାଇଛି।
ଏହି ପରିପ୍ରେକ୍ଷୀରେ ଆର୍ଥତ୍କ ସେବା ସଚିବ ଦେବାଶିଷ ପଣ୍ଡା କହିଛନ୍ତି ଯେ, ଗତ କିଛି ମାସରେ ବ୍ୟାଙ୍କ ବୃହତ୍ ପରିମାଣର ଅର୍ଥ ବଜାରରୁ ଉଠାଣ କରିବାକୁ ସକ୍ଷମ ହୋଇଛନ୍ତି। ଚଳିତ ଆର୍ଥତ୍କ ବର୍ଷରେ ବ୍ୟାଙ୍କ ଆଉ ୨୦ରୁ ୨୫ ହଜାର କୋଟି ଟଙ୍କା ବଜାରରୁ ଉଠାଇ ପାରନ୍ତି ବୋଲି ସେ ମତ ପ୍ରକାଶ କରିଛନ୍ତି। ସୂଚନାଯୋଗ୍ୟ, ଚଳିତ ମାସ କ୍ୱାଲିଫାଏଡ ଇନଷ୍ଟିଚ୍ୟୁଶନାଲ ପ୍ଲେସମେଣ୍ଟରେ କାନାରା ବ୍ୟାଙ୍କ ୨ ହଜାର କୋଟି ଏବଂ ପିଏନ୍ବି ୩,୭୮୮ କୋଟି ଉଠାଇଛି। କୋଭିଡ ଯୋଗୁ ସରକାରଙ୍କୁ ରାଜସ୍ବ ସଂଗ୍ରହରେ ବାଧା ଉପୁଜିଛି। ଏଭଳି ସ୍ଥିତିରେ ସରକାରୀ ସହାୟତାକୁ ଅପେକ୍ଷା ନ କରି ବ୍ୟାଙ୍କ ନିଜ ସକ୍ଷମ ଅନୁସାରେ ବଜାରରୁ ଋଣ ଉଠାଇ ପାରିବେ ବୋଲି ନିକଟରେ ରିଜର୍ଭ ବ୍ୟାଙ୍କ ଗଭର୍ନର ଶକ୍ତିକାନ୍ତ ଦାସ କହିଛନ୍ତି।
ଚଳିତ ଆର୍ଥତ୍କ ବର୍ଷରେ ସରକାର ରାଷ୍ଟ୍ରାୟତ୍ତ ବ୍ୟାଙ୍କଗୁଡିକ ୨୦ ହଜାର କୋଟି ଟଙ୍କାର ସହାୟତା ପ୍ରଦାନ କରିଛନ୍ତି। ସେହିଭଳି ନିୟାମକ ଆବଶ୍ୟକତା ପୂରଣ ଲାଗି ସରକାର ପିଏନ୍ବିକୁ ୫,୫୦୦ କୋଟି ଟଙ୍କାର ପୁଞ୍ଜି ଯୋଗାଇ ଦେଇଛନ୍ତି। ଅପରପକ୍ଷରେ ଇକ୍ୱିଟି ଶେୟାରର ପ୍ରିଫରେନ୍ସିଆଲ ଆଲଟମେଣ୍ଟ ଜରିଆରେ ପୁଞ୍ଜି ସଂଗ୍ରହ ଲାଗି ପଞ୍ଜାବ ଆଣ୍ଡ ସିନ୍ଧ ବ୍ୟାଙ୍କକୁ ଗତ ମାସରେ ଅନୁମତି ମିଳିଛି। ୨୦୧୯-୨୦ରେ ସରକାର ବ୍ୟାଙ୍କଗୁଡିକୁ ୭୦ ହଜାର କୋଟି ଟଙ୍କା ଯୋଗାଇ ଦେଇଥିଲେ। ଋଣ ଯୋଗାଣକୁ ତ୍ୱରାନ୍ବିତ କରି ଅର୍ଥ ବ୍ୟବସ୍ଥାର ଜିଡିପିକୁ ବଢାଇବା ଦିଗରେ ଏଭଳି ଯୋଜନା ହାତକୁ ନିଆଯାଇଥିଲା। ଏହି ଅର୍ଥ ମଧ୍ୟରୁ ପିଏନ୍ବି ୧୬,୦୯୧ କୋଟି, ୟୁନିୟନ ବ୍ୟାଙ୍କ ୧୧,୭୬୮ କୋଟି, କାନାରା ବ୍ୟାଙ୍କ ଏବଂ ଇଣ୍ଡିଆନ ବ୍ୟାଙ୍କ ଯଥାକ୍ରମେ ୬୫୫୧ କୋଟି, ୨୫୩୪ କୋଟି ଲାଭ କରିଥିଲେ। ମୋଟ ୧୨ ରାଷ୍ଟ୍ରାୟତ୍ତ ବ୍ୟାଙ୍କ ମଧ୍ୟରୁ ୧୧ ଗତ ତ୍ରୈମାସରେ ଲାଭ ହାସଲ କରିଥିବା ପଣ୍ଡା କହିଛନ୍ତି।
