ଦଶମନ୍ତପୁର, ୧୯।୧୨ ( ଡ଼ି.ଏନ.ଏ ): କୋରାପୁଟ ଜିଲା ଦଶମନ୍ତପୁର ବ୍ଲକ ନନ୍ଦିଗାଁ ପଞ୍ଚାୟତର ବାଗ୍ରୀବେଡ଼ା ଗ୍ରାମର ଗ୍ରାମବାସୀ ଅନେକ ସମସ୍ୟା ମଧ୍ୟରେ କାଳ କାଟୁଛନ୍ତି। ବିଭିନ୍ନ ସରକାରୀ ଯୋଜନା ସେମାନଙ୍କ ନିକଟରେ ଅପହଞ୍ଚ ହୋଇ ରହିଛି। ୭୯ ପରିବାରକୁ ନେଇ ଗଢି ଉଠିଥିବା ଏହି ଗ୍ରାମ ପଞ୍ଚାୟତଠାରୁ ମାତ୍ର ୫ କିମି ଦୂରରେ ରହିଛି।ନନ୍ଦିଗାଁ ପଞ୍ଚାୟତଠାରୁ ମାଳି ବିଶାଳି ଗାଁ ପର୍ଯ୍ୟନ୍ତ ପକ୍କା ରାସ୍ତା ରହିଥିବା ସେଠାରୁ ବାଗ୍ରୀବେଡ଼ା ଗ୍ରାମକୁ ରାସ୍ତା ନାହିଁ। ବିପଦପୂର୍ଣ୍ଣ ଜଙ୍ଗଲିଆ ରାସ୍ତାକୁ ଅତିକ୍ରମ କଲେ ବାଗ୍ରୀବେଡ଼ାରେ ପହଞ୍ଚତ୍ ହେବ। ମାଳିବିଶାଳି ଛକରୁ ବାଗ୍ରୀବେଡ଼ା ଯିବାବେଳେ ବାଟରେ ବିଜାଗଛ ଝୋଲା, ଜାମଗଛ ଝୋଲା ଏବଂ ଡୁମୁରିଗଛ ଝୋଲା ପଡେ। ଏହି ଝୋଲା ପାରି ହୋଇ ଯିବାକୁ ପଡୁଥିବାରୁ ଗ୍ରାମବାସୀ ପ୍ରାୟ ସେତେ ଜରୁରୀ ନ ପଡିଲେ ପଞ୍ଚାୟତ କିମ୍ବା ବ୍ଲକ କାର୍ଯ୍ୟାଳୟକୁ ଯାଆନ୍ତିନାହିଁ । ଏହି ଝୋଲା ଯୋଗୁ ଏଯାଏ ଗ୍ରାମକୁ ୩ ଚାକିଆ ଯାନ ଯାଇପାରୁନାହିଁ। ଗାଁରେ କୌଣସି ରୋଗୀଙ୍କୁ ଡାକ୍ତରଖାନା ନେବାକୁ ହେଲେ ଆମେ ଦୋଳାରେ ମାଳିବିଶାଳି ଛକ ଯାଏ ୩କିମି ବୋହି ନେଇ ଡାକ୍ତରଖାନା ନେଇଥାଉ ବୋଲି ଗ୍ରାମର ଧନୁର୍ଜୟ କମାର, ଶ୍ରୀରାମ ମୁଦୁଲି, ତ୍ରିନାଥ ଜାନି, ସଞ୍ଜୀବ ମୁଦୁଲି, ଭାଲୁ ମୁଦୁଲି ପ୍ରମୁଖ କହିଛନ୍ତି। ଏପରି କି ଡାକ୍ତରଖାନା ନେବା ବେଳେ ଏହି ଝୋଲା ଯୋଗୁ କେତେକ ରୋଗୀଙ୍କ ଅଧାବାଟରେ ମୃତ୍ୟୁ ଘଟିଛି ବୋଲି ସେମାନେ କହିଛନ୍ତି। ପ୍ରଧାନ ମନ୍ତ୍ରୀ ଗ୍ରାମ୍ୟ ସଡ଼କ ଯୋଜନାରେ ଝୋଲା ଉପରେ କଲଭର୍ଟ ନିର୍ମାଣ କରାଯାଇ ଗ୍ରାମକୁ ରାସ୍ତା ନିର୍ମାଣ କରିବାକୁ ଗ୍ରାମବାସୀ ଦାବି କରିଛନ୍ତି। ନ ହେଲେ ଆମେ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେବୁ ବୋଲି ଚେତାବନୀ ଦେଇଛନ୍ତି। ଏ ସମ୍ପର୍କରେ ବିଡିଓ ଡ଼ମ୍ବରୁଧର ମଲ୍ଲିକଙ୍କ ମତାମତ ନେବାକୁ ତାଙ୍କୁ ଯୋଗାଯୋଗ କରିବାରୁ ତାଙ୍କ ସହ ଯୋଗାଯୋଗ ସମ୍ଭବ ହୋଇ ନ ଥିଲା।
