ରାଜନଗର,୩ା୧୨(ଡି.ଏନ.ଏ.): କେନ୍ଦ୍ରାପଡ଼ା ଜିଲା ଗହୀରମଥା ସମୁଦ୍ର ମାଦଳିମାଉଥ ନିକଟ ନିଷିଦ୍ଧାଞ୍ଚଳରେ ପଶି ମାଛ ମାରୁଥିବାବେଳେ ନଭେମ୍ବର ୨୯ରେ ବନ ବିଭାଗର ପାଟ୍ରୋଲିଂ ଟିମ୍ ଲକ୍ଷ୍ମୀ ତାରିଣୀ-୩ ନାମକ ଟ୍ରଲରକୁ ଜବତ କରିଥିଲା। ଜବତ ଟ୍ରଲରରେ ଭଦ୍ରକ ଅଞ୍ଚଳର ୯ ମତ୍ସ୍ୟଜୀବୀଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଥିଲା। ସରକାରୀ ସିଜର ଲିଷ୍ଟରେ ଜବତ ଟ୍ରଲରରୁ ଅନ୍ୟାନ୍ୟ ଜିନିଷ ସହ ୨ କୁଇଣ୍ଟାଲ ସାମୁଦ୍ରିକ ମାଛ ଥିବା ଗହୀରମଥା ରେଞ୍ଜ ଅଫିସର ଦେବାଶିଷ ଭୋଇ ଦର୍ଶାଇଥିଲେ। ବନପାଳ ପ୍ରଫୁଲ୍ଲ କୁମାର ମାଝି ଏତିକି ପରିମାଣର ସାମଗ୍ରୀ ଜବତ ନେଇ ବିଭାଗକୁ ରିପୋର୍ଟ କରିଥିଲେ। ହେଲେ ଜବତ ମାଛ ନିଲାମ ସମୟରେ ୨ କୁଇଣ୍ଟାଲ ଜାଗାରେ ୧୮ କୁଇଣ୍ଟାଲ ବିକ୍ରି ପାଇଁ ମସୁଧା ହୋଇଥିଲା। ଏ ସମ୍ପର୍କିତ ଖବର ବିଭିନ୍ନ ଗଣମାଧ୍ୟମରେ ପ୍ରକାଶ ପାଇଥିଲା। ରାଜନଗର ଡିଏଫ୍ଓ ଏହି କେଳେଙ୍କାରୀ ଘଟଣାର ତଦନ୍ତ ଅତିରିକ୍ତ ବନ ସଂରକ୍ଷକଙ୍କ ଦ୍ୱାରା କରାଇଥିଲେ। ପ୍ରାଥମିକ ତଦନ୍ତ ରିପୋର୍ଟ ଆଧାରରେ ବୁଧବାର ଡିଏଫଓ ବିକାଶ ରଞ୍ଜନ ଦାଶ ବନପାଳ ମାଝିଙ୍କୁ ନିଲମ୍ବିତ କରିଥିବା ଜଣାପଡିଛି।
ହେଲେ କେଳେଙ୍କାରୀରେ ସମ୍ପୃକ୍ତି ଥିବା ଅନ୍ୟମାନଙ୍କୁ ଘଣ୍ଟ ଘୋଡାଯାଇଥିବା କୁହାଯାଉଛି। ବନପାଳ ମାଝି ମାଛ ନିଲାମ ସମ୍ପର୍କରେ ଗଣମାଧ୍ୟମକୁ ସତ୍ୟ ଘଟଣା କହିଥିବାରୁ ତାଙ୍କୁ ନିଲମ୍ବିତ କରାଯାଇଥିବା କୁହାଯାଉଛି। ଜବତ ହେଉଥିବା ଟ୍ରଲରର ମାଛ ଦୁର୍ନୀତିରୁ ନଜର ହଟାଇବାକୁ ଏଭଳି ପଦକ୍ଷେପ ନିଆଯାଇଛି ବୋଲି ସାଧାରଣରେ କୁହାଯାଇଛି। ଏହାପରେ ଆଗାମୀଦିନରେ କୌଣସି ବନ କର୍ମଚାରୀ ବା ଅଧିକାରୀ ପାଟି ନ ଖୋଲିବାକୁ ପରୋକ୍ଷରେ ତାଗିଦ୍ କରାଯାଇଛି। ଏ ସମ୍ପର୍କରେ ରାଜନଗର ଡିଏଫ୍ଓ ଦାଶଙ୍କୁ ପଚାରିବାରେ ପ୍ରାଥମିକ ତଦନ୍ତ ଅନୁସାରେ ଗହୀରମଥା ବନପାଳ ମାଝିଙ୍କୁ ନିଲମ୍ବିତ କରାଯାଇଛି। ଏ ନେଇ ଅଧିକ ତଦନ୍ତ ଜାରି ରହିଛି। ଏହି ଘଟଣାରେ ଯଦି ଆଉ କାହାର ସମ୍ପୃକ୍ତି ଥିବା ଜଣାପଡିବ ତେବେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।
