ମୁମ୍ବାଇ,୨ା୧୨- ଚଳିତ ବିଗ୍ ବସ୍ରୁ ଓହରି ଯାଇଛନ୍ତି ଓ୍ବାଇଲ୍ଡ କାର୍ଡ ମାଧ୍ୟମରେ ଏଣ୍ଟ୍ରି କରିଥିବା କବିତା କୌଶିକ। ସେ ମଙ୍ଗଳବାର ଏଭଳି ନିଷ୍ପତ୍ତି ନେଇଥିବା ବେଳେ ଏହି ଏପିସୋଡ୍ ବୁଧବାର ପ୍ରସାରିତ ହେବ। ବିଗ୍ ବସ୍ ଘରେ ସାଥି କଣ୍ଟେଷ୍ଟାଣ୍ଟ ରୁବିନା ଡିଲାଇକଙ୍କ ସହ ବଡ଼ ଝଗଡ଼ା ପରେ ହଠାତ୍ ଓହରିବାକୁ ନିଷ୍ପତ୍ତି ନେଇଛନ୍ତି କୌଶିକ। ଏ ନେଇ ପ୍ରସାରଣକାରୀ ଚ୍ୟାନେଲ କଲର୍ସ ଟିଭି ପକ୍ଷରୁ ସୂଚନା ଦିଆଯାଇଛି।
ଚ୍ୟାନେଲ ପକ୍ଷରୁ ରୁବିନା ଓ କବିତାଙ୍କ ମଧ୍ୟରେ ହୋଇଥିବା କଥା କଟାକଟିର ଭିଡିଓକୁ ଟୁଇଟରେ ଶେୟାର କରାଯାଇଛି। ଏହି ଶୋରେ କବିତାଙ୍କ ବ୍ୟବହାର ଠିକ୍ ନ ଥିବା ରୁବିନା କହିଥିଲେ। ଏହାକୁ ନେଇ ଦୁଇ କଣ୍ଟେଷ୍ଟାଣ୍ଟ ମଧ୍ୟରେ ହୋଇଥିଲା ଜୋରଦାର ଝଗଡ଼ା। ଏଥିରେ ଅଭିନବ ଶୁକ୍ଲା ମଧ୍ୟ ସାମିଲ ଥିଲେ। ଯୁକ୍ତିତର୍କ ଏତେ ବଢ଼ି ଯାଇଥିଲା ଯେ, କବିତା ଘରର ମୁଖ୍ୟ ବାଟ ଦେଇ ବାହାରକୁ ଚାଲି ଯାଇଥିଲେ। ତେବେ କବିତା ଆଉ ଫେରିପାରିବେ ନାହିଁ। ଏଣୁ କ୍ରିଏଟିଭ ଟିମ ପରବର୍ତ୍ତୀ କାର୍ଯ୍ୟକ୍ରମ ଉପରେ ଧ୍ୟାନ ଦେଉଛି। କାରଣ ଚଳିତ ସପ୍ତାହରେ ୪ ଜଣ କଣ୍ଟେଷ୍ଟାଣ୍ଟ ବିଦା ହେବାର ଅଛି। କବିତା ନିଜ ଆଡ଼ୁ ଓହରି ଯିବାରୁ ବିଗ୍ ବସ୍ରେ ଏବେ କ’ଣ ହେବ ତାହା କହିବା ମୁସ୍କିଲ।
